មណ្ឌលគិរីជាខេត្តគោលដៅទេស​ចរណ៍ អាជ្ញាធរត្រៀមវិធានការ ទទួលភ្ញៀវ អំឡុងពេលភ្ជុំបិណ្ឌ

ខេត្តមណ្ឌលគិរី ជាគោលដៅទេសចរណ៍មួយ ដែលប្រជាជនមួយចំនួនច្រើន នឹងធ្វើដំណើរទៅលេង ក្នុងឱកាសថ្ងៃឈប់​សម្រាកពេលភ្ជុំបិណ្ឌនាប៉ុន្មានថ្ងៃខាងមុខនេះ។ អាជ្ញាធរមណ្ឌលគិរី បានត្រៀមវិធានការសុខាភិបាលជាច្រើន ដើម្បីទប់ស្កាត់ការឆ្លងរីករាលដាល នៃជំងឺ​កូវីដ​១៩ អំឡុងពេលដំណើរកម្សាន្តរបស់ប្រជាពលរដ្ឋ។

លោក ស្វាយ សំអ៊ាង អភិបាលនៃគណៈអភិបាលខេត្តមណ្ឌលគិរី បានឱ្យដឹងថា ខេត្តមណ្ឌលគិរី ជាគោលដៅទេសចរណ៍ដ៍ធំមួយ ដែលអាចនឹងមានភ្ញៀវទេសចរចេញចូលជាអចិន្ត្រៃ ក្នុងអំឡុងពេលជិតភ្ជុំបិណ្ឌនេះ ដូច្នេះអាជ្ញាធរបាន​ដាក់កម្លាំងសមត្ថកិច្ចនៅតាមព្រំប្រទល់ខេត្ត​ដើម្បីត្រួតពិនិត្យសុខភាព វ៉ាស់កម្ដៅ ប្រជាពលរដ្ឋ និងការត្រួតពិនិត្យ បាញ់អាល់កុល ពាក់ម៉ាស មុនពេល​អនុញ្ញាតឱ្យពលរដ្ឋចូលទៅក្នុងខេត្ត។

លោកបញ្ជាក់ថា តំបន់រមណីយដ្ឋានទេសចរណ៍ភាគច្រើន នៅមណ្ឌលគិរី អនុញ្ញាតឱ្យបើកទទួលភ្ញៀវទេសចរណ៍ អំឡុងពេលឈប់សម្រាក ៣ ថ្ងៃខាងមុខនេះ។

ប្រធានមន្ទីរសុខាភិបាល ខេត្តមណ្ឌលគិរី លោក ប៊ុន សួរ បានឱ្យដឹងថា ក្នុងអំឡុងពេលជិតភ្ជុំបិណ្ឌ រដ្ឋបាលខេត្ត បានសហការជាមួយអាជ្ញាធរគ្រប់ជាន់ថ្នាក់ ចូលរួមទប់ស្កាត់ជំងឺកូវីដ១៩។ លោកបានប្រាប់ថា ក្រុមការងាអន្តរមន្ទីរ ដែលដឹកនាំដោយរដ្ឋបាលខេត្ត បានចេញវិធានការ តម្រូវឱ្យម្ចាស់រមណីយដ្ឋាននានា គោរពតាមវិធានការសុខាភិបាល ៣ ការពារ និង ៣ កុំ។

លោកបន្តថា តម្រូវឱ្យម្ចាស់ រមណីយដ្ឋានសហការជាមួយអាជ្ញាធរ រៀបចំអាល់កុល ម៉ាស៊ីនវ៉ាស់កម្ដៅ ដាក់គ្រប់ទីន្លែង ជាពិសេសការរក្សាគម្លាត ដើម្បីកុំឱ្យប្រជាជនអ្នក​ទេសចរណ៍ទាំងអស់នោះជ្រៀតគ្នា។

លោក ប៊ុន សួរ បានបន្តថា ចំពោះម្ចាស់ផ្ទះសំណាក់ និងសណ្ឋាគារ គឺតម្រូវឱ្យពួកគេ ធ្វើយ៉ាងណា មិនឱ្យប្រជាពលរដ្ឋដែលទៅទស្សនា ជួបជុំគ្នាច្រើន ដែលបង្កជាហានីភ័យ ហើយនៅបន្ទប់នីមួយៗ ត្រូវមានពន្លឺចេញចូល និងអាល់កុលជាប្រចាំ៕

អត្ថបទៈ ឡេង ដេត