ទេសរដ្ឋមន្ត្រី លី ធុជ នាំអំណោយ និងថវិកា របស់សម្តេចតេជោ និង​សម្តេច​កិត្តិ​ព្រឹទ្ធ​បណ្ឌិត​ ឧបត្ថម្ភដល់បុគ្គលិក​ដោះមីន ចំនួន​២៩​នាក់ ដែលមាន​វិជ្ជមាន​កូវីដ​-១៩ និងកំពុង​​ធ្វើ​ចត្តាឡីស័ក​នៅស្រុក​ភ្នំ​ក្រវាញ​ ខេត្ត​ពោធិ៍សាត់

លោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន នៅថ្ងៃទី០៤ ខែ​តុលា​ ឆ្នាំ២០២១នេះ បាននាំអំណោយជាគ្រឿងឧបភោគ បរិភោគ និងថវិកា របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានអាជ្ញាធរមីន​ និង​សម្តេច​កិត្តិ​ព្រឹទ្ធ​បណ្ឌិត​ ប្រធាន​កាកបាទក្រហម​កម្ពុជា​​ ប្រគល់ជូនដល់បុគ្គលិកដោះមីន ដែលបម្រើការងារនៅអង្គការ Halo Trust ចំនួន ២៩នាក់ ក្នុងនោះ​មាន​វិជ្ជមាន​កូវីដ​-១៩​ចំនួន​ ២៤​នាក់ និង​កំពុងជាប់ធ្វើចត្តាឡីស័ក ចំនួន​ ០៥​នាក់​ នៅស្រុក​ភ្នំ​ក្រវាញ​ ខេត្ត​ពោធិ៍សាត់​។

ពិធី​នេះ​​មានការអញ្ជើញចូលរួមពី​លោក​ ព្រំ​ សុភមង្គល​ អគ្គលេខាធិការ​អាជ្ញាធរ​មីន​ លោក ហេង​ សុភាណា​ អភិបាល​ស្រុក​ភ្នំក្រវាញ​ ​លោកស្រី ប៊ុត រតនា ​នាយិកាមូលនិធិ Sir Bobby Charlton ប្រចាំកម្ពុជា​ និង​កងកម្លាំង​ប្រដាប់​អាវុធ​ស្រុក​។

គ្រឿងឧបភោគ បរិភោគដែល​ជា​អំណោយ​ដ៏​ថ្លៃថ្លា​របស់​សម្ដេច​តេជោ​ និង​សម្តេច​កិត្តិ​ព្រឹទ្ធ​បណ្ឌិត​ រួមមាន៖ អង្ករ, ទឹកបរិសុទ្ធ, ភេសជ្ជៈ​,​ ទឹកស៊ីអ៉ីវ, មី, ត្រីខកំប៉ុង, ម៉ាស់ និងអាកុល​ ព្រមទាំង​ថវិកាឧបត្ថម្ភបុគ្គលិកអង្គការ Halo Trust ក្នុងម្នាក់២០ម៉ឺនរៀល ផងដែរ។

ក្នុង​ឱកាស​នោះ​ លោក​ទេសរដ្ឋមន្ត្រី​ បាន​ពាំនាំ​សេចក្ដី​នឹក​រលឹក​ និង​សាកសួរ​សុខទុក្ខ​ពី​សម្តេច​តេជោ​ និង​សម្តេច​កិត្តិ​ព្រឹទ្ធ​បណ្ឌិត​ ជូនចំពោះ​បងប្អូន​អ្នក​ដោះ​មីន​ទាំងអស់ ព្រម​ទាំង​បាន​បញ្ជាក់​បន្ថែម​ថា​ «សម្ដេចតេជោ ហ៊ុន សែន មិនត្រឹមតែស្វែងរកសុខសន្តិភាពជូនជាតិមាតុភូមិប៉ុណ្ណោះទេ ថែមទាំងជួយសង្រ្គោះអាយុជីវិតប្រជាពលរដ្ឋកម្ពុជា ឲ្យរួចផុតជំងឺកូវីដ១៩ទៀតផង តាមរយៈការ​ខិតខំ​ស្វែងរកវ៉ាក់សាំងមកចាក់ជូនប្រជាពលរដ្ឋបានជាបន្តបន្ទាប់ដោយឥតគិតថ្លៃ»។

