ព័ត៌មានជាតិ

ប្រធានមន្ទីរកសិកម្ម ៖ មន្ត្រីរដ្ឋបាលជលផល ត្រូវសហការជាមួយសមត្ថកិច្ចគ្រប់ស្ថាប័នជាពិសេសអ្នកសារព័ត៌មាន ដើម្បីលុបបំបាត់បទល្មើសនេសាទក្នុងរដូវបិទ

បានផុស

៣ years មុន

នៅ

ថ្ងៃសុក្រ ១០ កញ្ញា ២០២១

ដោយ

កំពង់ធំ ៖ លោក ប៉ែន វណ្ណរិទ្ធ ប្រធានមន្ទីរកសិកម្មរុក្ខាប្រមាញ់ និង នេសាទ ខេត្តកំពង់ធំ បាន ជំរុញឲ្យមន្ត្រីរដ្ឋបាលជលផល សង្កាត់ពាមបាង ចុះបង្ក្រាបបទល្មើសនេសាទ ខុសច្បាប់ ក្នុងរដូវ ត្រីពងកូន និង អនុវត្ត តាមសេចក្តីប្រកាសរបស់ក្រសួងកសិកម្មរុក្ខាប្រមាញ់ និង នេសាទ។

ជាក់ស្តែង មន្ត្រីនៃសង្កាត់រដ្ឋបាលជលផលពាមបាង បានដឹកនាំកម្លាំងបង្ក្រាបបទល្មើសនេសាទ ខុសច្បាប់ក្នុងរដូវបិទនេសាទ នៅថ្ងៃទី១០ ខែកញ្ញា ឆ្នាំ២០២១ ដោយយោងលិខិតលេខ១៣១៦មកសិខលបបចុះថ្ងៃទី៣០ ខែសីហា ឆ្នាំ២០២១ របស់ប្រធានមន្ទីរកសិកម្មរុក្ខាប្រមាញ់និងនេសាទ ខេត្តកំពង់ធំ សហការជាមួយសហគមន៍នេសាទភូមិដួនស្តើង បានចុះទប់ស្កាត់បង្ក្រាបបទល្មើសជលផលនៅចំណុចខ្វែងតាសូនិងចំណុចផ្លូវទូកស្ថិតក្នុងភូមិសាស្ត្រឃុំពាមបាងស្រុកស្ទោង ខេត្តកំពង់ធំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហុក មន នាយរងសង្កាត់រដ្ឋបាលពាមបាង បានឲ្យដឹងពីលទ្ធផលដែលទទួលបានពី ការបង្ក្រាប គឺបានរុះរើកាប់បំផ្លាញចោលឧបករណ៍នេសាទ មានរបាំងសាច់អួននៅនឹងកន្លែងរួមមាន២ករណី របាំសាច់អួនចំនួន ០៤ របាំងប្រវែង ៥៥០ម៉ែត្រ លូសាច់អួនចំនួន ០៧ មាត់ឡុកសាច់អួនចំនួន ០៥ គ្រឿង បង្គោលឈើ ចំនួន ៤០០ ដើម ចាក់ប្រលែងត្រីចូលបឹងទម្ងន់ ១៥គីឡូក្រាម។

ប្រជាពលរដ្ឋ បានសម្តែងនូវ សេចក្ដីត្រេកអរ នូវចំណាត់ការដ៏ តឹងរ៉ឹងរបស់ប្រធានមន្ទីរកសិកម្មខេត្តកំពង់ធំ ដែលបានយកចិត្តទុកដាក់មកលើ កិច្ចការ ការពារ ធនធានមច្ឆាជាតិ លុបបំបាត់ ការដាក់បទល្មើសនេសាទ ដោយខុសច្បាប់ ជាពិសេស ក្នុងរដូវហាមឃាត់ ដើម្បីឲ្យត្រីពងកូន។

លោក ប៉ែន វណ្ណ រិទ្ធ ប្រធានមន្ទីរកសិកម្មខេត្តបានមានប្រសាសន៍ថា លោកមិនអនុញ្ញាតិឲ្យមន្ត្រីជលផលណាពាក់ព័ន្ធនឹងការនេសាទដោយខុសច្បាប់ឡើយ មន្ត្រីជលផល ត្រូវសហការ ជា មួយសមត្ថកិច្ច ជាពិសេសអ្នកសារព័ត៌មាន ដើម្បីចូលរួមបង្ក្រាប បទល្មើស នេសាទ និងសូម អគុណ ចំពោះ អ្នកសារព័ត៌មាន ដែលបានផ្តល់ព័ត៌មានពីទីតាំងដែលមានបទល្មើស និងឲ្យមានកិច្ចសហការគ្នាល្អបែបជារៀងរហូត៕

ដោយ ៖ ប៊ុន រដ្ឋា