និស្ស័យស្នេហ៍សេសាន រមណីដ្ឋាន​បង្កើត​ថ្មី​លើ​ផ្ទៃដី ៦ ហិតា សម្រេច​​បាន ៤០ ភាគរយ

មន្ទីរទេសចរណ៍ខេត្តស្ទឹងត្រែង គាំទ្រដល់វិស័យឯកជន​ឱ្យបង្កើតរមណីយដ្ឋាន (និស្ស័យស្នេហ៍សេសាន) នៅស្រុកសេសាន ដើម្បីផ្តល់ការងារឱ្យកូនចៅប្រជាពលរដ្ឋធ្វើនៅក្នុងស្រុក និងបានរួមគ្នាអភិរក្សសម្បត្តិធនធានធម្មជាតិនៅតំបន់នេះផង។         

លោកអ៊ន់ ប៉ោសឿន ប្រធានមន្ទីរទេសចរណ៍ខេត្តបានបញ្ជាក់ថា ផ្នែកឯកជនជាដៃគូមួយយ៉ាងសំខាន់ក្នុងការអភិវឌ្ឍន៍វិស័យនានា មិនមែនតែវិស័យទេសចរណ៍មួយប៉ុណ្ណោះទេ។     

ក្នុងនាមស្ថាប័នជំនាញ ស្នើឱ្យម្ចាស់រមណីយដ្ឋានស្ថាបនាឱ្យមានស្តង់ទៅតាមគោលការណ៍របស់ក្រសួងទេសចរណ៏ ​ដើម្បីធានាសុវត្ថិភាពជូនភ្ញៀវមកកំសាន្ត ស្ថិតនៅក្នុងបរិបទជំងឺកូវីដ១៩។     

លោកកៃ តុលា ម្ចាស់រមណីយដ្ឋានទេសចរណ៍ (និស្ស័យស្នេហ៍សេសាន)បានបញ្ជាក់ថា ពេលរៀបចំបានល្អភ្ញៀវទេសចរ​នឹង​មកទស្សនាបានច្រើន ហើយប្រជាពលនៅមូលដ្ឋាននេះក៍រកប្រាក់ចំណូលបាន ដោយប្រយោលពីវិស័យទេសចរណ៍ផងដែរ។           

លោកបន្ថែមថា បច្ចុប្បន្នរមណីយដ្ឋាននេះស្ថាបនាបានជាង៤០%ហើយ គ្រោងបញ្ចប់​នៅដើមឆ្នាំ២០២៣ ទៅតាមផែនការដែលបានគ្រោងទុក។     

កញ្ញាសួន ម៉ាឡា ប្រជាពលរដ្ឋនៅភូមិឃុំភ្លុកបានសាទរ ចំពោះការររៀបចំបង្កើតឱ្យមានរមណីយដ្ឋាននៅក្នុងខេត្ត ព្រោះមិនបាច់ទៅលេងឆ្ងាយពីស្រុកភូមិ។      

កញ្ញាបន្តថា មួយវិញទៀត កញ្ញា​ក៍ចង់ឃើញភ្ញៀវទេសចរពីខេត្តផ្សេងៗមកកម្សាន្ត​នៅខេត្តស្ទឹងត្រែងវិញផងដែរ។        សូមបញ្ជាក់ថា រមណីយដ្ឋានទេសចរណ៍ (និស្ស័យស្នេហ៍សេសាន) ត្រូវបានអាជ្ញាធរស្រុកសេសាន សហការជាមួយផ្នែកឯកជនបង្កើតឡើងស្ថិតនៅលើផ្ទៃដីជាង០៦ហិចតា នៅក្នុងភូមិឃុំកំភុន ដែលមានចម្ងាយពីទីរួមខេត្តស្ទឹងត្រែងប្រមាណជាង១០គីឡូម៉ែត្រតែប៉ុណ្ណោះ៕

អត្ថបទ៖ ងិនលីម