ព័ត៌មានជាតិ

ផ្លូវ៥ខ្សែក្នុងរាជធានី និងខេត្តកណ្តាល បានដាក់ឲ្យចរាចរណ៍វិញ ក្រោយខូចខាតដោយទឹកជំនន់

បានផុស

៤ years មុន

នៅ

ថ្ងៃអង្គារ ១ ធ្នូ ២០២០

ដោយ

ផ្លូវជាតិនិងផ្លូវបេតុងចំនួន៥ខ្សែ នៅក្នុងភូមិសាស្ត្ររាជធានីភ្នំពេញ និងស្រុកកណ្តាលស្ទឹង ខេត្តកណ្តាល ដែលទទួលរងការខូចខាតក្រោយពីទឹកជំនន់ជន់លិច ពិសេសនៅតំបន់ជាយក្រុង ដោយផ្លូវខ្លះទទួលរងការខូចខាតយ៉ាងធ្ងន់ធ្ងរ និងផ្លូវខ្លះទៀតទទួលរងការខូចខាតជាមធ្យម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉ុន្តែទោះបីជាយ៉ាងណាក្តី ផ្លូវទាំង០៥ខ្សែនេះ ត្រូវបានក្រសួងសាធារណការនិងដឹកជញ្ជូន អាជ្ញាធររាជធានីភ្នំពេញ មន្ទីរសាធារណការនិងដឹកជញ្ជូនរាជធានីសហការជាមួយអាជ្ញាធរខណ្ឌធ្វើការជួសជុលឡើងវិញរួចរាល់ហើយ ដើម្បីដាក់ឲ្យបងប្អូនប្រជាពលរដ្ឋ បានធ្វើចរាចរណ៍បណ្ដោះអាសន្ន។

លោក សាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញនាព្រឹកថ្ងៃទី០១ធ្នូ ឆ្នាំ២០២០នេះថា ក្រោមការណែនាំរបស់លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រី និងលោក ឃួង ស្រេង អភិបាលរាជធានីភ្នំពេញ មន្ទីរសាធារណការនិងដឹកជញ្ជូនរាជធានីភ្នំពេញ សហការជាមួយអាជ្ញាធរខណ្ឌ បានធ្វើការជួសជុលចំនួន៥ខ្សែរួចរាល់ហើយ ដើម្បីដាក់ឲ្យបងប្អូនប្រជាពលរដ្ឋ បានធ្វើចរាចរណ៍បណ្ដោះអាសន្ន ក្នុងនោះរួមមាន៖ កំណាត់ផ្លូវជាតិលេខ៤ មុខសាលាក្ដីខ្មែរក្រហម ក្នុងខណ្ឌពោធិសែនជ័យ និងខណ្ឌកំបូល យើងបានជួសជុលរួចរាល់និងដាក់ឲ្យធ្វើចរាចរតាំងពីចុងខែវិច្ឆិកាមកម្ល៉េះ។ ចំណែកផ្លូវជាតិលេខ២ ផ្លូវជាតិលេខ៣ ផ្លូវព្រៃស និងផ្លូវលេខ ២០A ចាប់ពីរង្វង់មូលកួរស្រូវ ក្នុងសង្កាត់រលួល សង្កាត់ទៀនសង្កាត់គងនយ ខណ្ឌដង្កោ ដល់ស្រុកកណ្តាលស្ទឹង ខេត្តកណ្ដាល ដែលទទួលរងការខូចខាតធ្ងន់ធ្ងរ ដោយទឹកជំនន់ កាលពីខែតុលាយើង ក៏បានជួសជុលរួច និងដាក់ឲ្យចរាចរជាបណ្តោះអាសន្នហើយដែរ៕