ថៃឃាត់ខ្លួនពលករខ្មែរ ៤០ នាក់ នៅ ២ គោលដៅ ក្នុងថ្ងៃតែមួយ

ពលករខ្មែរសរុបចំនួន ៤០ នាក់ ត្រូវបានកម្លាំងទាហានឈុតខ្មៅថៃ ស្ទាក់ឃាត់ខ្លួនបានលើ ២ គោលដៅ ក្នុងស្រុកតែមួយ និងក្នុងថ្ងៃតែមួយ ខណៈពួកគេកំពុងលបឆ្លងដែនទៅរកការងារធ្វើដោយខុសច្បាប់ នៅក្នុងប្រទេសថៃ។

ការឃាត់ខ្លួននេះបានធ្វើឡើងនាថ្ងៃទី៨ ខែតុលា ឆ្នាំ២០២១ ដោយកម្លាំងកងរយលេខ ១២ និងកម្លាំងកងរយលេខ ១៣ ដែលកំពុងធ្វើការល្បាតតាមខ្សែបន្ទាត់ព្រំដែន ដើម្បីទប់ស្កាត់បទល្មើសឆ្លងដែនខុសច្បាប់គ្រប់ប្រភេទ នៅក្នុងរដូវកាល ការរាតត្បាតនៃជំងឺកូវីដ-១៩។

គោលដៅទី១ គឺកម្លាំងយោធាថៃ ក្នុងអង្គភាពកងរយលេខ១២ បានឃាត់ខ្លួនពលករខ្មែរ ចំនួន ២៨ នាក់ ក្នុងនោះប្រុស ១៧ នាក់ ស្រី ៩ នាក់ និងក្មេងតូចៗ ២ នាក់ ត្រង់ចំណុច ភូមិវឌ្ឍនា ឃុំផានសឹក ក្នុងឃុំអារញ្ញប្រាថេត ខេត្តស្រះកែវ ខណៈពួកគេកំពុងធ្វើដំណើរចូលទៅរកការងារធ្វើដោយខុសច្បាប់។

គោលដៅទី ២ ត្រូវបានកម្លាំងកងរយលេខ ១៣ ធ្វើការឃាត់ខ្លួនពលករខ្មែរ បន្ថែមចំនួន ១២ នាក់ទៀត ដែលក្នុងនោះ ប្រុស ៦ នាក់ ស្រី ៥ នាក់ និងក្មេងតូច ១ នាក់ ត្រង់ចំណុច ក្នុងភូមិ៦ ឃុំថាប់ភ្រិក ស្រុកអារញ្ញប្រាថេត ខេត្តស្រះកែវ ដែលបានលបឆ្លងដែនខុសច្បាប់ចូលទឹកដីថៃ។ 

បច្ចុប្បន្នពលករខ្មែរទាំង ៤០ នាក់ ត្រូវបានកម្លាំងយោធាថៃ បញ្ជូនទៅកាន់អធិការដ្ឋានតម្រួតស្រុកអារញ្ញប្រាថេត ដើម្បីសាកសួរតាមនីតិវិធី៕

អត្ថបទ៖ សោ និយមរ័ត្ន