ប្រកាសផ្អាកដំណើរការរោងភាពយន្ត រោងសម្តែងសិល្ប: និងសារមន្ទីរ

ក្រសួងវប្បធម៌ និងវិចិត្រចិល្បៈ បានប្រកាសផ្អាកដំណើរការរោងភាពយន្ត រោងសម្តែងសិល្ប: និងសារមន្ទីរទូទាំងប្រទេស រយៈពេលពីរសប្តាហ៍ ដើម្បីចូលរួមទប់ស្កាត់ការរីករាលដាលជំងឺកូវីដ-១៩ ក្នុងសហគមន៍ ។

ការប្រកាសផ្អាកដំណើរការរោងភាពយន្ត រោងសម្តែងសិល្ប: និងសារមន្ទីរទូទាំងប្រទេសនេះ បន្ទាប់ពីក្រសួងសុខា​ភិ​បាល​ បានរកឃើញអ្នកឆ្លងកូវីដ-១៩ ថ្មីមួយចំនួនថែមទៀត ដែលជាប់ពាក់ព័ន្ធនឹងព្រឹត្រិការណ៍ «សហគមន៍​២៨វិច្ឆិកា» ធ្វើឲ្យចំនួនអ្នកឆ្លងកូវីដ១៩ ក្នុងព្រឹត្តិការណ៍នេះ កើនឡើនដល់១៤នាក់។

យោងតាមសេចក្តីជូនដំណឹងរបស់ក្រសួងវប្បធម៌ និងវិចិត្រសិល្បៈ ចុះថ្ងៃទី៣០ ខែវិច្ឆិកានេះ បានឲ្យដឹងថា«ក្រសួងសូមជម្រាបជូនលោក លោកស្រី ជាប្រធានមន្ទីរវប្បធម៌ និងវិចិត្រសិល្បៈ រាជធានី ខេត្ត សាធារណជនសមាគមមគ្គុទេសក៍ទេសចរណ៍ ទីភ្នាក់ងារទេសចរណ៍ ក្រុមហ៊ុនទេសចរណ៍ ភ្ញៀវទេសចរជាតិ អន្តរជាតិទាំងអស់ ឲ្យបានដឹងថា ដោយមើល​​ឃើញពីផលប៉ះពាល់នៃការរីករាលដាលជាសកល នៃជំងឺជំងឺកូវីដ-១៩ និងចៀសវាងការឆ្លងរីករាលដាលក្នុង​សហគមន៍ក្រសួងវប្បធម៌ និងវិចិត្រសិល្បៈ សូមផ្អាកការចូលទស្សនា សារមន្ទីរផ្អាកដំណើរការនូវរោងភាពយន្ត និងរោងសម្ដែងសិល្បៈគ្រប់ប្រភេទ ទូទាំងប្រទេសរយៈពេល២សប្តាហ៍ ជាបណ្ដោះអាសន្ន អនុវត្តចាប់ពីថ្ងៃនេះតទៅ»៕

​អត្ថបទ ៖ សំអឿន