ទឹកស្ទឹងសង្កែ ចាប់ផ្ដើមហក់ឡើងខ្លាំង អាជ្ញាធរ ប្រាប់ពលរដ្ឋ ឱ្យប្រុងប្រយ័ត្ន

នៅក្នុងរយ:ពេល ២ ថ្ងៃចុងក្រោយនេះ ទឹកស្ទឹងសង្កែ បានហក់ឡើងខ្លាំង គួរឱ្យព្រួយបារម្ភ ដែលតម្រូវឱ្យអាជ្ញាធរតាមមូលដ្ឋានជាប់ដងស្ទឹង ប្រកាសដល់ប្រជាពលរដ្ឋឱ្យមានការប្រុងប្រយ័ត្ន។

រយ:ពេល ២ ថ្ងៃ គិតចាប់ពីថ្ងៃទី ១៨ និង១៩ កញ្ញានេះ គេសង្គេតឃើញថា ភ្លៀងបានបង្អុរមកជាប់ៗគ្នា ទាំងថ្ងៃ ទាំង​យប់ ឯប្រភពក្បាលស្ទឹងដូចជា ស្រុកសំឡូតជាដើម ក៏មានភ្លៀងធ្លាក់ឥតស្រាកដែរ ដែលអាចបង្កឱ្យទឹកក្នុងស្ទឹងសង្កែហក់ឡើងយ៉ាលឿនបែបនេះ។

ស្របពេលដែលទឹកស្ទឹងកំពុងស្ទុះឡើងបែបនេះ អាជ្ញាធរនៅតាមបណ្តាស្រុកដែលស្ថិតនៅតាមបណ្តោយដងស្ទឹង ក៏បានប្រកាស និងជូនដំណឹងដល់ប្រជាពលរដ្ឋ ឱ្យបង្កើននូវការប្រុងប្រយ័ត្ន ពិសេសផ្ទះពលរដ្ឋណាដែលបានសាងសង់នៅលើច្រាំងស្ទឹង។

បើតាមមន្ត្រីជំនាញបានឱ្យដឹងថា ទឹកស្ទឹងអាចនៅតែបន្តហក់ឡើងខ្លាំងបន្ថែមទៀត ដោយសារតែតំបន់ខាងលើនៅតែមានភ្លៀងធ្លាក់ ដូច្នេះគួរតែប្រជាពលរដ្ឋមានការត្រៀមលក្ខណ:ប្រុងប្រយ័ត្នអោយបានខ្ពស់ បើទោះបីជាទឹកស្ទឹងមិនទាន់ឡើងដល់កម្រិតដែលត្រូវប្រកាសអាសន្នក៏ដោយ៕

អត្ថបទៈ សោ និយមរ័ត្ន