មេខ្យល់ ប្រុស-ស្រី ៣ នាក់ ដឹកពលករ ២៤ នាក់ខុសច្បាប់ទៅ ថៃ ត្រូវអាវុធហត្ថឃាត់ខ្លួនបញ្ជូនទៅតុលាការ

កម្លាំងវរៈការពារព្រំដែនលេខ៥០៣ យោធភូមិភាគទី៥ បានចុះល្បាតតាមបន្ទាត់ព្រំដែន ដឹកនាំដោយលោកឧត្តមសេនីយ៍ត្រី ឃួន ជឿន មេបញ្ជាការវរៈកងការពារព្រំដែន ស្ថិតក្នុងភូមិសាស្ត្រ​ភូមិចក់ពួក ឃុំស្លក្រាម ស្រុកស្វាយចេក ខេត្តបន្ទាយមានជ័យ បានប្រទះ​បានឃើញ​រថយន្ត​ចំនួន ២ គ្រឿង ដឹក​ពលករ​ឆ្លងដែន​ទៅ​រក​ការងារ​ធ្វើនៅប្រទេសថៃ ស្របពេលនោះ​កម្លាំងយោធាឃាត់​រថយន្ត ២ គ្រឿង ធ្វើការត្រួតពិនិត្យ​បាន​ឃើញ​មាន​មនុស្ស​ជិះ​ក្នុង​រថយន្ត​ទាំង២គ្រឿងនោះចំនួន២៧នាក់ ក្នុង​នោះ​មានស្រ្តីចំនួន១១នាក់ កុមារចំនួន២នាក់ នៅ​វេលា​ម៉ោង១២និង០០នាទី ថ្ងៃទី១៧ ខែ​កញ្ញា ឆ្នាំ២០២២១ បន្ទាប់មក​កម្លាំង​កងការពារព្រំដែន​៥០៣ បាន​បញ្ជូន​មកប្រគល់មកឲ្យបញ្ជាការដ្ឋានកងរាជអាវុធហត្ថខេត្តចាត់ការតាមនីតិវិធី ។

លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារស្រាវជ្រាវ និងបង្ក្រាបបទល្មើសបានឲ្យដឹងថា ក្នុងចំណោមពលករទាំង ២៧នាក់ មាន៣នាក់ជាមេខ្យល់ ១/.ឈ្មោះ តុង កុត ភេទប្រុស អាយុ៤៧ឆ្នាំ មុខរបររត់តាក់ស៊ី ២/.ឈ្មោះ មឿយ ផល្លី ភេទស្រី អាយុ៤១ឆ្នាំ ត្រូវជាប្រពន្ធ អ្នកទាំង២រស់នៅភូមិត្រាំកង់ ឃុំជន្លាសដៃ ស្រុកក្រឡាញ់ ខេត្តសៀមរាប ៣/.ឈ្មោះ ស្មឿន លីហ៊ាង ភេទប្រុស អាយុ៣៧ឆ្នាំ រស់នៅភូមិកំណប់ ឃុំស្លក្រាម ស្រុកស្វាយចេក ខេត្តបន្ទាយមានជ័យ ។

ចំណែកពលករបម្រុងចេញទៅប្រទេសថៃចំនួន២៤នាក់ រួមទាំងកុមារ២នាក់ផងនោះ ត្រូវបានកម្លាំងវរៈការពារព្រំដែន៥០៣បញ្ជូនទៅមណ្ឌលចត្តាឡីស័កនៅវិទ្យាល័យសម្ដេចឳ ស្ថិតក្នុងក្រុងសិរីសោភ័ណ ខេត្តបន្ទាយមានជ័យ ។

លោកវរសេនីយ៍ឯក ម៉ែន ភិរម្យ បានឱ្យដឹងទៀតថា ជនសង្ស័យទាំង៣នាក់ ក្រោយកម្លាំងជំនាញធ្វើការសួរនាំ រួចបានឆ្លើយសារភាពថា ពួកគេពិតជាបានដឹកពលករទាំងអស់នោះយកឱ្យមេខ្យល់ម្នាក់ទៀតពុំស្គាល់អត្តសញ្ញាណទេ គឺទាក់ទងគ្នាតាមទូរស័ព្ទ ពេលមកដល់មាត់ច្រកព្រំដែនទើបកម្លាំកងទ័ពឃាត់ខ្លួនបានតែម្ដង ចំពោះស្រ្តីឈ្មោះ មឿយ ផល្លី ត្រូវជាប្រពន្ធរបស់ឈ្មោះ តុង កុត មិនដឹងរឿងអ្វីនោះទេ ព្រោះថ្ងៃនោះប្តីរបស់គាត់ហៅមកជាមួយបានជាគ្នា ព្រោះប្តីរបស់គាត់មិនស្រួលខ្លួន ។

ករណីខាងលើ ដោយមានការអនុញ្ញតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តជនសង្ស័យទាំង៣នាក់ និងរថយន្តចំនួន២គ្រឿង ត្រូវកំលាំងអាវុធហត្ថជំនាញបានបញ្ជូនទៅសាលាដំបូងខេត្តចាត់ការតាមនិតិវីធីច្បាប់ ៕

អត្ថបទ៖ វ៉ាន់ ណាង