ព័ត៌មានជាតិ

ទឹកជំនន់កំពុងលិចលង់ និងកាត់ផ្តាច់ផ្លូវមួយចំនួនជុំវិញអាងទឹកកំពីងពួយ

បានផុស

៤ years មុន

នៅ

ថ្ងៃសុក្រ ២៤ កញ្ញា ២០២១

ដោយ

ស្ពាន និងផ្លូវថ្នល់មួយចំនួនដែលស្ថិតនៅក្បែៗ និងជុំវិញតំបន់អាងទឹកកំពីងពួយ ត្រូវបានទឹកជំនន់កាត់ផ្តាច់ជាបណ្តើរៗ ដោយសារតែអង្គភាពពាក់ព័ន្ធមិនព្រមឆ្លើយតបទៅតាមសំណូមពររបស់អាជ្ញាធរដែលសុំអោយបិទទ្វារទឹកខ្លះតែគ្មានប្រសិទ្ធិភាព។

រយ:ពេល៣ថ្ងៃមកហើយ ដែលទឹកជំនន់បានហូរច្រោះដាច់ផ្លូវដែលទើបស្ថាបនាថ្មីៗ អស់ជាច្រើនកន្លែង និងបានលិចលង់ដល់ផ្ទះប្រជាពលរដ្ឋមួយចំនួនថែមទៀតផង ដោយកន្លែងខ្លះកម្ពស់ទឹក បានហូរនៅពីលើស្ពានថ្មទៅវិញដែលជាហេតុធ្វើអោយច្រោះបាក់ដី និងដាច់ផ្លូវមិនអាចធ្វើដំណើរបានឡើយ រីឯតំបន់ដែររងគ្រោះខ្លាំងជាងគេ គឺភូមិស្លាបប៉ាង ក្នុងឃុំតាគ្រាមតែម្តង ដោយឡែកភូមិអូរដូនពៅគ្រាន់តែទឹកហូរកាត់ភូមិប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អ៊ឹម ប៊ុនយូ មេឃុំតាគ្រាម បានលើកឡើងថា ទឹកដែលហូរធ្លាក់មកក្នុងអូរដូនពៅនេះ គឺជាទឹកដែលហូរបែកចេញពីស្ទឹងបវេល ហើយការលិចលង់ដ៏ខ្លាំងនេះ គឺលោកបានដឹងតាំងពីថ្ងៃដំបូងម្ល៉េះ ព្រោះលោកបានឃើញទឹកមានសភាពឡើងពេញប្រៀបក្នុងអូរដូនពៅ ដែលទិសដៅរបស់ទឹកនេះត្រូវហូរធ្លាក់ទៅក្នុងអាងទឹកកំពីងពួយ ។

លោកមេឃុំបានបន្តថា ដោយឃើញហេតុការណ៍បែបមិនស្រួល លោកក៏បានទាក់ទងទៅអ្នកយាមទ្វារទឹកអូរដូនពៅ អោយទម្លាក់ទ្វារទឹកវិញខ្លះ ដើម្បីកុំអោយទឹកជន់ខ្លាំងពេក ប៉ុន្តែទ្វារទឹកនៅតែដដែល ឯទឹកកាន់តែហូរគំហុកខ្លាំងឡើង ដោយអ្នកយាមប្រាប់ថា គេបានរាយការណ៍ទៅមន្ទីរធនធានទឹកហើយ តែមិនឃើញឆ្លើយតប ដូច្នេះគេមិនហ៊ានសម្រេចទេទីបំផុតទឹកហូរចូលទៅក្នុងអាងទឹកកំពីងពួយ តែបន្តិចបន្ទួចប៉ុណ្ណោះ ដោយឡែកទឹកមួយចំនួនធំ បានហៀរពីលើទំនប់ ចេញពីអូរដូនពៅ លិចភូមិស្លាបប៉ាងគ្មានសល់ ព្រមទាំងបានបំផ្លាញផ្លូវជាច្រើនកន្លែងផងដែរ។

លោកមេឃុំតាគ្រាមបានបញ្ជាក់ចុងក្រោយថា រហូតដល់ថ្ងៃនេះ គឺមានរយ:ពេល៣ថ្ងៃមកហើយ ដែលទឹកនៅតែបន្តហូរលិចផ្លូវ និងភូមិដដែល ដោយបញ្ហានេះលោកបានរាយការណ៍ទៅលោកអភិបាលស្រុករួចហើយដើម្បីជ្រាប ។

នៅព្រឹកថ្ងៃទី២៤ ខែកញ្ញានេះ កម្ពុជាថ្មី បានទាក់ទងតាមរយ:ទូរស័ព្ទ ទៅលោក ឡុង ផលគុណ ប្រធានមន្ទីរធនធានទឹក និងឧតុនិយមដែរ ដើម្បីចង់ដឹងរឿងនេះ តែលោកមិនបានទទួលខ្សែទូរស័ព្ទយើងឡើយ ៕

អត្ថបទ៖ សោ និយមរ័ត្ន