ព័ត៌មានជាតិ

ផ្ទុះកូវីដលើអាជីវករផ្សារលើកំពង់ឆ្នាំង ក្រោយមានអាជីវករម្នាក់ស្លាប់ដោយកូវីដបំប្លែងថ្មី

បានផុស

៤ years មុន

នៅ

ថ្ងៃពុធ ៨ កញ្ញា ២០២១

ដោយ

ក្រោយពីមានស្ត្រីម្នាក់ជាអាជីវករផ្សារលើបានមរណភាពកាលពីយប់ថ្ងៃទី០៦ ខែកញ្ញា ឆ្នាំ២០២១ ដោយសារជំងឺកូវីដ១៩ បំប្លែងថ្មីប្រភេទដែលតា Delta គ្រូពេទ្យខេត្តកំពង់ឆ្នាំងនៅរសៀលថ្ងៃទី០៧ ខែកញ្ញា ឆ្នាំ២០២១ នេះ បានចុះយកសំណាកលើអាជីវករផ្សារលើកមពង់ឆ្នាំចំនួន៨៨នាក់ ហើយរកឃើញវិជ្ជមានកូវីដ១៩ ចំនួន១១នាក់ បន្ថែមទៀត នេះបើយោងតាមការបញ្ជាក់របស់ក្រុមគ្រូពេទ្យនៃមន្ទីរសុខាភិបាលខេត្តកំពង់ឆ្នាំង ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមគ្រូពេទ្យខេត្តបានបន្តថា ករណីនេះមិនទាន់អាចបញ្ជាក់ថាជាករណីកូវីដ១៩ បំប្លែងថ្មីប្រភេទដែលតា នោះទេ ព្រោះគ្រាន់តែធ្វើតេស្តសំណាកដំបូង (តេស្តរហ័ស) ដោយត្រូវបញ្ជូនសំណាកទាំងនោះទៅកាន់វិទ្យាដ្ឋានប៉ាស្ទ័រក្រុងភ្នំពេញ ដើម្បីបញ្ជាក់ឲ្យបានច្បាស់ថាតើជាកូវីដ១៩ ប្រភេទធម្មតា ឬក៏ជាការកូវីដបំប្លែងថ្មីប្រភេទដែលតា Delta។

សូមបញ្ជាក់ថា កាលពីថ្ងៃទី០៥ ខែកញ្ញា ឆ្នាំ២០២១ ក្រសួងសុខាភិបាល បានប្រកាសពីកូវីដបំប្លែងថ្មី ប្រភេទដែលតា នៅក្នុងខេត្តកំពង់ឆ្នាំងមាន១៣ករណីហើយ ។ ដោយឡែកនៅព្រឹកថ្ងៃទី០៧ ខែកញ្ញា ឆ្នាំ២០២១នេះ លោក ងិន ចាន់សារ៉េត ជាប្រធានក្រុមដឹកនាំក្រុមគ្រូពេទ្យយកសំណាកក្នុងខេត្តកំពង់ឆ្នាំង បញ្ជាក់ថា បានរកឃើញកូវីដបំប្លែងថ្មីប្រភេទដែលតា ចំនួន០៥នាក់បន្ថែមទៀត ។

ករណីនេះអាជ្ញាធរខេត្តកំពង់ឆ្នាំងនិងមន្ទីរសុខាភិបាលខេត្តកំពង់ឆ្នាំងសូមអំពាវនាវដល់បងប្អូនប្រជាពលរដ្ឋក្នុងខេត្ត សូមបង្កើនការប្រុងប្រយ័ត្ន អាជ្ញាធរខេត្តនិងគ្រូពេទ្យសូមធ្វើការអំពាវនាវចំពោះប្រជាពលរដ្ឋនៅតាមមូលដ្ឋាន ជាពិសេសនៅតាមទីប្រជុំជន និងទីផ្សារសូមប្រុងប្រយ័ត្នឲ្យបានខ្ពស់ដោយត្រូវអនុវត្តវិធានការរបស់ប្រមុខរាជរដ្ឋាភិបាល និងក្រសួងសុខាភិបាល ៣កុំ ៣ការពារឲ្យបានខ្ជាប់ខ្ជួន៕

អត្ថបទ៖ ឈៀងថារិទ្ធ