ព័ត៌មានជាតិ

មន្ត្រីជំនាញកម្ពុជា និងអង្គការWHOកំពុងសិក្សារកមូលហេតុនាំឱ្យអត្រាឆ្លងជំងឺគ្រុនឈាមធ្លាក់ចុះ

បានផុស

៣ years មុន

នៅ

ថ្ងៃចន្ទ ១៣ កញ្ញា ២០២១

ដោយ

មន្ត្រីជំនាញកម្ពុជា និងអង្គការសុខភាពពិភពលោក(WHO)កំពុងធ្វើការសិក្សាស្រាវជ្រាវរកមូលហេតុថា តើហេតុអ្វីបានជាអត្រាឆ្លងជំងឺគ្រុនឈាមធ្លាក់ចុះខ្លាំងរហូតដល់ជាង៦ដងបើប្រៀបធៀបទៅនឹងរយៈពេលដូចគ្នាកាលពីឆ្នាំ២០២០កន្លងទៅ។

លោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រនិងបាណកសាស្ត្រ បានមានប្រសាសន៍នៅព្រឹកថ្ងៃទី១៣ ខែកញ្ញាថា ការសិក្សាស្រាវជ្រាវនេះដោយសារតែឆ្នាំនេះអត្រាឆ្លងជំងឺគ្រុនឈាមមានការធ្លាក់ចុះខ្លាំងពេកមិនគួរឱ្យជឿទាំងមន្ត្រីជំនាញកម្ពុជានិងមន្ត្រីអង្គការសុខភាពពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិតបានលើកឡើងរបាយការណ៍មកបញ្ជាក់ថា ចាប់ពីខែមករា រហូតមកដល់ដើមខែកញ្ញា ឆ្នាំ២០២១នេះ មានកុមារ និងមនុស្សពេញឆ្លងជំងឺគ្រុនឈាមសរុបចំនួន១០០២ករណី និងស្លាប់ចំនួន៣ករណី មានការថយចុះប្រហែលជាង៦ដង បើប្រៀបធៀបនឹងរយៈពេលដូចគ្នាឆ្នាំ២០២០ ដែលមានចំនួន៦២៩៩ករណីនិងស្លាប់ចំនួន៨ករណី។

លោកលោកវេជ្ជ ហ៊ុយ រ៉េកុល បានបន្តថា ការថយចុះនៃករណីជំងឺគ្រុនឈាមនេះ បណ្តាលការគ្រប់គ្រងភ្នាក់ងារចម្លងជំងឺបានល្អ ប្រជាជនមានការយល់ដឹងច្រើន មន្ទីរពេទ្យរដ្ឋផ្តល់សេវាប្រកបដោយគុណភាព និងសមត្ថភាពខ្ពស់ និងកក្តាអនាម័យបានល្អប្រសើរជាដើម ។

លោកវេជ្ជបណ្ឌិតបានឱ្យដឹងទៀតថា ការស្រាវជ្រាវរវាងមន្ត្រីជំនាញនិងអង្គការសុខភាពពិភពលោកនេះ គឺចង់ដឹងថា ក្រៅពីកក្តាខាងលើតើមានកក្តាអ្វីផ្សេងទៀតទេដែលនាំឱ្យអត្រាឆ្លងគ្រុនឈាមធ្លាក់ចុះតើអាចមកពីកក្តាធម្មជាតិឬយ៉ាងណា ពិសេសតើការអនាម័យខ្លួនប្រាណលាងសំអាតដៃញឹកញាប់ជាមួយសាប៊ូអាកុលឬជែលក្នុងការការពារការឆ្លងជំងឺកូវីដ១៩ ជាកក្តាមួយនាំឱ្យជំងឺគ្រុនឈាមមានការថយចុះដែរទេ។

យ៉ាងណាក៏ដោយ លោកវេជ្ជបណ្ឌិតបានបន្ថែមថា ការដែលជំងឺគ្រុនឈានថយចុះនេះ ក៏ជាសញ្ញាមួយប្រាប់ឱ្យយើងបង្កើនការប្រុងប្រយ័ត្ននៅឆ្នាំក្រោយ ឬឆ្នាំបន្តបន្ទាប់ទៀតព្រោះថា កន្លងមកបើឆ្នាំនេះមានការថយចុះ ឆ្នាំក្រោយអាចនឹងមានការកើនឡើង។

លោកវេជ្ជបណ្ឌិតបានបញ្ជាក់ថា បើទោះបីជាជំងឺគ្រុនឈាមមានការថយចុះក៏ដោយប្រជាពលរដ្ឋមិនត្រូវមានការធ្វេសប្រហែសដែរត្រូវបន្តអនុវត្តវិធានការអនាម័យលំនៅដ្ឋានឱ្យបានស្អាតលប់បំបាត់ឬដុតកំទេចចោលឬទុកដាក់ឲ្យមានរបៀបរាល់វត្ថុដែលអាចដក់ទឹកបានដូចជាសំបកកង់ឡានសំបកដបកំប៉ុង ត្រឡោកដូង ចានបាយ កំប៉ុងជ័រដែលជាជម្រកនៃការកកើតដង្កូវទឹកជាភ្នាក់ងារចម្លងជំងឺគ្រុនឈាម។

ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រនិងបាណកសាស្ត្របានអំពាវនាវដល់អាណាព្យាបាល មាតាបិតាកុមារាកុមារីគ្រប់រូបត្រូវស្លៀកពាក់ខោអាវដៃវែងជើងវែងនិងសម្រាន្តក្នុងមុងជាប្រចាំទាំងថ្ងៃទាំងយប់មិនត្រូវអង្គុយលេងនៅជិតទីកន្លែងងងឹតនោះទេ និងករណីមានរោគសញ្ញាក្តៅខ្លួនខ្លាំងភ្លាមៗ ត្រូវប្រញាប់នាំអ្នកជំងឺទៅរកសេវាពិនិត្យនិងព្យាបាលរបស់រដ្ឋ (សេវាសាធារណៈ) ដូចជាមណ្ឌលសុខភាព និងមន្ទីរពេទ្យ ដែលនៅជិតបំផុតនិងកុំសាកល្បងព្យាបាលជំងឺដោយខ្លួនឯងឬពន្យារពេលតាមដានអ្នកជំងឺនៅសេវាឯកជនដែលគ្មានសមត្ថភាពផ្នែកជំងឺគ្រុនឈាមនេះឱ្យសោះ ព្រោះអាចធ្វើឱ្យកុមារស្លាប់បាត់បង់ជំងឺបាន៕

អត្ថបទ៖ សំអឿន

Related Topics:ជំងឺគ្រុនឈាម