ក្រោយ​ចៅ​អធិការ​​វត្ត​ឆ្លង​កូវីដ​១៩ វត្ត​មួយ​ក្នុង​ស្រុក​បាទី ​នឹង​បើក​ឱ្យ​ពុទ្ធ​បរិស័ទ​កាន់​បិណ្ឌ​ធម្មតា​ តែ​ត្រូវ​រក្សា​គម្លាត

ព្រះចៅអធិការវត្តសូរភី (វត្តកកោះ) ស្ថិតនៅឃុំកណ្ដឹង ស្រុកបាទី កាលពីថ្ងៃទី ១៨ ខែកញ្ញា រកឃើញ​វិជ្ជមានកូវីដ១៩ ខណៈក្នុងវត្តមានព្រះសង្ឃ យាយជី តាជី ៥១ អង្គនាក់ បានធ្វើតេស្តរកកូវីដ១៩ ទទួល​បានលទ្ធផលអវិជ្ជមាន។

លោក ភួន ឈីម អភិបាលស្រុកបាទី បានឱ្យដឹងថា ក្នុងដំណាក់កាលនេះ ក្រុមការងារឆ្លើយ​តបបន្ទាន់ របស់រដ្ឋបាលស្រុក បានធ្វើតេស្តយកសំណាក យាយជីតាជី ជាង ៥០ អង្គ/នាក់ លទ្ធផលអវិជ្ជមានទាំងអស់​។ វិធានការរបស់រដ្ឋបាលស្រុក គឺធ្វើចត្តាឡីស័កអ្នក​ពាក់ព័ន្ធ​នៅ​វត្ត ហើយព្យាបាលព្រះសង្ឃតាមវិធានសុខាភិបាល។

លោកអភិបាលស្រុក បានបញ្ជាក់ឱ្យដឹងថា រដ្ឋបាលស្រុក ក្នុងនាមក្រុមរុករកជំងឺកូវីដ១៩ នឹងនិមន្ត​អនុ​គន្ធស្រុក មកប្រជុំ ដើម្បីរៀបចំផ្លូវសុវត្ថិភាពពេលពុទ្ធបរិស័ទមកដាក់បិណ្ឌនៅតាមវត្ត ដោយគិត​ពីសុវត្ថិភាព និងរក្សាគម្លាត។

លោក ភួន ឈីម បញ្ជាក់ថា បន្ទាប់ពីធ្វើតេស្ដអវិជ្ជមាន ក្នុងឱកាសបុណ្យកាន់បិណ្ឌ និងភ្ជុំបិណ្ឌ វត្តសូរភីគឺបើកឱ្យប្រជាពលរដ្ឋ ពុទ្ធបរិស័ទចូលទៅធ្វើបុណ្យបង្សុកូលបាន ក្នុងកម្រិតមួយដោយកំណត់ខ្សែគូសវាសការរក្សាគម្លាត៕