ក្រុងប៉ោយប៉ែត ភ្លៀងនៅតែបន្តធ្លាក់​ ក្នុងកម្រិតខ្លាំង អាជ្ញាធរប្រាប់ឱ្យប្រជាពលរដ្ឋ បង្កើនការប្រុងប្រយ័ត្ន

កម្រិតទឹកភ្លៀងនៅក្រុងប៉ោយប៉ែត នៅតែបន្តធ្លាក់ខ្លាំង បណ្ដាលឱ្យជនលិចលំនៅ​ឋាន ផ្លូវមួយចំនួនក្នុងក្រុង ខណៈដែលទឹក តាមអូរព្រំដែនឡើងខ្ពស់ រហូតឈានដល់ ជម្លៀសប្រជាពលរដ្ឋមួយចំនួនមកកាន់ទីទួលសុវត្ថិភាព។

អាជ្ញាធរក្រុងប៉ោយប៉ែត គ្រប់ជាន់ថ្នាក់ បានខិតខំបើកកាយមុខទឹកយ៉ាងណាក៏ដោយ ទឹកនៅតែពុំអាចស្រកបានលឿនដដែល។

រដ្ឋបាលក្រុងប៉ោយប៉ែត ក៏បានអំពាវនាវ ដល់ប្រជាពលរដ្ឋ ឱ្យចូលរួមបង្កើនការប្រុងប្រយ័ត្នខ្ពស់ ដោយអនុវត្តតាមការណែនាំរួមមាន ជួយការសំរាមតាមមុខលូ តាមមុខផ្ទះរៀងខ្លួន វេចខ្ចប់ទុកដាក់សំរាមឱ្យបានត្រឹមត្រូវ បង្កើនការប្រុងប្រយ័ត្នចំពោះក្មេងតូចៗ កុំឱ្យលេងទឹក សត្វមានពិស និងទុកដាក់ទំនិញ សម្ភារប្រើប្រាស់ ត្រូវរៀបចំខ្សែភ្លើង ឬបិទចរន្តអគ្គិសនី និងហាមទៅលេងទឹកតាមកន្លែងមានទឹកហូរខ្លាំង។

សូមជំរាបថា រយៈពេលពីរថ្ងៃហើយ គឺចាប់តាំងពីថ្ងៃទី១៩ មកទល់​ថ្ងៃទី២០នេះ សន្ទុះទឹកភ្លៀងបានធ្លាក់មកយ៉ាងធ្ងន់ធ្ងរ បង្កឲ្យលិចរាល់ហេដ្ឋារចនាសម្ព័ន្ធជាពិសេសផ្លូវជាតិតូចធំ នៅក្នុងក្រុងប៉ោយប៉ែត បាន​រង​នូវ​ការលិចលង់​ទាំងស្រុង​តែម្ដង មិន​ត្រឹមតែ​ប៉ុណ្ណោះ​ប្រជាពលរដ្ឋ​ដែល​រស់នៅ​តាម​អូរ​ព្រំដែន​កម្ពុជា​ថៃ កំពុង​ត្រូវបាន​អាជ្ញាធរ​ជម្លៀស​មកពី​ទួល​សុវត្ថិ​ភាពជា​បណ្ដើរៗហើយ ដោយមាន​កងកម្លាំង​ទាហាន ប៉ូលិស ប៉េអិម បាន​ចូលរួម​សង្គ្រោះ​ប្រជាពលរដ្ឋ​យើង​ផងដែរ​។

ផ្លូវជាតិ​លេខ ៥ ដែលមាន​ប្រវែង ២០០​ម៉ែត្រ​កំពុងតែ​រង​នូវ​ការលិចលង់​ទាំងស្រុង​នៅ​ចំណុច​ក្នុងភូមិ​បា​លិ​លេ​យ្យ ២ សង្កាត់​ប៉ោយប៉ែត ក្រុង​ប៉ោយប៉ែត​ខេត្តបន្ទាយមានជ័យ ហើយ​នៅតាម​បណ្ដាល​ផ្លូវ​បេតុង​តូចធំ​ស្ទើរ ៩០ ភាគរយ៕