ព័ត៌មានជាតិ

អាជ្ញាធរភ្នំពេញ សម្រេចចិត្តផ្អាកចរាចរ ផ្លូវលេខ ៦១៤ រយៈពេល១ខែ

បានផុស

៤ years មុន

នៅ

ថ្ងៃសៅរ៍ ២៨ វិច្ឆិកា ២០២០

ដោយ

ដើម្បីឲ្យការដ្ឋានដាក់បណ្តាញលូផ្លូវលេខ ២៨៧ នឹងដាក់លូឆ្លងកាត់ផ្លូវប្រសព្វជាមួយនឹងផ្លូវលេខ៦១៤ ក្នុងសង្កាត់បឹងកក់ទី១ ខណ្ឌទួលគោកទទួលបានជោគជ័យ ដោយគ្មានការរំខាន អាជ្ញាធររាជធានីភ្នំពេញ បានសម្រេចបិទការធ្វើចរាចរជាបណ្ដោះអាសន្ននៅផ្លូវលេខ ៦១៤ ចាប់ពីផ្លូវលេខ ២៨៧ ដល់ផ្លូវលេខ ៦០៨ ហើយការបិទផ្លូវធ្វើចរាចរនេះ នឹងធ្វើឡើងក្នុងរយៈពេល ១ខែ ចាប់ពីថ្ងៃទី២៨ ខែវិច្ឆិកា ដល់ថ្ងៃទី២៨ ខែធ្នូ ឆ្នាំ២០២០។ ដោយហេតុនេះ សូមបងប្អូនប្រជាពលរដ្ឋ មេត្តាយោគយល់និងអធ្យាស្រ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីរដ្ឋបាលរដ្ឋបាលរាជធានីភ្នំពេញ បានឲ្យដឹងថា ខណៈនេះ គឺក្រុមការងាររបស់ចៃការជប៉ុន បាននិងកំពុងដំណើរការ ការដ្ឋានដាក់បណ្តាញលូផ្លូវលេខ ២៨៧ នឹងដាក់លូឆ្លងកាត់ផ្លូវប្រសព្វជាមួយនឹងផ្លូវលេខ៦១៤ ក្នុងខណ្ឌទួលគោក ហើយដោយសារផ្លូវលេខ ២៨៧ មានទទឹងផ្លូវតូចចង្អៀត ការដ្ឋានបានសម្រេចបិទការធ្វើចរាចរជាបណ្ដោះអាសន្ននៅផ្លូវលេខ ៦១៤ ចាប់ពីផ្លូវលេខ ២៨៧ ដល់ផ្លូវលេខ ៦០៨ មានរយៈពេល ១ខែ ដោយចាប់ពីថ្ងៃទី២៨ ខែវិច្ឆិកា ដល់ថ្ងៃទី២៨ ខែធ្នូ ឆ្នាំ២០២០។

គួរបញ្ជាក់ថា គម្រោងការពារទឹកជំនន់ និងកែលំអប្រព័ន្ធប្រឡាយលូ ក្នុងរាជធានីភ្នំពេញ ជំហានទី៤នេះ មានទឹកប្រាក់សរុបប្រមាណ ៣០លានដុល្លារអាមេរិក ដែលជាជំនួយឥតសំណងរបស់រដ្ឋាភិបាលជប៉ុនតាមរយៈទីភ្នាក់ងារសហប្រតិបត្តិការអន្តរជាតិជប៉ុន JICA ។ គម្រោងនេះនឹងត្រូវអនុវត្តការដ្ឋាន ដូចខាងក្រោម ក្នុងនោះរួមមាន៖ ១. ដាក់បណ្តាញលូមេ នៅក្នុងភូមិសាស្ត្រខណ្ឌទួលគោក ប្រវែង ៨.២គីឡូម៉ែត្រ។ ២. ដាក់បណ្តាញលូមេ នៅក្នុងភូមិសាស្ត្រ ខណ្ឌដូនពេញ ប្រវែង ៤.៤គីឡូម៉ែត្រ។ ៣. សាងសង់អាងស្តុកទឹកក្រោមដី និងសាងសង់ស្ថានីយបូមទឹក នៅសួនច្បារមុខក្រុមប្រឹក្សាអភិវឌ្ឍន៍កម្ពុជា CDC។ ៤. តម្លើងរបាមេកានិចស្វ័យប្រវត្តិ ដើម្បីប្រមូលសំរាមនៅមុខផ្លូវបង្ហូរទឹក នៅស្ថានីយបូមទឹកចតុមុខ ព្រះគន្លង១ ព្រះគន្លង២ និងផ្សារចាស់។ ៥. ផ្តល់រថយន្តបូមទឹកចល័ត ចំនួន ២គ្រឿង៕

អត្ថបទ៖ ស្រីរ័ត្ន

សូមចុចអាន៖ សម្ដេច ស ខេង ណែនាំ ឱ្យក្រុមការងារខិតខំផ្សាភ្ជាប់ការងារនឹងជីវភាពរបស់ប្រជាពលរដ្ឋ