អភិបាលក្រុង៖ ម៉ោងនេះ​ស្ថានភាពទឹកជន់លិចនៅតាខ្មៅ​​មានភាព​ធូរស្រាល

អភិបាលក្រុងតាខ្មៅតាខ្មៅ លោក នូ សុវណ្ណរ៉ា បានប្រាប់កម្ពុជាថ្មី នៅរសៀលថ្ងៃទី ៨ ខែកញ្ញា នេះ​ថា មក​ដល់ ម៉ោង ជាង ១២ ថ្ងៃត្រង់នេះ ស្ថានភាពទឹកដែលជន់លិចតំបន់មួយចំនួន ក្នុង​ក្រុង​តាខ្មៅ មាន​ភាពធូស្បើយ។

ភ្លៀងធ្លាក់ច្រើនថ្ងៃជាប់ៗគ្នា បានធ្វើឱ្យតំបន់មួយចំនួន ក្នុងក្រុងតាខ្មៅ ខេត្តកណ្ដាលរងការជន់លិច ជាពិសេសផ្លូវលេខ ២១B ជិតរង្វង់មូលតាខ្មៅ។

មន្ទីរសាធារណការ ខេត្តកណ្ដាល នៅថ្ងៃទី ៧ កញ្ញា ឆ្នាំ ២០២១ បានប្រកាសបិទការធ្វើដំណើរចំពោះរថយន្ត​ដឹកទំនិញធុនធ្ងន់ តាមផ្លូវលេខ ២០១ ២០៩ ១០៨ ១០៩ ១១០ និងកំណាត់ផ្លូវលេខ ២១ រយៈពេលជាង ១ សប្តាហ៍ ចាប់ពីថ្ងៃទី ៧ ដល់ថ្ងៃទី ១៥ ខែកញ្ញា ដោយសារស្ថានភាពជំនន់ទឹកភ្លៀងកំពុងជន់លិចភូមិមួយចំនួន ក្នុងក្រុងតាខ្មៅ និងបញ្ចៀសការខូចផ្លូវ។

លោក នូ សុវណ្ណរ៉ា បញ្ជាក់ថា ដោយសារកម្រិតទឹកភ្លៀងធ្លាក់ច្រើន ដូចជាថ្ងៃម្សិលមិញនេះ កម្រិត​ទឹកភ្លៀងប្រមាណ ១០០ មម ព្រមទាំងភ្លៀងធ្លាក់បន្តទៀត ខណៈប្រព័ន្ធរំដោះទឹក មិនអាចរំដោះ​ទាន់។

លោក គង់ សោភ័ណ្ឌ អភិបាលខេត្តកណ្ដាល បានណែនាំដល់មន្ត្រីជំនាញ អាជ្ញាធរក្រុងតាខ្មៅ ពិសេសមន្ទីរសាធារណ:ការ និងដឹកជញ្ជូនខេត្ត ត្រូវចុះស្ដារប្រព័ន្ធលូទាំងអស់ ដែលធ្វើឲ្យ​កកស្ទះចរន្តបង្ហូរទឹក បណ្ដាលឱ្យជន់លិចតំបន់មួយចំនួន ពិសេសកំណាត់ផ្លូវជាតិលេខ២១B ដែលជាផ្លូវមានសារៈសំខាន់ សម្រាប់​ខេត្តកណ្ដាល ក៏ដូចជា ក្រុងតាខ្មៅទាំងមូលផងដែរ។

ជាងនេះទៀត គ្រប់ស្ថានីយបូមទឹកទាំងអស់ ត្រូវដំណើរការបូមទឹក ដើម្បីរំដោះទឹក ក្នុងក្រុងតាខ្មៅ៕