ព័ត៌មានជាតិ

ក្រសួងអប់រំប្រកាសត្រៀមបើកកម្មវិធីជជែកដេញដោលយុវជនថ្នាក់ជាតិ២០២២

បានផុស

៤ years មុន

នៅ

ថ្ងៃពុធ ១៥ កញ្ញា ២០២១

ដោយ

ភ្នំពេញ ៖ ក្រសួងអប់រំ យុវជន និងកីឡាបានប្រកាសត្រៀមបើកកម្មវិធីជជែកដេញដោលយុវជនថ្នាក់ជាតិ ២០២២ដើម្បីផ្តល់ឱកាសដល់យុវសិស្សដែលកំពុងសិក្សានៅថ្នាក់ទី១១ តាមវិទ្យាល័យនានាបញ្ចេញសមត្ថភាពនិងទេពកោសល្យជាសាធារណៈ។

លោក សេរី ជំនះ អនុរដ្ឋលេខាធិការ ក្រសួងអប់រំ យុវជន និងកីឡា បានឲ្យដឹងនៅក្នុងកិច្ចប្រជុំតាមប្រព័ន្ធអនឡាញ ស្ដីពី កម្មវិធីជជែកដេញដោលយុវជនថ្នាក់ជាតិ ២០២២នៅថ្ងៃទី១៥កញ្ញាថា កម្មវិធីជជែកដេញដោលយុវជនថ្នាក់ជាតិ ២០២២នេះប្រារព្ធឡើងក្នុងគោលបំណងបណ្តុះបណ្តាលយុវជន ឱ្យចេះប្រើប្រាស់វប្បធម៌សន្ទនា ចេះដោះស្រាយបញ្ហា មានភាពក្លាហាន ចេះប្រើប្រាស់សិទ្ធិស្របច្បាប់ក្នុងការបញ្ចេញមតិ ពង្រឹងជំនាញត្រិះរិះពិចារណា ការស្រាវជ្រាវ ការចែករំលែកគំនិត ការនិយាយសាធារណៈជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តថា កម្មវិធីក៏ផ្តល់ឱកាសឱ្យយុវជនបញ្ចេញគំនិតយោបល់ បង្ហាញសមត្ថភាព និងទេពកោសល្យជាសាធារណៈក្នុងសមរភូមិគំនិតប្រកបដោយសុភវិនិច្ឆ័យ ដើម្បីស្វែងរកនូវសុខដុមនីយកម្មសម្រាប់ទាំងអស់គ្នា ជាពិសេស គឺពង្រីកធនធានយុវជន ដើម្បីឱ្យក្លាយជាមូលធនមនុស្សសម្រាប់សង្គមជាតិកម្ពុជា។

កម្មវិធីជជែកដេញដោលយុវជនថ្នាក់ជាតិ ២០២២ នឹងប្រព្រឹត្តទៅ តាមដំណាក់កាលសំខាន់ ចំនួន៥វគ្គ ១- វគ្គជម្រុះជុំទី១ (៣២ក្រុម ប្រកួតជម្រុះយក ១៦ក្រុម) ២- វគ្គជម្រុះជុំទី២ (១៦ក្រុម ប្រកួតជម្រុះយក ៨ក្រុម)៣- វគ្គជម្រុះជុំទី៣ (៨ក្រុម ប្រកួតជម្រុះយក ៤ក្រុម)៤- វគ្គពាក់កណ្តាលផ្តាច់ព្រ័ត្រ (៤ក្រុម ប្រកួតជម្រុះយក ២ក្រុម)និង៥- វគ្គផ្តាច់ព្រ័ត្រ (ប្រកួតយកជ័យលាភី លេខ ១ និងលេខ ២ នៅថ្ងៃ១២ ខែសីហា ឆ្នាំ២០២២)។

សម្រាប់កម្មវិធីជជែកដេញដោលយុវជនថ្នាក់ជាតិ ២០២១នេះម្ចាស់ជ័យលាភីបានទៅលើក្រុមសិស្សមកពីសាលាចំណេះទូទៅ មីគីវ៉េ ជាក្រុមបដិសេធឈ្នះក្រុមសិស្សមកពីសាលា ប៊ែលធី អន្តរជាតិ ជាក្រុមស្របដោយជជែកដេញដោលលើប្រធានបទ យុវជនសតវត្សទី២១ ចាំបាច់ត្រូវមានជំនាញសតវត្សទី២១ ដើម្បីភាពជោគជ័យក្នុងជីវិត៕

ដោយ ៖ សំអឿន