ព័ត៌មានជាតិ

កសិករម្នាក់បានទៅសិក្សាពីវិធីដាំទំពាំងឫស្សីបារាំងទម្លាយប្រវត្តិរបស់ដំណាំ១នេះខណៈដំណាំផ្តល់សេដ្ឋកិច្ចគ្រួសាររបស់គាត់យ៉ាងប្រសើរ

បានផុស

៤ years មុន

នៅ

ថ្ងៃសៅរ៍ ១១ កញ្ញា ២០២១

ដោយ

ប្រភេទដំណាំម្យ៉ាងមានឈ្មោះថាទំពាំងឫស្សីបារាំងត្រូវបានប្រជាកសិករចំនួនតូចយកមកប្រកបជាមុខរបរដើម្បីដោះស្រាយជីវភាពគ្រួសាររបស់ពួកគាត់ឱ្យកាន់តែមានភាពប្រសើឡើងខណៈទីផ្សារដំណាំនេះក៏ពុំសូវជួបផលលំបាកប៉ុន្មាននោះទេហើយក៏ពុំសូវមានប្រជាកសិករធ្វើការដាំដុះច្រើនដែរនៅក្នុងខេត្តបាត់ដំបង ព្រោះមិនសូវហុចផលល្អ បើគ្មានបច្ចេកទេសក្នុងការដាំដំណាំមួយនេះ។

លោក ស៊ូ ប៊ុន្នី ជាកសិករប្រកបរបរដាំដំណាំប្រភេទទំពាំងឫស្សីបារាំងនេះបានផ្តល់បទសម្ភាសឱ្យកម្ពុជាថ្មីនៅថ្ងៃទី១០ ខែកញ្ញានេះថាបច្ចុប្បន្នលោកបានដាំដំណាំនេះលើទំហំដី២ហិកតាដោយភាពជោគជ័យ ក្រោយពីបានឆ្លងកាត់ជំហានដំបូង ដោយបរាជ័យក្នុងការដាំដុះ។

លោកបន្តថា ការបរាជ័យជំហានដំបូងក្នុងការដាំដុះបន្លែប្រភេទទំពាំងឫស្សីបារាំងនេះក្រោយពីលោកបានចូលនិវត្តន៍ពីស្ថាប័ននគរបាលជាតិក្នុងវ័យ៥៤ឆ្នាំកាលពីឆ្នាំ២០០០មកលោកក៏ចាប់ផ្តើមប្រកបមុខរបរនេះដោយជំហានដំបូងប្រកបលើទំហំដី២ហិកតាដដែលដោយដាំតាមបែបធម្មជាតិក៏បរាជ័យតែម្តង ដោយហុចផលតិចតូចបំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថា ក្រោយពីមានភាពបរាជ័យលោកក៏បានទៅរៀនបច្ចេកទេសនៅប្រទេសថៃតែលោកមិនចាំថាលោកដាំបានប៉ុន្មានឆ្នាំមកហើយនោះទេរហូតដល់បច្ចុប្បន្ននេះលោកគ្រាន់តែចាំថាពេលលោកវិលពីសិក្សាពីប្រទេសថៃហើយចាប់ផ្តើមដាំក្នុងជំហ៊ានទី២កាលណោះស្របពេលដែលថៃបង្កើតគណះបក្សអាវលឿង និងក្រហមប្រឈមដាក់គ្នាទើបលោកទទួលបានជោគជ័យឡើងវិញហើយបានផ្តល់ផលប្រយោជន៍ដល់គ្រួសារលោកបានល្អប្រសើររហូតដល់បច្ចប្បន្នខណៈលោកដាំវាតាមបច្ចេកទេសផ្សាំ។

លោកថា ក្រោយពីលោកបានទៅរៀនអំពីបច្ចេកទេសផ្សាំដំណាំខាងលើនេះក៏បានហុចផលដូចការគិតហើយលោកក៏បានប្រាប់អំពីប្រវត្តិទំពាំងឫស្សីបារាំងនេះថា ដំណាំប្រភេទទំពាំងឫស្សីបារាំងនេះមានប្រវត្តិដុះនៅក្នុងស្រុកខ្មែរគេហៅឈ្មោះថា(ស្ពាធ)ដោយសារដើមទំពាំង(ស្ពាធ)វាតូចកាលណោះប្រជាកសិករខ្មែរយើងដាំនៅខេត្តកំពង់ចាមនិងផ្តុំបឹងកក់រាជធានីភ្នំពេញគេចងជាបាច់លាយជាមួយផ្កាវាយកទៅលក់លើទីផ្សារ នេះបើតាមលោកចាំ។តែបច្ចុប្បន្នលោកបានយកពូជដែលមានដើមកំណើតនៅប្រទេសអូស្ត្រាលីតាមរយះកសិករថៃនាំយកមកផ្សាំដាំនៅក្នុងតំបន់ត្រូពិចនៃប្រទេសថៃទើបវាហុចផលបានល្អ ហើយដើមទំពាំងក៏ធំល្អបែបនេះ។

លោកបន្តថាបច្ចុប្បន្នលោកប្រមូលផលតម្រូវតាមទីផ្សារក្នុង១ថ្ងៃ១រយគីឡូក្រាមហើយតម្លៃក្នុង១គីឡូក្រាម១២០០០រៀលខណៈការលក់ចេញលោកបានរៀបចំវិចខ្ចប់តាមស្ទង់ដាដើម្បីផ្ញើឱ្យអតិថិជននៅតាមបណ្តាខេត្តផ្សេងខណៈចំនួនប្រមូលផលតម្រូវទីផ្សារបានថយចុះខ្លាំងបើធៀបកាលពីមិនទាន់ផ្ទុះជំងឺកូវីដ១៩។

