កើត​កូវីដ រត់​ចេញពីមណ្ឌល​ព្យាបាល​ ៣ នាក់​ អាជ្ញាធរ​បង្ហាញទាំង​ឈ្មោះ ទាំង​​រូបថត

ខេត្តរតនគិរី÷ មន្ទីរសុខាភិបាលនៃរដ្ឋបាលខេត្តរតនគិរី បាន​សេចក្តីជូនដំណឹងនៅព្រឹកថ្ងៃទី១៦ ខែកញ្ញា ឆ្នាំ២០២១នេះ មានអ្នកជំងឺដែលមានមេរោគកូវីដ១៩ ចំនួន៣នាក់ បានរត់គេចខ្លួនចេញពីមណ្ឌលសម្រាកព្យាបាលជំងឺកូវីដ១៩ មន្ទីរពេទ្យបង្អែកខេត្តរតនគិរី។

អ្នកជំងឺដែលមានមេរោគកូវីដ១៩ ចំនួន៣នាក់ បានបញ្ជូនមកមណ្ឌលសម្រាកព្យាបាលជំងឺកូវីដ១៩ មន្ទីរពេទ្យបង្អែកខេត្តខេត្តរតនគិរី នៅថ្ងៃទី១២ ខែកញ្ញា ឆ្នាំ២០២១ ចំនួនម្នាក់ និងនៅថ្ងៃទី១៥ ខែកញ្ញា ឆ្នាំ២០២១ ចំនួន ២នាក់។

ពួកគាត់បានរត់គេចខ្លួនចេញពីមណ្ឌលព្យាបាលដែលមានឈ្មោះខាងក្រោម÷

១- ឈ្មោះ ចែម សុវត្តិ ភេទប្រុស អាយុ៣១ឆ្នាំ ជនជាតិខ្មែរ មុខរបរបច្ចុប្បន្ន មិនពិតប្រាកដ មានទីលំនៅបច្ចុប្បន្នភូមិក្រឡា ឃុំឯកភាព ស្រុកអូរជុំ ខេត្តរតនគិរី។

២- ឈ្មោះ ខុន សុវណ្ណ ភេទប្រុស អាយុ៣១ឆ្នាំ ជនជាតិខ្មែរ មុខរបរបច្ចុប្បន្ន មិនពិតប្រាកដ មានទីលំនៅបច្ចុប្បន្នភូមិក្រឡា ឃុំប៉ូយ ស្រុកអូរជុំ ខេត្តរតនគិរី។

៣- ឈ្មោះ ឃិន ច័ន្ទថ្លា ភេទប្រុស អាយុ២១ឆ្នាំ ជនជាតិខ្មែរ មុខរបរបច្ចុប្បន្នមិនពិតប្រាកដ មានទីលំនៅបច្ចុប្បន្នភូមិ៧មករា សង្កាត់ឡាបានសៀក ក្រុងបានលុង ខេត្តរតនគិរី។

ទាក់ទងទៅនិងករណីអ្នកជំងឺមានមេរោគកូវីដ១៩ខាងលើ ដែលបានរត់គេចខ្លួនចេញពីមណ្ឌលព្យាបាលមន្ទីរសុខាភិបាលនៃរដ្ឋបាលខេត្តរតនគិរី អាជ្ញាធរ​អំពាវនាវដល់អាជ្ញាធរ និងកងកម្លាំងមានសមត្ថកិច្ចគ្រប់លំដាប់ថ្នាក់ ស្វែង​រក​ចាប់​ខ្លួនអ្នកជំងឺកូវីដ១៩ទាំងនោះ ដើម្បីបញ្ជូនមកមណ្ឌលព្យាបាលជំងឺកូវីដ១៩វិញ។

មន្ទីរសុខាភិបាលនៃរដ្ឋបាលខេត្តរតនគិរី ក៏​អំពាវនាវជាថ្មីម្តងទៀត ដល់បងប្អូនប្រជាពលរដ្ឋដែលវិជ្ជាមានជំងឺកូវីដ១៩ ត្រូវ​ចូលរួមអនុវត្តតាមវិធានការព្យាបាលរបស់ក្រសួងសុខាភិបាល ដោយការអត់ធ្មត់ដើម្បីឲ្យជាសះស្បើយ ជៀសវាងរត់គេចដែលអាចនាំទុក្ខដល់សុខភាពខ្លួនផង នាំទុក្ខដល់អ្នកដទៃក្នុងក្រុមគ្រួសារនិងសហគមន៍ផង និងត្រូវមានទោសទណ្ឌជាប់ពន្ធនាគាររយៈពេលវែងផងដែរ៕

អត្ថបទ៖ វុទ្ធឦសាន