ព័ត៌មានជាតិ

បន្ទាប់ពី Ford រោងចក្រដំឡើងរថយន្តថ្មីមួយទៀត នឹងបើកដំណើរការនៅកម្ពុជា

បានផុស

៣ years មុន

នៅ

ថ្ងៃអង្គារ ២១ កញ្ញា ២០២១

ដោយ

ក្រុមប្រឹក្សាអភិវឌ្ឍកម្ពុជា ទើបតែអនុម័តគម្រោងវិនិយោគរោងចក្រដំឡើងរថយន្តថ្មីមួយទៀត ដែលមានទីតាំងនៅក្រុងប៉ោយប៉ែតខេត្តបន្ទាយមានជ័យ។

បើតាមសេចក្តីប្រកាសរបស់ក្រុមប្រឹក្សាអភិវឌ្ឍកម្ពុជាបានបញ្ជាក់ថា ក្រុមហ៊ុន HGB MOTORS ASSEMBLY CO., LTD. គ្រោងបង្កើតរោងចក្រផ្គុំ និងតម្លើងរថយន្ត ដែលមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេស ប៉ោយប៉ែត ភីភី ក្រុងប៉ោយប៉ែត ខេត្តបន្ទាយមានជ័យ ដែលមានទុនវិនិយោគប្រមាណ៧លានដុល្លារអាមេរិក និងអាចបង្កើតការងារបានចំនួន១៦៥កន្លែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាក្រុមហ៊ុនដំឡើងរថយន្តថ្មីមួយទៀត បន្ទាប់រោងចក្រដំឡើងរថយន្ត Ford ដែលកំពុងដំណើរការសាងសង់នៅខេត្តពោធិ៍សាត់ ដែលអាចរួចរាល់ដាក់ឲ្យដំណើរការនៅដើមឆ្នាំ២០២២។ រោងចក្ររថយន្ត Ford នេះ មានទីតាំងស្ថិតក្នុងភូមិសាវ័ន ឃុំស្នាអន្សា ស្រុកក្រគរ ខេត្តពោធិ៍សាត់ ក្រោមការគ្រប់គ្រងរបស់ក្រុមហ៊ុន RMA AUTOMOTIVE (CAMBODIA) CO.,LTD ដែលជាក្រុមហ៊ុនទទួលសិទ្ធិនាំចូលរថយន្ត Ford របស់អាមេរិកនៅទីផ្សារកម្ពុជា។ រោងចក្រនេះ អាចស្រូបយកកម្លាំងពលកម្មក្នុងស្រុកបានប្រមាណ ៥០០នាក់។

បច្ចុប្បន្នកម្ពុជាមានក្រុមហ៊ុន បានបោះទីតាំងវិនិយោគរោងចក្រដំឡើងរថយន្ត។ ក្រុមហ៊ុនរបស់កូរ៉េពីរគឺ Hyundai និង Daehan បានបង្កើតរោងចក្រដំឡើងរថយន្តនៅតំបន់សេដ្ឋកិច្ចពិសេសក្នុងខេត្តកោះកុង និងនៅក្រុងបាវិតខេត្តស្វាយរៀង។

កាលពីឆ្នាំ២០១៦ ក្រុមហ៊ុន Tan Choug Group របស់ប្រទេសម៉ាឡេស៊ី ក៏បានស្នើសុំដល់រដ្ឋាភិបាលកម្ពុជា ក្នុងការវិនិយោគរោងចក្រដំឡើងរថយន្ត ដើម្បីផ្គត់ផ្គង់ទីផ្សារតំបន់អាស៊ាន។ ដោយឡែកក្រុមហ៊ុន International VCV Industry CO,.ltd បានទទួលវិញ្ញាបនបត្រចុះបញ្ជីជាស្ថាពរ លើគម្រោងបង្កើតរោងចក្រផ្គុំ និងដំឡើងរថយន្តនៅខណ្ឌសែនសុខ ក្រោមទុនវិនិយោគប្រមាណ ៤. ០៧លានដុល្លារអាមេរិក អាចបង្កើតការងារបានចំនួន ៨២០ កន្លែង៕

អត្ថបទ៖ ប៊ុណ្ណារ៉ា