ព័ត៌មានជាតិ

ក្រុងតាខ្មៅរងជំនន់ទឹកភ្លៀង តើពន្ធនាគារខេត្តកណ្ដាល ប្រឈម និងត្រៀមអ្វីខ្លះ?

បានផុស

៣ years មុន

នៅ

ថ្ងៃពុធ ៨ កញ្ញា ២០២១

ដោយ

ជំនន់ទឹកភ្លៀង បានធ្វើឱ្យតំបន់មួយចំនួននៅក្រុងតាខ្មៅ ខេត្តកណ្តាលរងការជន់លិច។ ស្របពេល ពន្ធនាគារខេត្តកណ្ដាល មានទីតាំងស្របបណ្ដោយស្ទឹងព្រែកត្នោត និងស្ថិតក្នុងក្រុងតាខ្មៅផ្ទាល់ ពន្ធនាគារខេត្តកណ្ដាលជួបប្រឈមអ្វីដែរ ឬទេ និងបានត្រៀមបង្ការអ្វីខ្លះ?

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ចាត ស៊ីនាង ប្រធានពន្ធនាគារខេត្តកណ្ដាល មានប្រសាសន៍ប្រាប់ “កម្ពុជាថ្មី” នៅថ្ងៃទី០៨ ខែកញ្ញា នេះថា ទន្ទឹមពេលក្រុងតាខ្មៅ ខេត្តកណ្ដាលរងជំនន់ទឹកភ្លៀង ចំពោះពន្ធនាគារខេត្តកណ្ដាល ដែលមានទីតាំងនៅ ក្រុងតាខ្មៅផ្ទាល់ មិនមានផលប៉ះពាល់ធ្ងន់ធ្ងរនោះទេ។

លោកមានប្រសាសន៍ថា៖ “ដូចជាមិនអីទេ អូន! ភ្លៀងមានលិចដែរ តែមិនលិចចូលប៉ះពាល់ពន្ធនាគារខាងក្នុងទេ អត់មានអីទេ។ ប្រពន្ធលូរបស់យើង តែរាំងភ្លៀងកន្លះម៉ោង វាហូរចេញអស់ហើយ”។

ប្រធានពន្ធនាគារខេត្តកណ្ដាលរូបនេះបានបញ្ជាក់ទៀតថា លោកតែងតាមដានស្ថានភាពកម្ពស់ទឹក ហើយបើករណីមានជំនន់ទឹកភ្លៀង ឬទឹកជំនន់ឡើងខ្លាំង ខាងពន្ធនាគារក៏ត្រៀមទប់ទល់ និងដោះស្រាយបញ្ហាទឹកជន់ចូលពន្ធនាគារជាយថាហេតុផងដែរ។

លោក ចាត ស៊ីនាង មានប្រសាសន៍ថា៖ “កន្លងមកដូចឆ្នាំទៅ បញ្ហាទឹកជំនន់ឡើងហ្នឹង គឺខាងខ្ញុំបានទិញត្រៀមសម្បកបាវ ហើយត្រៀមដីខ្សាច់យកមកទុកសម្រាប់ច្រក ហើយដាក់នៅកៀនៗមាត់ទ្វារ នៅក្បែរមាត់លូ ដែលលូបង្ហូរចេញ ក្រែងវាផុលម៉ោ។ អ៊ីចឹងយើងត្រៀម យើងច្រកដាក់ជាស្រេចដាក់នៅតាមច្រកផ្លូវនីមួយៗដែលថានឹងអាចទឹកចូល ហើយមួយទៀតយើងត្រៀមម៉ាស៊ីន បើមានករណីហ្នឹងមែន គឺយើងត្រូវបូមចេញ”។

លោក ចាត ស៊ីនាង បានបន្ថែមទៀតថា៖ “សូម្បីប៉ុន្មានថ្ងៃមុន ដែលខ្ញុំមើលឃើញស្ថានភាពអត់ល្អ ក៏ខ្ញុំបានត្រៀមម៉ាស៊ីនបូមទឹក ត្រៀមបាវ ហើយនឹងខ្សាច់រួចជាស្រេច ហើយយើងធ្វើការតាមដានជាប់ជាប្រចាំពីកម្ពស់ទឹកស្ទឹកព្រែកត្នោត”។

