ព័ត៌មានជាតិ

កសិដ្ឋានចិញ្ចឹមត្រីប៉ាសេអី បំភ្លឺរឿងយកត្រីកាប បន្លំត្រីប៉ាសេអីលក់តម្លៃខ្ពស់

បានផុស

៣ years មុន

នៅ

ថ្ងៃសុក្រ ២៤ កញ្ញា ២០២១

ដោយ

ក្រោយមានការផ្សព្វផ្សាយកសិដ្ឋានចិញ្ចឹមត្រីមួយកន្លែងនៅខេត្តស្ទឹងត្រែង យកត្រីកាបបន្លំជាត្រីប៉ាសេអីលក់តម្លៃខ្ពស់ ម្ចាស់កសិដ្ឋានរងការចោទប្រកាន់បានឆ្លើយបំភ្លឺ ដើម្បីមហាជនបានទទួលព័ត៌មានពីបច្ចេកទេសចិញ្ចឹមត្រីកម្រនេះ។

លោក ស៊ុន លី តំណាងម្ចាស់កសិដ្ឋានចិញ្ចឹមត្រីធម្មជាតិ (Natural Fish Farm) បានប្រាប់កម្ពុជាថ្មីថា ត្រីដែលលោកប្រកាសផ្សព្វផ្សាយលក់គឺជាត្រីប៉ាសេអីពិតប្រាកដ មិនមែនជាត្រីកាបបន្លំបោកប្រាស់នោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបំភ្លឺថា ការផ្សព្វផ្សាយដែលថាខាងលោកលក់ត្រីកាបបន្លំជាការយល់ច្រឡំ។ ខាងកសិដ្ឋានរបស់លោកប្រើប្រាស់បច្ចេកទេសបង្កាត់ ហើយចិញ្ចឹមរយៈពេលពីរទៅ៣ឆ្នាំ ទើបអាចចាប់យកមកលក់បាន។

លោកលើកពន្យល់ថា ត្រីប៉ាសេអីធម្មជាតិរស់នៅទឹកជ្រៅ ស៊ីស្លឹកឈើ ស៊ីឫសឈើ មានពណ៌ក្រមៅ តែត្រីប៉ាសេអីនៅកសិដ្ឋានរបស់លោកប្រើប្រាស់បច្ចេកទេសបង្កាត់មានពណ៌សជាង ថ្លាជាង មើលទៅដូចត្រីកាប។

លោកបន្តថា ត្រីប៉ាសេអីខាងកសិដ្ឋានរបស់លោកយកពូជទៅបង្កាត់នៅក្រៅប្រទេស ហើយចិញ្ចឹមតាមទន្លេមិនខុសពីត្រីប៉ាសេអីធម្មជាតិនោះទេ។ យ៉ាងណាម្ចាស់កសិដ្ឋានទទួលស្គាល់ថា ត្រីប៉ាសេអីចិញ្ចឹមមិនដូច ១០០ភាគរយនោះទេ ដោយសារលក្ខណៈចិញ្ចឹមវាខុសពីធម្មជាតិ។

បើតាមម្ចាស់កសិដ្ឋានរូបនេះ លោកបានចិញ្ចឹមបាន ៣ ឆ្នាំ ហើយក្នុងមួយខែៗក៏ចាយអស់ច្រើនលើការបំប៉ន។ លោកថាត្រីនេះមិនមានច្រើនទេ ដោយសារចំណាយចិញឹមពេលយូរ អាចពីរទៅ៣ឆ្នាំ ទើបអាចចាប់យកមកលក់បាន។ តែតម្លៃធូរជាងឆ្ងាយជាងប៉ាសេអីធម្មជាតិ។ ត្រីប៉ាសេអីធម្មជាតិចាប់ពី ៣ គីឡូឡើង មួយគីឡូអាច ៨០ ដុល្លារ ដោយសារចិញ្ចឹមអាចធ្វើបាន លក់ក៏ធូរតាមហ្នឹង។

ខណ្ឌរដ្ឋបាលជលផលខេត្តស្ទឹងត្រែង បានប្រកាសជូនដំណឹង ក្រោយមានការផ្សព្វផ្សាយសង្កេតឃើញមានការបង្ហោះលក់ត្រីប៉ាសេអ៊ី ដោយបន្លំយកត្រីកាបឥណ្ឌាលក់ក្នុងតម្លៃខ្ពស់បោកប្រាស់អតិថិជន។

បើតាមការបំភ្លឺពីខណ្ឌរដ្ឋបាលជលបានបានលើកបង្ហាញដោយផ្អែកលើរូបភាព និងវីដេអូ គឺមិនមែនជាត្រីប៉ាសេអីទេ។ ហើយមានរូបភាពខ្លះដូចជាបន្លំប្រភេទត្រីកាបឥណ្ឌា ថាជាត្រីប៉ាសេអ៊ី។ ជាក់ស្ដែងមកដល់ពេលនេះមិនទាន់មានការស្រាវជ្រាវរកឃើញពីបច្ចេកទេសចិញ្ចឹម និងបង្កាត់ប្រភេទត្រីប៉ាសេអ៊ីនៅឡើយទេ។ ករណីនេះអាចជាការបន្លំ កេងប្រវ័ញ្ចផលប្រយោជន៍ពីប្រជាជន ដែលមិនស្គាល់ប្រភេទត្រីប៉ាសេអ៊ី ច្បាស់លាស់។

តំណាងម្ចាស់កសិដ្ឋានចិញ្ចឹមត្រីប៉ាសេអីបានបញ្ជាក់ថា ការចោទប្រកាន់នេះជាការខុសឆ្គង ហើយបើមានការសង្ស័យមន្រ្តីជំនាញគួរមានការស្រាវជ្រាវជាមុន មិនគួរមានការផ្សព្វផ្សាយនាំឲ្យមហាជនមានការភាន់ច្រឡំនោះទេ៕

អត្ថបទ៖ ប៊ុណ្ណារ៉ា