សម្ដេចតេជោ ហ៊ុន សែន ​បើកយុទ្ធនាការ ចាក់វ៉ាក់សាំងបង្ការជំងឺកូវីដ១៩ សម្រាប់កុមារអាយុ ៦ឆ្នាំ ដល់ក្រោម ១២ ឆ្នាំ ព្រឹកនេះ

សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅព្រឹកថ្ងៃទី ១៧​ ខែកញ្ញា ឆ្នាំ២០២១នេះ នឹងអញ្ជើញប្រកាសបើកយុទ្ធនាការចាក់វ៉ាក់សាំងបង្ការជំងឺកូវីដ១៩ ជូនដល់កុមារអាយុចាប់ពី៦ ឆ្នាំ ដល់១២ឆ្នាំ ​និងធ្វើសន្និសីទសារព័ត៌មានពាក់ព័ន្ធស្ថានភាពកូវីដ១៩ នៅកម្ពុជាផងដែរ នៅវិមានសន្តិភាព ទីស្ដីការនាយករដ្ឋមន្ត្រី។

សម្តេចតេជោ ហ៊ុន សែន មានប្រសាសន៍នៅថ្ងៃទី ១៥ ខែកញ្ញាថា វ៉ាក់សាំងប្រើសម្រាប់ចាក់ជូនកុមារអាយុពី ៦ ឆ្នាំដល់ក្រោម ១២ ឆ្នាំ ជាវ៉ាក់សាំងស៊ីណូវ៉ាក់ ដែលការចាក់បន្ថែមទៀតនេះ ដើម្បីបង្កើតភាពស៊ាំក្នុងសង្គមឱ្យ កាន់តែធំដែលអាចឈានទៅបើកលំហរសកម្មភាពក្នុងសង្គមឱ្យកាន់តែទូលាយ។

បន្ថែមពីលើនេះគោលដៅសំខាន់ក្នុងការចាក់វ៉ាក់សាំងនេះដើម្បីឱ្យកុមារតូចៗអាចចូល រៀននៅសាលាឡើងវិញ។

គិតត្រឹមថ្ងៃទី ១៦ ខែកញ្ញា អ្នកដែលបានចាក់វ៉ាក់សាំងបង្ការជំងឺកូវីដ-១៩ ទូទាំងប្រទេសក្រុមដែលមានអាយុចាប់ពី១៨ ឆ្នាំឡើង ចាក់ដូសទី១ ជិត១០ លាននាក់ (៩ ៨០៥ ១០៩) និងអ្នកចាក់ដូសទី ២ ចំនួន ៨ ៧៦៧ ៧៤០ នាក់ ស្មើនឹង ៩៨.០៥% នៃប្រជាជនគោលដៅសរុប១០លាននាក់។ អ្នកចាក់ដូសទី ៣ បានជាង ៨ សែននាក់។

ចំណែកកុមារនិងយុវវ័យអាយុពី ១២ឆ្នាំ ដល់ក្រោម ១៨ឆ្នាំ អ្នកចាក់ដូសទី១ ចំនួន ១ ៧២១ ៩២៤ នាក់ និង អ្នកចាក់ដូសទី២ ចំនួន ១ ២៣៦ ៥៩៤នាក់ ស្មើនឹង ៨៧.៥៤% នៃក្រុមគោលដៅសរុបជិត០២លាននាក់។ ប្រៀបធៀបនឹងប្រជាជនសរុប ១៦ លាននាក់ ស្មើនឹង ៧២.០៤%៕

អត្ថបទៈ ណារី