ជួសមុខឱ្យបុគ្គលិកដោះមីនកម្ពុជាទាំងអស់ លោកទេសរដ្ឋមន្ត្រី លី ធុជ បានសម្ដែងនូវការដឹងគុណ និងកត្តញ្ញូតាធម៌ដ៏ខ្ពង់ខ្ពស់បំផុតជូនចំពោះសម្តេចតេជោ នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ដែលសម្តេចទាំងទ្វេរតែងតែយកចិត្តទុកដាក់អាណិតអាសូរ និងគិតគួរដល់សុខទុក្ខ របស់ប្រជាពលរដ្ឋកម្ពុជា ក៏ដូចជាការឧបត្ថម្ភគាំទ្រដល់បុគ្គលិកដោះមីនទាំងអស់ រាល់ទុក្ខលំបាក និងគ្រប់ពេលវេលា​ ជាពិសេស​ថ្មី​ៗនេះ​ បងប្អូន​អ្នក​ដោះ​មីន​ទាំងអស់​បាន​ទទួលនូវ​​វ៉ាក់​សាំង​បង្ការ​កូវីដ​-១៩​ គ្រប់​ៗគ្នា​។

លោកទេសរដ្ឋមន្ត្រី លី ធុជ បានលេីកឡេីងថា៖ «រាជរដ្ឋាភិបាលកម្ពុជា ក្រោមការដឹកនាំដ៏ខ្ពង់ខ្ពស់ របស់សម្តេចតេជោ នាយករដ្ឋមន្ត្រីបាននាំមកនូវសុខសន្តិភាព និងស្ថេរភាពនយោបាយពាសពេញផ្ទៃប្រទេស ជូនជាតិមាតុភូមិរួចហើយ អញ្ចឹងបងប្អូនអ្នកដោះមីន ដែលជាក្មេងជំនាន់ក្រោយពិតជាមានភារកិច្ចយ៉ាងសំខាន់ ក្នុងការចូលរួមជាមួយសម្តេចតេជោ ដល់កិច្ចគាំពារសន្តិភាព សម្រាប់​ជន​រួមជាតិ​ ព្រមទាំងចូលរួមប្រែក្លាយទឹកដីអតីតសមរភូមិ និងមានការគំរាមកំហែងខ្ពស់ដោយសារមីន ទៅជាដីដែលមានសុវត្ថិភាព និងការអភិវឌ្ឍ»។

បន្ថែមពីនេះ លោកទេសរដ្ឋមន្ត្រី បានបញ្ជាក់ថា ការងារបោសសម្អាតមីននៅកម្ពុជា នៅតែបន្តទៅមុខជានិច្ចទោះបី មានការរីករាលជំងឺកូវីដ១៩ ក៏ដោយព្រមទាំងបានណែនាំឱ្យបុគ្គលិកអ្នកដោះមីនទាំងអស់ ត្រូវបន្តមានការប្រុងប្រយ័ត្នខ្ពស់រក្សាអនាម័យ និងថែរក្សាសុខភាព ជាពិសេសត្រូវបន្តអនុវត្តន៍តាមវិធានការណែនាំរបស់សម្តេចតេជោ «៣ការពារ និង៣កុំ» ឱ្យបានខ្ជាប់ខ្ជួន។

សូមបញ្ជាក់ថា អង្គការ HALO Trust បានបម្រើការងារសកម្មភាពមីនមនុស្សធម៌ នៅកម្ពុជា ចាប់តាំងពីឆ្នាំ១៩៩១ ហើយបច្ចុប្បន្ននេះ មានបុគ្គលិកចំនួន​ ១,២១៥​ នាក់ ក្នុងនោះបុគ្គលិកបរទេសចំនួន​ ៣នាក់ ប្រតិបត្តការបោស​សម្អាត​មីន នៅក្នុងខេត្តចំនួន៧ រួមមានខេត្តពោធិសាត់ បាត់ដំបង ប៉ៃលិន បន្ទាយមានជ័យ ឧត្តរមានជ័យ ព្រះវិហារ និងខេត្តសៀមរាប ។

គិតត្រឹមខែកញ្ញា ឆ្នាំ២០២១ អង្គការ​ HALO Trust បានរំដោះផ្ទៃដីមានមីននិងសំណល់ជាតិផ្ទុះពីសង្គ្រាមប្រមាណ ៤០៨ គីឡូម៉ែត្រក្រឡា រកឃើញ និងកម្ទេចមីនប្រឆាំងមនុស្សបានចំនួន ៣០០,៥២១ គ្រាប់មីនប្រឆាំងរថក្រោះ​ ៤,៩៣៩ គ្រាប់ និងគ្រាប់មិនទាន់ផ្ទុះ ២០៩,៤៦៨​ គ្រាប់ ព្រមទាំងមានអ្នកទទួលផលប្រមាណ ១ លាននាក់៕