ភ្ញៀវទេសចរក្នុងស្រុក សរសើរអំពីការរៀបចំបរិស្ថានដ៏ល្អ នៅពេលបានទៅទស្សនាប្រាសាទអង្គរវត្តជាថ្មី

ភ្ញៀវទេសចរជាតិ បានសម្ដែងការសប្បាយរីករាយ និងភ្ញាក់ផ្អើល នៅពេលទៅទស្សនាប្រាសាទនានា នៅរមណីយដ្ឋានអង្គរវត្ត នារដូវបុណ្យភ្ជុំបិណ្ឌ ខណៈដែលមានការរៀបចំបរិស្ថានយ៉ាងស្អាត។ អ្នកទេសចរណ៍មកពី រាជធានីភ្នំពេញ ខេត្ដព្រះវិហារ និងសៀមរាប បានលើកឡើងថា ក្នុងពេលដែលប្រទេសជាតិជួបបញ្ហាជំងឺកូវីដ-១៩ ពួកគាត់បានផ្អាកដើរកម្សាន្ដ។

ប៉ុន្ដែនៅពេលរាជរដ្ឋាភិបាល បានបើកទេសចរណ៍ឡើងវិញ ពួកគាត់បានទៅទស្សនាប្រាសាទអង្គរវត្តឃើញថា មានទិដ្ឋភាពស្រស់ស្អាតប្លែកជាងលើកមុនៗ ដោយមានការរៀបចំអភិវឌ្ឍហេដ្ឋារចនាសម្ព័ន្ធ និងសោភណ្ឌភាពដ៏ល្អ​ស្អាត។ ក្នុងនោះ រួមមាន៖ ការរុះរើតូបលក់ដូរ នៅតំបន់ខាងលិចអង្គរ រៀបចំសួនច្បារ និងដាំដើមឈើបន្ថែម ព្រមទាំងការស្ថាបនា និងកែលម្អផ្លូវថ្នល់ជាច្រើនកន្លែង ដែលពួកគា់តមិនធ្លាប់ឃើញកន្លងមក។

ពួកគាត់បន្ថែមថា ទាំងនៅខាងមុខអង្គរវត្ត និងក្នុងបរិវេណអង្គរ ក្នុងនោះមានការដាំផ្កា រៀបចំផ្លូវដើរលម្អដោយដើមឈើ និងផ្កាផ្ញីគ្រប់ប្រភេទ។ ជាងនោះទៅទៀត ការដើរកម្សាន្ដ នៅក្នុងវិបត្ដិជំងឺកូវីដ-១៩នេះ នៅក្នុងរមណីយដ្ឋានអង្គរវត្ត ត្រូវបានរៀបចំការពារជំងឺកូវីដ-១៩ តាមវិធានការរាជរដ្ឋាភិបាលបាល និងក្រសួងសុខាភិបាលផងដែរ។ ពួកគាត់ បានសម្ដែងនូវទឹកមុខសប្បាយរីករាយ ក្រោយពេលឃើញប្រាសាទអង្គរវត្ដអភិវឌ្ឍស្អាត និងមានភ្ញៀវទេសចរទៅទស្សនាច្រើនឡើងវិញនេះ។

លោក ណន តូនី ប្រធានក្រុមសណ្ដាប់ធ្នាប់នៅក្នុងរមណីយដ្ឋានអង្គរវត្ត បានឲ្យភ្នាក់ងារកម្ពុជាថ្មីដឹង នៅថ្ងៃទី៦ ខែតុលាថា ការបើកឲ្យចូលទស្សនា នៅក្នុងរមណីយដ្ឋានអង្គរ ត្រូវបានរៀបចំឲ្យមានសណ្ដាប់ធ្នាប់ល្អ អនាម័យ ដោយដាក់ទឹកអាកុល ស្គែនឃ្យូអរកូដ វាស់កំដៅ ពាក់ម៉ាស់នៅតាមផ្លូវចូលទស្សនាប្រាសាទ តាមណែនាំរបស់រាជរដ្ឋាភិបាល និងក្រសួងសុខាភិបាល មុនឲ្យភ្ញៀវចូលទស្សនា ដើម្បីការពារ និងទប់ស្កាត់ការឆ្លងជំងឺកូវីដ-១៩។ លោកបានបន្ដថា នៅក្នុងថ្ងៃបុណ្យភ្ជុំបិណ្ឌនេះ នឹងមានអ្នកទេសចរណ៍ ទៅទស្សនាប្រាសាទអង្គរកាន់តែច្រើនឡើង ខណៈដែលថ្ងៃបិណ្ឌទី១៤ មានអ្នកទៅកម្សាន្ដប្រមាណមួយថ្ងៃ ២ពាន់នាក់ បន្ទាប់ពីអាជ្ញាធរសម្រេចបើកក្រុងសៀមរាប ឲ្យមានការចេញ-ចូលឡើងវិញ៕

អត្ថបទ៖ គឿនវេត