ព័ត៌មានជាតិ

ស្ត្រីដែលចាញ់បោកមេខ្យល់ នាំទៅរៀបការជាមួយជនជាតិចិន ត្រូវបានជួយសង្គ្រោះហើយ

បានផុស

៣ years មុន

នៅ

ថ្ងៃចន្ទ ២៧ កញ្ញា ២០២១

ដោយ

ស្ត្រីវ័យក្មេងម្នាក់ឈ្មោះ សឿន បុប្ផា អាយុ២៣ឆ្នាំ មានស្រុកកំណើតភូមិកោះព្រះ ឃុំកោះព្រះ ស្រុកសៀមបូក ខេត្តស្ទឹងត្រែង ដែលចាញ់បោកមេខ្យល់ នាំទៅរៀបការជាមួយបុរសជនជាតិចិន នៅប្រទេសចិននោះ ត្រូវបានជួយសង្គ្រោះហើយ និងកំពុងធ្វើនីតិវិធីបញ្ជូន មកកម្ពុជាវិញ នាពេលឆាប់ៗខាងមុខ នេះបើតាមមន្ត្រីជាន់ខ្ពស់ក្រសួងការបរទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កុយ គួង រដ្ឋលេខាធិការ និងជាអ្នកនាំពាក្យក្រសួងការបរទេស និងសហប្រតិបត្តិកាអន្តរជាតិបានថ្លែងប្រាប់កម្ពុជាថ្មី នាព្រឹកថ្ងៃ២៧ ខែកញ្ញា នេះថា មកដល់ពេលនេះ ស្ថានអគ្គកុងស៊ុលកម្ពុជាប្រចាំនៅទីនោះ កំពុងធ្វើការងារជាមួយអាជ្ញាធរចិន ហើយកំពុងពិនិត្យនីតិវិធី ដើម្បីបញ្ជូនគាត់មកវិញ។

សូមបញ្ជាក់ថា នារីរងគ្រោះខាងលើ បានចាញ់បោកមេខ្យល់ ទៅប្រទេសចិន កាលពីឆ្នាំ២០២០ និងបានរៀបការជាមួយបុរសជនជាតិ។ នាងបានរៀបរាប់ថា នាងឈ្មោះ សឿន បុប្ផា អាយុ២៣ ឆ្នាំ មានស្រុកកំណើតភូមិកោះព្រះ ឃុំកោះ ព្រះស្រុកសៀម បូក ខេត្តស្ទឹងត្រែង។ ដំបូងនាងត្រូវអ្នកស្គាល់គ្នា ដែលជួលផ្ទះនៅខេត្តជាមួយគ្នា លួងលោមនាងឲ្យមកធ្វើការនៅស្រុកចិន ដោយយកប្រាក់ (Comssion) ពីបុរសចិនចំនួន ២,០០០ ដុល្លារនៅខែធ្នូ ឆ្នាំ ២០២០ ប៉ុន្តែទៅដល់មិនបានធ្វើការអ្វីទេ ដោយមេខ្យល់យកនាងទៅឲ្យយកប្តីចិន នៅផ្ទះលេខ ៣៥លីងជូ ភូមិជីនជូ ទីក្រុងដាលីងសាន (តុងកួន) ខេត្តក្វាងទុង ។ នាងថា ប្តីចិនរបស់នាង និងម៉ែឪក្មេក ជាមនុស្សស្លូតទេ តែមានជីវភាពមិនធូរធារ ដោយប្តីរបស់នាងធ្វើការនៅរោងចក្រ និងបានផ្ញើប្រាក់មកផ្ទះបាន២ដងដែរ ។

នាងបានអះអាងថា ស្ថានកុងស៊ុលខ្មែរបានទាក់ទងនាងតាម Wechat ឲ្យនាងរង់ចាំ និងថា ខាងស្ថានកុងស៊ុលខ្មែរនិយាយប្រាប់ថា រឿងនេះស្រេចលើប៉ូលិសចិនធ្វើការ ណាមួយពិបាកកំពុងកើតកូវីដផង ឥឡូវអស់រយៈពេល៣ ខែហើយនាងរង់ចាំដោយអន្ទះសា ដើម្បីបានមកស្រុក កំណើតវិញ។ ស្ត្រីរូបនោះបញ្ជាក់ថា ប្តីរបស់នាងក៏បានអនុញ្ញាតឲ្យនាងមកស្រុកខ្មែរវិញដែរ ដោយបានប្រគល់លិខិតស្នាម និងលិខិតឆ្លងដែនឲ្យនាងវិញដែរ តែគ្មានលទ្ធភាពឲ្យប្រាក់នាងមកទេ ដូច្នេះទើបអំពាវនាវខាងស្ថានកុងស៊ុលខ្មែរយើងជួយនាង។

នាងថ្លែងដែរថា នៅទីនោះពិបាករស់នៅ គ្មានសេរីភាព ដោយសារទៅខុសច្បាប់ គ្មានការងារធ្វើ ឯនៅស្រុកខ្មែរឪពុកម្តាយក៏មានជំងឺ ជំពាក់ធនាគារ ទើបនាងចង់មកធ្វើការនៅស្រុកខ្មែរវិញជួយគ្រួសារ៕

អត្ថបទ៖ កោះកែវ