កូវីដ-១៩នៅភ្នំពេញធូរស្រាល ធ្វើឱ្យមណ្ឌលព្យាបាលថយចុះចំនួន ៦មណ្ឌល

គិតមកទល់នឹងពេលនេះ មណ្ឌលព្យាបាលជំងឺកូវីដ-១៩ នៅរាជធានីភ្នំពេញ ថយចុះចំនួន៦មណ្ឌល ពោលគឺនៅសល់ ១១មណ្ឌល ខណៈកាលពីមុនមានចំនួន ១៧មណ្ឌល។

លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានបញ្ជាក់ថា ការថយចុះចំនួនមណ្ឌលព្យាបាលជំងឺកូវីដ-១៩ នៅរាជធានីភ្នំពេញ ដោយសារហេតុផល៣យ៉ាង ដែលក្នុងនោះ ទី១ ការថយចុះនៃចំនួនអ្នកឆ្លង ទី២ អ្នកឆ្លងជំងឺកូវីដ-១៩ ស្ថិតក្នុងសភាពកម្រិតស្រាលបានសម្រាកព្យាបាលនៅតាមផ្ទះ និង ទី៣ អ្នកជំងឺដែលនៅតាមមណ្ឌល ត្រូវបានព្យាបាលជាសះស្បើយច្រើន។

លោក ម៉េត មាសភក្តី បានបញ្ជាក់បន្តថា សម្រាប់មណ្ឌលព្យាបាលដែលជាសាលារៀនចំនួន២កន្លែងដែលនៅសល់ក្នុងចំណោម ១១មណ្ឌលនោះ អាជ្ញាធរក៏បានត្រៀមរៀបចំបញ្ជូនអ្នកជំងឺ និងអ្នកធ្វើចត្តាឡីស័កចេញពីសាលាទាំង២នេះទៅទីតាំងផ្សេង ដើម្បីត្រៀមសម្រាប់ការបើកដំណើរការសាលារៀនឡើងវិញផងដែរ។

គួរបញ្ជាក់ថា ដ្បិតតែរាជធានីភ្នំពេញ កំពុងស្ថិតក្រោមការថយចុះនៃការឆ្លងជំងឺកូវីដ-១៩ ដែលធ្វើឱ្យមានការថយចុះកន្លែងព្យាបាលក៏ពិតមែន ប៉ុន្តែការរៀបចំត្រៀមឱ្យមានមន្ទីរព្យាបាលកូវីដ-១៩ សម្រាប់ខេត្តជាប់ព្រំដែននៅតែមាន ហើយកាលពីពេលថ្មីៗនេះ មន្ទីរព្យាបាលអ្នកជំងឺកម្រិតធ្ងន់ថ្នាក់តំបន់នៅខេត្តសៀមរាប ដែលមានចំនួន ៤០០គ្រែ ត្រូវបានរៀបចំឡើង។ មន្ទីរព្យាបាលកម្រិតធ្ងន់នេះគឺជាមន្ទីរព្យាបាលខ្នាតស្តង់ដារខ្ពស់សម្រាប់ថ្នាក់តំបន់ ក្នុងនោះអ្នកជំងឺកូវីដ-១៩ ដែលត្រូវបញ្ជូនមកទទួលការព្យបាល រួមមានខេត្តសៀមរាប កំពង់ធំ ព្រះវិហារ ឧត្តរមានជ័យ និងខេត្តបន្ទាយមានជ័យ។

គិតត្រឹមថ្ងៃទី០៨ ខែកញ្ញានេះ កម្ពុជាមានអ្នកឆ្លងជំងឺកូវីដសរុបជាង៩ម៉ឺននាក់។ ក្នុងនោះនៅសល់អ្នកជំងឺប្រមាណជិត៥ពាន់នាក់ កំពុងសម្រាកព្យាបាលនៅតាមមណ្ឌល មន្ទីរពេទ្យ និងតាមផ្ទះនៅទូទាំងប្រទេស៕

អត្ថបទ៖ ពុធិកា