ឃាត់ខ្លួនមនុស្ស៣១នាក់យកទៅអប់រំ ក្រោយប្រមូលផ្តុំគ្នាលេងបាល់ទះ

គណៈបញ្ជាការឯកភាពខណ្ឌសែនសុខ ចុះបង្ក្រាបទីតាំងលេងបាល់ទះ និងស្នុកឃ័រមួយកន្លែង លួចបើកឱ្យអ្នកប្រមូលផ្តុំគ្នាចូលលេង ដោយផ្ទុយទៅនឹងវិធានការរដ្ឋបាល សេចក្តីសម្រេចរបស់សាលារាជធានីភ្នំពេញ ដោយបានឃាត់ខ្លួនមនុស្សចំនួន៣១នាក់។ ហេតុការណ៍នេះ កើតឡើងកាលពីវេលាម៉ោង៧ និង៣០នាទី យប់ថ្ងៃទី១៣ ខែកញ្ញា ឆ្នាំ២០២១ ស្ថិតនៅក្នុងភូមិដំណាក់ សង្កាត់គោកឃ្លាង ខណ្ឌសែនសុខ រាជធានីភ្នំពេញ។

តាមសមត្ថកិច្ចបានឱ្យដឹងថា ខណៈដែលសាលារាជធានីភ្នំពេញ បន្តដាក់ចេញនូវវិធានការរដ្ឋបាល បម្រាប ហាមឃាត់ ការប្រមូលផ្តុំគ្នាច្រើន អាជីវកម្មប្រឈមហានិភ័យ ដើម្បីចូលរួមទប់ស្កាត់ជំងឺឆ្លងកូវីដ-១៩ តែផ្ទុយទៅវិញ ទីតាំងតារាងបាល់ទះមួយកន្លែង ស្ថិតនៅភូមិដំណាក់ សង្កាត់គោកឃ្លាង លួចបើកដំណើរការឱ្យមនុស្សប្រមូលផ្តុំចូលលេងបាក់ទះ ស្នុកឃ័រ។ ទើបនៅយប់ថ្ងៃទី១៣ ខែកញ្ញា ឆ្នាំ២០២១ កម្លាំងចម្រុះ របស់គណៈបញ្ជាការឯកភាពខណ្ឌសែនសុខ ដឹកនាំដោយលោក ម៉ូវ ម៉ានិត អភិបាលខណ្ឌ ចុះទៅបង្ក្រាប ឃាត់មនុស្សចំនួន៣១នាក់។

មនុស្សទាំង៣១នាក់ ក្រោយពីកម្លាំងចម្រុះឃាត់ សមត្ថកិច្ចនាំខ្លួនទៅអធិការដ្ឋានខណ្ឌសែនសុខ ដើម្បីធ្វើការអប់រំ ចំណែកម្ចាស់ទីតាំងត្រូវបានណែនាំធ្វើកិច្ចសន្យាបញ្ឈប់ដំណើរការបើកអាជីវកម្ម រងចាំសម្រេចជាក្រោយ៕

អត្ថបទ៖ សុខា