ព័ត៌មានជាតិ

មុនពេលស្លាប់ លោក សែម សង្វាត បន្សល់ទុកបណ្តាំចុងក្រោយអ្វីខ្លះដល់កូនៗ?

បានផុស

៣ years មុន

នៅ

ថ្ងៃសៅរ៍ ២ តុលា ២០២១

ដោយ

មហាជនបានដឹងហើយថា លោក សែម សង្វាត ទទួលមរណភាព កាលពីវេលាម៉ោង ១២ និង ១០ នាទីរំលងអធ្រាត្រ ឈានចូលថ្ងៃទី ០១ ខែតុលា ឆ្នាំ ២០២១ បន្ទាប់ពីលោកពុះពារជម្នះជំងឺប្រចាំកាយអស់ជាច្រើនឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គេកត់សម្គាល់ថា ដំណឹង នៃមរណទុក្ខដ៏សោកសៅ និងក្រៀមក្រំបំផុតសម្រាប់ក្រុមគ្រួសារ លោក សែម សង្វាត នេះ បានធ្វើឲ្យមហាជន និងអ្នកសិល្បៈជាច្រើន សម្ដែងការសោកស្ដាយជាពន់ពេក ព្រមជាមួយការផ្ញើសារចូលរួមរំលែកទុក្ខនេះផងដែរ។

រហូតមកដល់ពេលនេះថ្វីត្បិតថា រូបកាយរបស់ លោក សែម សង្វាត ត្រូវឃ្លាតឆ្ងាយពីក្រុមគ្រួសារ មហាជន និងអ្នកគាំទ្រ មិនអាចមានថ្ងៃត្រឡប់ក្រោយក៏ពិតមែន ប៉ុន្តែសម្រាប់កេរ្តិ៍ឈ្មោះ និងប្រជាប្រិយភាពរបស់លោកនៅតែរក្សាបានការចងចាំពីសំណាក់អ្នកគាំទ្រគ្រប់គ្នា។

ដោយឡែកក៏នៅមានរឿងរ៉ាវមួយចំនួនទៀតដែលធ្វើឲ្យមហាជន និងអ្នកគាំទ្រចាប់អារម្មណ៍គឺចំពោះបណ្តាំចុងក្រោយរបស់ លោក សែម សង្វាត សម្រាប់កូនៗផងដែរ។

នៅក្នុងកិច្ចសម្ភាសន៍ជាមួយសារព័ត៌មានកូនប្រុសលោក សែម សង្វាត បានរៀបរាប់ទាំងក្ដុកក្ដួលថាពាក្យបណ្ដាំចុងក្រោយរបស់លោកឪពុកមុនពេលស្លាប់ គឺឲ្យកូនៗចេះស្រលាញ់គ្នាដោយមិនមានការបោះបង់នរណាម្នាក់ចោល(កាត់កាល់)។

កូនប្រុសលោក សែម សង្វាត គឺលោក សង្វាត រតនៈ បានបន្ថែមទៀតថា អ្វីដែលកាន់តែធ្វើឲ្យរន្ធត់ទៀតនោះគឺកំឡុងពេលឪពុកខ្លួនឈឺធ្ងន់គាត់បានប្រាប់កូនៗមិនឲ្យយកទៅពេទ្យទេ ព្រោះតែមិនមានលុយ ហើយលោក សែម សង្វាត ក៏ដឹងខ្លួនឯងថា ជំងឺពុំអាចប្រសើរឡើងវិញទេ ប៉ុន្តែក្នុងនាមលោកជាកូន និងស្ត្រីជាបងរបស់លោក សែម សង្វាត បានជម្នះចិត្តយកទៅមន្ទីរពេទ្យ តែលទ្ធផលមិនអាចសង្គ្រោះជីវិតគាត់បានទេ៕

អត្ថបទ ៖ ចាន់រ៉ា