ព័ត៌មានជាតិ

ផ្លូវជាតិ ៣ ខ្សែនឹងបើកការដ្ឋានសាងសង់មុនគេនៅដើមឆ្នាំ២០២២

បានផុស

៤ years មុន

នៅ

ថ្ងៃព្រហស្បតិ៍ ៩ កញ្ញា ២០២១

ដោយ

ផ្លូវជាតិចំនួន ៣ ខ្សែ នឹងជាអាទិភាពសម្រាប់ការបើកការដ្ឋានសាងសង់នៅដើមឆ្នាំ ២០២២។

ឯកឧត្តមស៊ុន ចាន់ថុល រដ្ឋមន្រ្តីក្រសួងសាធារណការនិងដឹកជញ្ជូនបានថ្លែងក្នុងកម្មវិធី MPWT LIVE SHOW នាថ្ងៃ៣០ សីហា ២០២១ ឆ្លើយតបសំណួររបស់បងប្អូនប្រជាពលរដ្ឋថា រដ្ឋាភិបាលបានផ្តល់អាទិភាព ក្នុងបើកការដ្ឋានស្តារពង្រីកនិងលើកកម្រិតផ្លូវជាតិចំនួន ០៣ ខ្សែនៅដើមឆ្នាំ២០២២។ ផ្លូវជាតិទាំង ៣ ខ្សែ ដែលនឹងត្រូវបើកការដ្ឋានសាងសង់មុនគេមានផ្លូវជាតិលេខ ៤១ ដែលតភ្ជាប់ពីផ្លូវជាតិលេខ ៤ មកលេខ ៣ ចាប់ពីចំណុចប្រសព្វថ្នល់ទទឹងក្នុងខេត្តកំពង់ស្ពឺដល់ស្រុកជុំគិរី ខេត្តកំពត ប្រវែងជិត១០០គីឡូម៉ែត្រ។ ផ្លូវជាតិលេខ ៣១ ពីបែកគូស ទៅកំពង់ត្រាច និងផ្លូវជាតិលេខ ៣៣ ពីកែបមកកំពង់ត្រាច។

បើតាមលោករដ្ឋមន្ត្រី ការផ្តល់អាទិភាពក្នុងការស្តារនិងលើកកម្ពស់ផ្លូវជាតិទាំង ៣ ខ្សែនេះមុនផ្លូវផ្សេងៗទៀត ដោយសារតែរដ្ឋាភិបាលកំណត់គោលដៅអភិវឌ្ឍតំបន់ឆ្នេរ ជាតំបន់សេដ្ឋកិច្ចពិសេស ត្រូវតែមានផ្លូវតភ្ជាប់ពីកែប កំពត ខេត្តព្រះសីហនុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រៅពីផ្លូវជាតិទាំង ៣ ខ្សែ គម្រោងការស្តារផ្លូវជាតិពីស្គន់ទៅកំពង់ចាមក៏ជាផ្លូវអាទិភាពក្នុងការបើកការដ្ឋានសាងសង់ទន្ទឹមគ្នានេះដែរ។ គម្រោងស្ថាបនាផ្លូវពីស្គន់ទៅកំពង់ចាម មានការឯកភាពពីរដ្ឋាភិបាលនិងប្រទេសចិនក្នុងការផ្តល់ថវិកាសម្រាប់ការស្ថាបនា។

រដ្ឋាភិបាលបានចាយថវិការយលានដុល្លារអាទិភាពលើការស្តារ និងជួសជុលផ្លូវជាតិទូទាំងប្រទេស ដើម្បីជំរុញកំណើនសេដ្ឋកិច្ច និងលើកកម្ពស់ដល់ជីវភាពរស់នៅរបស់ប្រជាពលរដ្ឋ។ បច្ចប្បន្ននេះ មានផ្លូវជាតិជាច្រើនខ្សែកំពុងសាងសង់ រួមទាំងផ្លូវក្រវាត់ក្រុង ផ្លូវល្បឿនលឿននិងមានការសិក្សាសាងសង់ផ្លូវស្ពានជាច្រើនទៀត ដើម្បីជាបណ្ដាញគមនាគមន៍តភ្ជាប់នៅក្នុងប្រទេស និងជាមួយប្រទេសជិតខាង។

