មន្ទីរកសិកម្មខេត្ត ចុះចាក់វ៉ាក់សាំងបង្ការ ជំងឺដុំពកស្បែកគោ នៅស្រុកសៀមប៉ាង

មន្ត្រីមន្ទីរកសិកម្ម រុក្ខា ប្រមាញ់ និងនេសាទ ខេត្តស្ទឹងត្រែងនៅថ្ងៃទី ១៥ ខែកញ្ញា ឆ្នាំ ២០២១ បានបន្តប្រតិបត្តិការចាក់វ៉ាក់សាំងគោក្របី ជូនប្រជាពលរដ្ឋ នៅស្រុកសៀមប៉ាងបន្តទៀត ដើម្បីទប់ស្កាត់ការរីករាលដាលជំងឺឆ្លងដុំពកគោ។       

លោក ទុំ នីរ៉ូ ប្រធានមន្ទីរកសិកម្ម រុក្ខា ប្រមាញ់ និងនេសាទ ខេត្តស្ទឹងត្រែង បានបញ្ជាក់ថា ប្រតិបត្តិការចាក់វ៉ាក់សាំង ធ្វើតែតំបន់ណាដែលមានផ្ទុះឡើង ជំងឺដុំពកនេះ។

លោកប្រធានមន្ទីរកសិកម្ម ក៏អំពាវនាវដល់ម្ចាស់គោ ក្របី ត្រូវថែរក្សា សត្វចិញ្ចឹមរបស់ខ្លួន និងអនុវត្តតាមបច្ចេកទេស ដែលមន្ត្រីបសុព្យាបាលសត្វណែនាំ និងកុំលែងចោលដើរពាសវាលពាសកាលព្រោះ វាប្រឈមនិងការឆ្លងជំងឺដុំពកនេះ។       

លោកប្រធានមន្ទីរបានសំណូមពរឱ្យបងប្អូនប្រជាពលរដ្ឋ អ្នកចិញ្ចឹមគោក្របីទាំងអស់ ចូលរួមសហការណ៏ ផ្តល់ព័ត៌មានមកមន្ត្រីបសុព្យាបាលសត្វ នៅតាមមូលដ្ឋានឱ្យបានឆាប់ ក្នុងករណីសត្វគោកើតជំងឺដុំពកស្បែក ដើម្បីឱ្យមន្ត្រីបសុពេទ្យ មានចំណាត់ការភ្លាមៗ ក្នុងការទប់ស្កាត់កុំឱ្យជំងឺនេះ រីករាលដាលទៅលើគោក្របីផ្សេងៗទៀត។       

លោក សៀង មេងហ៊ង ប្រធានការិយាល័យផ្នែកបសុព្យាបាលសត្វ នៃមន្ទីរកសិកម្មបានបញ្ជាក់ថា បញ្ហាប្រឈមនេះមន្ត្រីជំនាញបសុព្យាបាលសត្វ បានចុះផ្សព្វផ្សាយទៅអាជ្ញាធរមួលដ្ឋានរួចហើយ ឱ្យម្ចាស់គោក្របីបង្កើនការធ្វើជីវអនាម័យសត្វ    ហើយពេលមានកើតជំងឺដុំពកសូមឱ្យផ្តល់ដំណឹងទៅអាជ្ញាធរដែលនៅជិតបំផុត     ដើម្បីយើងរួមគ្នាដោះស្រាយបញ្ហា។         

លោក កែវ ខាំណយ កសិករចិញ្ចឹមគោនៅស្រុកសៀមប៉ាងបាន​បញ្ជាក់ថា ឆ្នាំនេះជំងឺដុំពកគោ បានធ្វើឱ្យសត្វគោដំបៅពេញខ្លួន ហើមជើង ខ្លួនក្ដៅ មិនចង់ស៊ីស្មៅ នឹងធ្វើឱ្យងាប់ បើខ្វះការថែទាំ និងមិនបានចាក់ថ្នាំព្យាបាល។        

ប្រជាកសិករចិញ្ចឹមគោមួយចំនួនពិតជាមិនបានថែទាំដិតដល់ទេ     ច្រើនលែងគោឱ្យដើរស៊ីស្មៅផ្តេសផ្តាស់   ហើយ​គោខ្លះទៀតឈឺស្លាប់នៅក្នុងព្រៃក៍មានទើបបណ្តាលឱ្យ    កើតជំងឺឆ្លងនេះជាហូរហែរមក៕     

អត្ថបទៈ ងិនលីម