ជនសង្ស័យម្នាក់ រត់មកលាក់ខ្លួននៅខេត្តរតនគិរី ពាក់ព័ន្ធករណីហិង្សា

ជនសង្ស័យម្នាក់ ត្រូវបានកម្លាំងការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តរតនគិរី បានសហការជាមួយនិងកម្លាំងនគរបាលរដ្ឋបាលឃុំតឺន ស្រុកកូនមុំ ចុះឃាត់ខ្លួនពាក់ព័ន្ធ​ករណី​ហិង្សាដោយចេតនា នៅខេត្តត្បូងឃ្មុំ​ ក្នុងនោះ​ដោយ​មាន​ការ​សម្របសម្រួល​ពី​លោក កែវ ភក្តី ព្រះ​រាជអាជ្ញារងអម​សាលាដំបូងខេត្តរតនគិរី។ 

ការឃាត់​ខ្លួន​ជន​សង្ស័យ​ខាង​លើ​នេះ​ បាន​ធ្វើ​ឡើង​នៅ​វេលា​ម៉ោង​១​៣​និង​១៥នាទី កាលពីថ្ងៃទី៩​ ខែតុលា ឆ្នាំ២០២១។ 

យោងតាមរបាយការណ៍ពីនគរបាលបានឲ្យដឹងថា ឃាត់ខ្លួនជនសង្ស័យម្នាក់ពាក់ព័ន្ធករណីហិង្សាដោយចេតនា នៅខេត្តត្បូងឃ្មុំ កាលពីថ្ងៃទី៧ ខែតុលា ឆ្នាំ២០២១​ បទល្មើសជាក់ស្តែង។ ជនសង្ស័យ​ឈ្មោះ ឆន វីធីន ភេទប្រុស អាយុ១៩ឆ្នាំ ជនជាតិខ្មែរ មុខរបរជាងម៉ូតូ។ 

របាយការណ៍​បាន​បញ្ជាក់​ថា វត្ថុតាង ដកហូតម៉ូតូ១គ្រឿងម៉ាកហុងដាឌ្រីម​ សេ៊រីឆ្នាំ២០១០ ឡើងតែមឆ្នាំ២០២០ ពណ៌ខ្មៅ បិតស្គុតពណ៌ក្រហម គ្មានស្លាកលេខ លេខតួរ-ម៉ាស៊ីន ៥៥៦៧០១ (សភាពចាស់) មានទីលំនៅបច្ចុប្បន្នភូមិឈូក ឃុំឈូល ស្រុកក្រូចឆ្មារ ខេត្តត្បូងឃ្មុំ។  

ក្រោយឃាត់ខ្លួនសមត្ថកិច្ចបានធ្វើតេស្តរកជំងឺកូវីដ១៩ លទ្ធផល(អវិជ្ជមាន)។ បច្ចុប្បន្នជនសង្ស័យខាងលើត្រូវបានឃាត់ខ្លួននៅការិយាល័យនគរបាលព្រហ្មទណ្ឌកម្រិតស្រាល នៃស្នងការនគរបាលខេត្តរតនគិរី ដើម្បីរៀបចំប្រគល់ទទួលឲ្យទៅស្នងការដ្ឋាននគរបាលខេត្តត្បូងឃ្មុំ ដើម្បីអនុវត្តនីតិវិធីបន្ត៕

អត្ថបទ៖ វុទ្ធឦសាន