ព័ត៌មានជាតិ

បញ្ជាក់ឲ្យច្បាស់ឡើងវិញ ឡាន ម៉ូតូ បើកភ្លើងពេលថ្ងៃ មិនខុសច្បាប់ ប៉ូលីសគ្មានសិទ្ធិហៅផាកពិន័យទេ

បានផុស

៣ years មុន

នៅ

ថ្ងៃអង្គារ ១៤ កញ្ញា ២០២១

ដោយ

ករណីការប្រើប្រាស់ភ្លើងពេលថ្ងៃលើយានជំនិះធ្វើដំណើរតាមដងផ្លូវ នៅតែមានមន្ទិលសង្ស័យ តើអាចសមត្ថកិច្ចចរាចរណ៍ផាកពិន័យដែរឬយ៉ាងណា? ករណីនេះក៏ឧស្សាហ៍ជួបដែរគឺការបើកភ្លើងពេលថ្ងៃ ដែលពីមុនមានពលរដ្ឋរងការផាកពិន័យពីមន្រ្តីប៉ូលីសចរារណ៍។

ក្នុងវេទិកាស្ដីពីច្បាប់ចរាចរណ៍ផ្លូវគោកកាលពីថ្ងៃទី០៨ ខែឧសភា ឆ្នាំ២០២០ កន្លងទៅ លោកឧត្ដមសេនីយ៍ត្រី ថី វិសាល អនុប្រធាននាយកដ្ឋាននគរបាលចរាចរណ៍ និង សណ្ដាប់ធ្នាប់សាធារណៈបានបកស្រាយលើករណីបើកភ្លើងពេលថ្ងៃថា ច្បាប់មិនតម្រូវឱ្យផាកពិន័យម៉ូតូ ឬរថយន្តបើកភ្លើងពេលថ្ងៃទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្រ្តីនគរបាលចរាចរណ៍ពន្យល់ថា ភ្លើងពេលថ្ងៃនេះមិនមែនជាភ្លើងហ្វា ហើយក៏មិនមែនជាភ្លើងកូតនោះដែរ។ បណ្ដាប្រទេសអភិវឌ្ឍដូចជាអាមេរិក ច្បាប់តម្រូវឱ្យបើកភ្លើងពេលថ្ងៃ ដែលត្រូវបើកជាប់រហូតតែម្ដង។

លោកបានលើកឧទាហរណ៍រថយន្តមួយទឹកនាំចូលស្រុកខ្មែរភាគច្រើននាំពីអាមេរិក ច្រើនជួបបញ្ហានេះ។ បើតាមលោកឧត្តមសេនីយ៍ នៅក្នុងច្បាប់ស្ដីពីចរាចរណ៍ផ្លូវគោក មិនមានមាត្រាណាមួយឱ្យមន្រ្ដីនគរបាលចរាចរណ៍ធ្វើការផាកពិន័យទៅលើភ្លើងពេលថ្ងៃនោះទេ។ ទោះបីភ្លើង (Day Light) ដែលជាភ្លើងបំពាក់មានស្រាប់មកពីនាយ ក៏មន្រ្ដីនគរបាលមិនពិន័យដែរ ដូច្នេះសូមប្រជាពលរដ្ឋកុំមានការព្រួយបារម្ភ។

មន្រ្តីផ្នែកចរាចរណ៍ក៏លើកបញ្ជាក់ពីការប្រើប្រាស់ភ្លើងលើយានយន្តបន្ថែមថា ទោះបីអ្នកបើកបរភ្លេចបិទភ្លើងកូត ក៏មន្ត្រីនគរបាលមិនត្រូវពិន័យដែរ៕

អត្ថបទ៖ ប៊ុណ្ណារ៉ា