លោកបញ្ជាក់ថាដំណាំប្រភេទនេះបាប់ផ្តើមពីការដាំដំបូងប្រើរយៈពេលពី៣ទៅ៦ខែទើបបានប្រមូលផលរាល់ថ្ងៃរហូតដល់ទៅ២០ឆ្នាំសម្រាប់អ្នកដាំតាមបច្ចេកទេសផ្សាំតែបើដាំធម្មតាប្រមូលផលបានត្រឹម១០ឆ្នាំប៉ុណ្ណោះ។ ស្របតាមការលើកឡើងរបស់លោកស៊ូ ប៊ុន្នី ខាងលើលោកស្រី(សុខា)រស់នៅក្នុងភូមិអូរល្មូនឃុំឃ្លាំងមាស ស្រុករតនៈមណ្ឌលនៃខេត្តបាត់ដំបងជាអ្នកប្រកបមុខរបរដាំដំណាំប្រភេទទំពាំងបារាំងនេះរយៈពេល២ឆ្នាំមកហើយលើទំហំដី២ហិកតាដូចគ្នាតែពុំសូវបានផលល្អ បើទោះបីទីផ្សារធំទូលាយក៏ដោយចុះដោយសាតែលោកស្រីនិងគ្រួសារដាំតាមបែបធម្មតាមិនបានរៀនអំពីបច្ចេកទេសក្នុងការផ្សាំដាំនោះទេទើបទទួលបានទិន្នផលតិចតូចដោយក្នុង១ថ្ងៃប្រមូលផលបានត្រឹម៣០គីឡូក្រាមប៉ុណ្ណោះរីឯតម្លៃក៏បានតិចដែរដោយក្នុង១គីឡូក្រាមបានត្រឹម១ម៉ឺនរៀលចុះប៉ុណ្ណោះ។

លោកស្រីបន្តថា បើទោះបីទិន្នផលហុចឱ្យបែបនេះក៏សេដ្ឋកិច្ចគ្រួសារលោកស្រីបានប្រសើជាងមុនផងដែរដោយតម្លៃនេះលោកស្រីថាមានម៉ូយគេមកយកដល់ចម្ការតែម្តងមិនចាំបាច់លក់លើទីផ្សារដោយផ្ទាល់នោះឡើយ។ លោកស្រីបញ្ជាក់ប្រហាក់ប្រហែលនឹងការលើកឡើងរបស់ម្ចាស់ចម្ការខាងលើឈ្មោះស៊ូ ប៊ុន្នីផងដែរថា មុខរបរដាំដំណាំប្រភេទទំពាំងបារាំងនេះគឺត្រូវការបណ្ដុះកូនរយៈពេលបីខែជាមុនសិនទើបយកមកដាំហើយដោយការដាំប្រើពេលយូរជាងដំណាំរួមផ្សំផ្សេងៗគឺពីបីខែឬជាងបីខែបន្ថែមលើរយៈពេលបណ្តុះដោយសរុបរយះពេលប្រមូលផលរហូតដល់ជាង៦ខែទើបចាប់ផ្ដើមអោយផលជាហូរហែបន្តបន្ទាប់រហូតដល់១០ឆ្នាំ។

លោកស្រីបន្តថា បើទោះបីបែបណាមុខរបរ១នេះក្រុមគ្រួសារលោកស្រីនៅតែបន្តហើយលោកស្រីនិងព្យាយាមរកអ្នកជំនាញដើម្បីសិក្សានិងផ្តល់យោបល់បំពេញបន្ថែមអំពីបច្ចេកទេសថ្មីក្នុងការដាំដុះឱ្យបានសម្រេចនិងផ្តល់ផលល្អដូចអ្នកដែលដាំតាមបច្ចេកទេសផងដែរនាថ្ងៃខាងមុខ។

ពាក់ព័ន្ធនិងដំណាំប្រភេទខាងលើលោក ឈឹម វិច្ឆរ៉ាប្រធានមន្ទីរកសិកម្មខេត្តបាត់ដំបងបានជំរុញឱ្យមន្ត្រីក្រោមឱ្យវាទក្នុងមូលដ្ឋានជួយធ្វើយ៉ាងណាកុំឱ្យប្រជាកសិករដែលប្រកបរបរនេះជួបផលប៉ះពាល់ណាមួយទៅលើដើមដាំណាំប្រភេទនេះក្នុងគោលបំណងលើកទឹកចិត្តដល់ពួកគាត់បន្តមុខរបរនេះឱ្យបានជោគជ័យរីកចំរើនសេដ្ឋកិច្ចគ្រួសាររបស់ពួកគាត់ទាំងបច្ចុប្បន្ន និងអនាគត។

បើយោងតាមមន្ត្រីកសិកម្មក្នុងស្រុករតនៈមណ្ឌលបានបង្ហាញរបាយការណ៍នៅថ្ងៃទី១០ខែកញ្ញានេះថាក្នុងស្រុករតនៈមណ្ឌលមានប្រជាកសិករប្រកបរបរដាំដំណាំប្រភេទទំពាំងឫស្សីបារាំងនេះលើផ្ទៃដីសរុប៨ហិកតាក្នុងនោះឋិតក្នុងភូមិអូរល្មូនឃុំផ្លូវមាសចំនួន៤ហិកតានិងក្នុងភូមិតាគ្រក់ឃុំត្រែងចំនួន៤ហិកតាសរុប៨ហិកតា៕

អត្ថបទ៖ សៅ សារិទ្ធ