ចាប់ខ្លួនមុខសញ្ញា ជួញដូរថ្នាំញៀន បានទាំងថ្នាំគ្រវី ពីរប្រភេទថែមទៀត

មុខសញ្ញាជួញដូរថ្នាំញៀនម្នាក់ ដែលជាមុខសញ្ញាចែកចាយយ៉ាងសកម្ម ត្រូវបានកម្លាំងអធិការក្រុងបាត់ដំបង តាមប្រមាញ់និងឈានដល់ការចាប់ខ្លួន ដោយដកហូតថ្នាំញៀនជាច្រើនមុខផងដែរ។

លោកវរសេនីយ៍ឯក ពេជ្រ សារ៉ែន អធិការនគរបាលក្រុងបាត់ដំបង បានបញ្ជាក់ថា បន្ទាប់ពីទទួលបាននូវសេចក្តីរាយការណ៍រួចមក លោកក៏បានសុំគោលការទៅលោកឧត្តមស្នងការ សាត គឹមសាន ហើយក៏មានការឯកភាពពីលោកព្រះរាជអាជ្ញា កែវ សុជាតិ ផងដែរ ទើប នៅថ្ងៃទី២១ ខែកញ្ញា ឆ្នាំ២០២១ វេលាម៉ោង ២ និង ៣៥ នាទី រសៀល លោកបានចាត់កម្លាំងចុះទៅកាន់ចំណុច ក្រុមទី២២ ភូមិទួលតាឯក សង្កាត់ទួលតាឯក ក្រុងបាត់ដំបង ខេត្តបាត់ដំបង ដើម្បីពិនិត្យលើសកម្មភាពជាក់ស្តែង។

នៅក្នុងកិច្ចប្រតិបត្តិការ កម្លាំងជំនាញបាន ឃាត់ខ្លួនបុរសជនសង្ស័យឈ្មោះ សេង សុខឡា អាយុ៣៤ ឆ្នាំ មានទីលំនៅ ភូមិទួលតាឯក សង្កាត់ទួលតាឯក ក្រុងបាត់ដំបង ដោយដកហូតបានថ្នាំញៀនមួយចំនួន និងបានសុំគោលការទៅលោកព្រះរាជអាជ្ញាដើម្បីឆែកឆេរលំនៅឋាន។

វត្ថុតាងដែលដកហូតបានបានរួមមាន ថ្នាំញៀនប្រភេទម៉ាទឹកកកចំនួន ១០ ថង់ ទម្ងន់ ៣៦,១៥ ក្រាម ថ្នាំគ្រវីប្រភេទម៉្សៅ (ខេតាមីន) ចំនួន១ថង់ ទម្ងន់ ២១,៥៥ ក្រាម ថ្នាំគ្រវីប្រភេទគ្រាប់ (អុិចស្តាសុី) ចំនួន ៦២ គ្រាប់ ទម្ងន់ ២៣,៣០ ក្រាម ជញ្ជីងអេឡិចត្រូនិច សម្រាប់ថ្លឹងថ្នាំញៀន១ ទូរស័ព្ទដៃ១ និងសម្ភារសម្រាប់ច្រកគ្រឿងញៀនមួយចំនួន។

បច្ចុប្បន្នកម្លាំងអធិការក្រុងកំពុងកសាងសំណុំរឿងដើម្បីបញ្ជូនទៅស្នងការដ្ឋាននគរបាលខេត្ត ក្នុងការចាត់វិធានការតាមផ្លូវច្បាប់៕

អត្ថបទៈ សោ និយមរ័ត្ន