គួរបញ្ជាក់ថា ដោយសារបញ្ហាជំនន់ទឹកភ្លៀងនៅក្រុងតាខ្មៅនេះ អាជ្ញាធរខេត្តកណ្ដាលបានបិទមិនឱ្យធ្វើចរាចរណ៍រថយន្តដឹកទំនិញធុនធ្ងន់ នៅលើកំណាត់ផ្លូវមួយចំនួនមានផ្លូវលេខ ២០១ ២០៩ ១០៨ ១០៩ ១១០ និងកំណាត់ផ្លូវជាតិលេខ២១ ចាប់ពីរង្វង់មូលលោកតាខ្មៅ ដល់ផ្លូវជាតិលេខ២១ បេ (១១៥) ជាបណ្តោះអាសន្ន ចាប់ពីថ្ងៃទី ០៧ ដល់ ១៥ ខែកញ្ញា ឆ្នាំ២០២១ ដើម្បីចៀសវាងការខូចខាតដល់ផ្លូវថ្នល់។ ដោយឡែកចំពោះរថយន្តគ្រួសារ (ទេសចរណ៍) អាចធ្វើចរាចរណ៍បានជាធម្មតា។

គួររំលឹកថា ក្រសួងធនធានទឹក និងឧតុនិយម នៅថ្ងៃទី៧ ខែកញ្ញា ឆ្នាំ២០២១ បានជូនដំណឹង អំពីស្ថានភាព អាកាសធាតុ ចាប់ពីថ្ងៃទី៨ ដល់ថ្ងៃទី១៤ ខែកញ្ញាថា ព្រះរាជាណាចក្រកម្ពុជា ទទួលនូវឥទ្ធិពល ពីបាតុភូតជ្រលង សម្ពាធទាបឥណ្ឌាខ្លាំង ប្រព័ន្ធសម្ពាធទាប (ITCZ) ដែលអូសបន្លាយ ពីប្រទេសភូមា កាត់ប្រទេសថៃ ឡាវ និង វៀតណាម រួច នឹងចុះបន្តិចមកលើ ប្រទេសកម្ពុជា ខ្យល់មូសុងនិរតី បក់ក្នុងល្បឿនមធ្យម ទៅបង្គួរ ខ្យល់សមុទ្រ (Sea Breeze) ហើយនឹងវិសម្ពាធចំនួនពីរ ដែលមួយស្ថិតនៅខាងកើត ក្បែរប្រទេសហ្វីលីពីន ដែលបច្ចុប្បន្ន បានបំប្លែងខ្លួន ទៅជាព្យុះ ទី១៣ ឈ្មោះ កុនសុន (STS CONSON) ដែលនឹងមានដំណើរ ឆ្ពោះទៅប្រទេសវៀតណាម ខាងជើង និងវិសម្ពាធមួយទៀត ស្ថិតនៅក្នុងសមុទ្រ ភាគខាងកើត ហ្វីលីពីន ធ្វើដំណើរទៅលើ មិនមានឥទ្ធិពល មកលើកម្ពុជាយើងទេ។

ក្នុងសេចក្តីជូនដំណឹង ខាងលើ បានបញ្ជាក់ថា ស្ថានភាពបែបនេះ ធ្វើឲ្យបណ្តាខេត្ត នៅតំបន់វាលទំនាប កណ្តាល មានសីតុណ្ហភាព អប្បបរមា ពី ២៣ ទៅ ២៥ អង្សាសេ សីតុណ្ហភាព អតិបរមា ពី ៣១ ទៅ ៣៣ អង្សាសេ ផ្ទៃមេឃអួរអាប់ នឹងអាចមានភ្លៀងធ្លាក់ ក្នុងកម្រិតពីបង្គួរទៅខ្លាំង លាយឡំទៅដោយផ្គរ រន្ទះ និង ខ្យល់កន្ត្រាក់ ទន្ទឹមនោះ បណ្កាខេត្តមួយចំនួន មានជាអាទិ៍ ដូចជា ខេត្តបាត់ដំបង ខេត្តពោធិ៍សាត់ ខេត្តកំពង់ធំ ខេត្តកំពង់ឆ្នាំង ខេត្តកំពង់ស្ពឺ ខេត្តកណ្តាល ខេត្តស្វាយរៀង និងរាជធានីភ្នំពេញ អាចប្រឈមនឹងជំនន់ទឹកភ្លៀង៕

អត្ថបទ៖ ច័ន្ទ វីរៈ