នៅក្រុងព្រះសីហនុជាគោលដៅទេសចរណ៍ និងសេដ្ឋកិច្ចដ៏សំខាន់របស់កម្ពុជានៅភាគនិរតី រាជរដ្ឋាភិបាលបានទម្លាក់កញ្ចប់ថវិកាជាតិរហូតដល់ទៅប្រមាណជា ៣០០លានដុល្លារអាមេរិក ដើម្បីសាងសង់ផ្លូវធំតូចចំនួន៣៤ខ្សែ មានប្រវែងសរុប ៨២.១៤៥គីឡូម៉ែត្រ ក្នុងគោលដៅប្រែក្លាយក្រុងព្រះសីហនុ ក្នុងចក្ខុវិស័យឆ្នាំ២០៣០ គឺរៀបចំ និងអភិវឌ្ឍខេត្តព្រះសីហនុ ជាប៉ូលអភិវឌ្ឍជាតិប្រកបដោយចីរភាពនៅតំបន់ឆ្នេរសមុទ្រកម្ពុជា តាមរយៈការអភិវឌ្ឍទីក្រុងទំនើប រមណីយដ្ឋានឆ្នេរសមុទ្រដែលស្អាតបំផុតលើសកលលោក និងជាតំបន់សេដ្ឋកិច្ចពិសេសគំរូពហុបំណង ច្រកចេញចូលអន្តរជាតិ មជ្ឈមណ្ឌលកំណើនជាតិ មជ្ឈមណ្ឌលភស្តុភារកម្មជាតិ ដោយមានទំនាក់ទំនងជាមួយទីផ្សារអាស៊ាន និងទីផ្សារសកលលោក និងជាមជ្ឈមណ្ឌលឧស្សាហកម្ម ផលិតកម្មបែបបច្ចេកវិទ្យាទំនើប ដែលមានសុខដុមនីយកម្មជាមួយនឹងបរិស្ថានរស់នៅល្អប្រសើរ។

ដោយឡែកនៅខេត្តសៀមរាប រាជរដ្ឋាភិបាលបានកំណត់ជាតំបន់ស្នូលនៃប៉ូលអភិវឌ្ឍជាតិ ជាគោលដៅទេសចរណ៍វប្បធម៌ប្រវត្តិសាស្រ្ត និងធម្មជាតិ រៀបចំអភិវឌ្ឍទីក្រុងឆ្លាតវៃ (Smart City) ជាមួយគម្រោងស្ថាបនាផ្លូវ៣៨ខ្សែ មានប្រវែងសរុប ១០៨.៧៤គីឡូម៉ែត្រ ប្រើប្រាស់ថវិកាជាតិសរុបប្រមាណ ១៤០លានធ្វើឲ្យទីក្រុងសៀមរាប ប្រែក្លាយរូបរាងជាទីក្រុងទំនើប និងទេសចរណ៍ ដ៏មានសក្តានុពល។ គម្រោងស្ថាបនាផ្លូវទាំង ៣៨ ខ្សែ បង្កើតជាហេដ្ឋារចនាសម្ព័ន្ធប្រទាក់ក្រឡាគ្នា តភ្ជាប់ទីប្រជុំជន ទៅជាយក្រុង និងតភ្ជាប់ទៅកាន់តំបន់ទេសចរណ៍សំខាន់ៗ និងបណ្តាញខ្សែផ្លូវជាតិនានា ហើយគ្រោងបញ្ចប់នៅចុងឆ្នាំ២០២១ នេះ៕

អត្ថបទ៖ ប៊ុណ្ណារ៉ា