ពន្ធនាគារខេត្តកណ្ដាលធ្លាប់ផ្ទុះជំងឺកូវីដ-១៩ តើបច្ចុប្បន្នមានស្ថានភាពដូចម្ដេច?

បន្ទាប់ពីមានការផ្ទុះជំងឺកូវីដ-១៩ ចូលសហគមន៍ លើកទី៣ ក្នុងព្រឹត្តិការណ៍ ២០ កុម្ភៈ ជំងឺកូវីដ-១៩ បានឆ្លងរាលដាលរហូតចូលទៅក្នុងពន្ធនាគារតាមបណ្ដាខេត្តមួយចំនួន។ ក្នុងនោះ ពន្ធនាគារខេត្តកណ្ដាល ក៏មានករណីផ្ទុះខ្លាំងផងដែរ។

លោក ចាត ស៊ីនាង ប្រធានពន្ធនាគារខេត្តកណ្ដាល មានប្រសាសន៍ប្រាប់ “កម្ពុជាថ្មី” នៅថ្ងៃនេះថា មកដល់ពេលនេះស្ថានភាពឆ្លងជំងឺកូវីដ-១៩ នៅខេត្តកណ្ដាលខុសពីមុន ដោយមិនមានករណីឆ្លងខ្លាំងទៀតទេ។

លោក ចាត ស៊ីនាង មានប្រសាសន៍ថា៖ “អ្នកដែលឆ្លងជំងឺកូវីដ-១៩ពីមុនហ្នឹង បានជាសះស្បើយអស់ហើយ។ ឥឡូវធម្មតាតែអ្នកទោសចូលថ្មី យើងយកសំណាកធ្វើតេស្តរកមេរោគកូវីដ-១៩ហើយ។ បើរកឃើញមានវិជ្ជមានកូវីដ យើងយកពួកគាត់ដាក់បន្ទប់ដាច់ដោយឡែក”។

លោក មានប្រសាសន៍បន្តថា៖ “ បន្ទាប់ពីមានករណីឆ្លងក្នុងពន្ធនាគារនោះមក យើងកាន់តែរឹតបន្តឹងវិធានការ និងប្រុងប្រយ័ត្ន គឺនៅពេលសមត្ថកិច្ចចាប់ជនល្មើសមក ហើយបើពិនិត្យទៅឃើញកូវីដ ក៏ពន្ធនាគារមានបន្ទប់សម្រាប់ឃុំអ្នកមានជំងឺកូវីដនៅដាច់ដោយឡែក និងព្យាបាលពួកគេ”។

ប្រធានពន្ធនាគារខេត្តកណ្ដាល មានប្រសាសន៍បន្ថែមថា ចំពោះការចាក់វ៉ាក់សាំងនៅពន្ធនាគារខេត្តកណ្ដាល បានអនុវត្តបានគ្រប់ចំនួនកំណត់ហើយ ទាំងមន្ត្រី ទាំងអ្នកជាប់ទោស។

លោក ចាត ស៊ីនាង មានប្រសាសន៍ថា៖ “មន្ត្រីពន្ធនាគារបានចាក់វ៉ាក់សាំងដូសទី៣ បាន១០០ភាគរយហើយ។ នៅមួយចំនួនអត់បានចាក់ ដោយសារពួកគាត់ទាំងនោះបានឆ្លង និងព្យាបាលជំងឺីកូវីដ១៩ រួចហើយ​”។

លោក មានប្រសាសន៍បញ្ជាក់ថា៖ “ចំណែកអ្នកទោសបានចាក់វ៉ាក់សាំងលើកទី២រួចហើយ។ យើងមិនទាន់ទទួលដំណឹងថា អ្នកទោសត្រូវចាក់ដូសទី៣ ឬយ៉ាងណាទេ ព្រោះពួកគាត់ចាក់វ៉ាក់សាំង អាស្ត្រាសេនីកា អ៊ីចឹងអត់ទាន់ចេញគោលការណ៍ចាក់ដូសទី៣ទេ។ ប្រសិនជាមានការចាក់ នោះខាងអគ្គនាយកដ្ឋានភស្តុភារ នៃក្រសួងមហាផ្ទៃនឹងផ្ដល់ដំណឹងមកតាមអគ្គពន្ធនាគារ ហើយនឹងពិគ្រោះជាមួយពេទ្យ”។

គួរបញ្ជាក់ថា បច្ចុប្បន្នអ្នកទោសនៅពន្ធនាគារខេត្តកណ្ដាល មានចំនួនសរុបជាង ២,៨០០នាក់៕

អត្ថបទ៖ ច័ន្ទ វីរៈ