ព័ត៌មានជាតិ

អាជ្ញាធរខេត្តសៀមរាប សម្រេចបិទក្រុងសៀមរាប រយៈពេលមួយសប្តាហ៍ បន្ទាប់ពីរកឃើញ មានការឆ្លងរាលដាលមេរោគកូវីដ១៩ខ្លាំង

បានផុស

៣ years មុន

នៅ

ថ្ងៃសៅរ៍ ១១ កញ្ញា ២០២១

ដោយ

Kang Tola

អាជ្ញាធរខេត្តសៀមរាប សម្រេចបិទក្រុងសៀមរាប រយៈពេលមួយសប្តាហ៍ បន្ទាប់ពីរកឃើញ មានការឆ្លងរាលដាលមេរោគកូវីដ១៩ខ្លាំង

រសៀលនេះ អភិបាលខេត្តសៀមរាប លោក ទៀ សីហា សម្រេចបិទក្រុងសៀមរាបមួយសប្ដាហ៍ ឬ៧ថ្ងៃ ក្នុងបំណងដើម្បីកាត់ផ្ដាច់ការចម្លងជំងឺកូវីដ-១៩ ក្នុងសហគមន៍ ខណៈដែលបច្ចុប្បន្នតួលេខអ្នកឆ្លងក្នុងក្រុងហាក់មានការកើនឡើងមិនស្រាកស្រាន្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបញ្ជាក់ថា ប្រសិនបើការបិទបណ្ដោះអាសន្ន៧ថ្ងៃនេះ មានការធូរស្រាល និងអាចរកឃើញអ្នកជំងឺកូវីដ-១៩ បានទាន់ពេលវេលានោះ អ្វីៗនឹងល្អប្រសើរវិញ។

លោកមានប្រសាសន៍ថា «ការបិទនេះ មិនមែនធ្វើបាបបងប្អូនប្រជាពលរដ្ឋទេ តែគ្រាន់ថា ជាការចាំបាច់ ត្រូវកាត់ផ្ដាច់ប្រភពចម្លង សូមឲ្យប្រជាពលរដ្ឋ អត់ធ្មត់ក្នុងរយៈពេល៧ថ្ងៃ ដើម្បីចូលរួមជាមួយគ្នា»។

លោកអភិបាលខេត្តបន្ថែមថា វិធានការនេះធ្វើឡើងក៏ដោយសារការសង្កេតឃើញថា ក្រុងសៀមរាប ពិសេសបណ្ដាស្រុកជុំវិញស្ថិតនៅតាមបណ្ដោយផ្លូវជាតិលេខ៦ មានករណីផ្ទុះការឆ្លងជំងឺកូវីដ-១៩ ជាបន្តបន្ទាប់មិនស្រាកស្រាន្តសោះនារយៈពេលចុងក្រោយនេះ។ ពិសេសនោះគឺប្រជាពលរដ្ឋ និងអាជីវករមួយចំនួន នៅមិនទាន់ចូលរួមអនុវត្តវិធានការសុខាភិបាល ក៏ដូចជាការណែនាំរបស់រដ្ឋបាលខេត្ត គឺនៅតែមានការជួបជុំ និងលក់គ្រឿងស្រវឹងជាដដែល។

លោកបញ្ជាក់ថា អាជ្ញាធរនឹងចុះទៅទីប្រជុំជន និងតាមទីផ្សារ ដើម្បីពិនិត្យស្ថានភាពជាក់ស្ដែង ហើយនឹងឈានដល់ការផាកពិន័យតែម្ដង។

សូមបញ្ជាក់ថា រដ្ឋបាលខេត្តសៀមរាបនិងចេញលិខិតផ្លូវការជុំវិញករណីបិទខ្ទប់ក្រុងសៀមរាប ដាក់ជាតំបន់លឿងទុំ។

លោកអភិបាលស្នើសុំឱ្យពលរដ្ឋកុំស្លន់ស្លោ ព្រោះថាទីផ្សារនៅតែបើកជាធម្មតា លោកអភិបាល ក៏ទទូចឲ្យពលរដ្ឋចូលរួម និងសហការដើម្បីឲ្យការងារនេះសម្រេចបានជាផ្លែផ្កាទាំងអស់គ្នា ក៏ដូចជាដើម្បីឲ្យស្ថានការណ៍វិលត្រឡប់មករកសភាពដើមវិញ៕

ដោយ ៖ គឿនវេត