នេះ​តម្លៃ​ទន្សាយ​​លក់​ចេញ ​​តាម​តូចតាមធំ​ ​​អតិថិជន​មក​រក​ទិញ​ដល់ផ្ទះ

អ្នកចិញ្ចឹមទន្សាយក្នុងស្រុក មានចំនួនតិចតួចបំផុតហើយក៏ពុំមានអ្នកធ្វើអាជីវកម្មធំដុំនោះដែរ ដោយសារតែអ្នកចិញ្ចឹមទន្សាយមានជាលក្ខណៈគ្រួសារនៅតាមផ្ទះ គ្រាន់តែដោះស្រាយជីវភាពគ្រួសារប៉ុណ្ណោះ។

អ្នក​ចិញ្ចឹមម្នាក់​ឈ្មោះ​ស្រីអូន ជាអ្នកប្រកបរបរចិញ្ចឹមសត្វចម្រុះគ្រប់ប្រភេទក្នុងខេត្តកំពតបានឲ្យដឹងថា ការចិញ្ចឹមទន្សាយ​តែ​៣ខែប៉ុណ្ណោះ ទន្សាយឆាប់ធំធាត់អាចបញ្ចេញលក់បាន។

ចំណីរបស់សត្វទន្សាយងាយស្រួលរក​​ជា​ប​ន្លែចម្រុះ ដែលកាត់ចោលដូចជា ត្រកួន ចេកជាដើម។ ការចិញ្ចឹមមេទន្សាយមួយក្បាល អាចបង្កើតកូនឆាប់រហ័សតែក្នុងរយៈពេល១ខែ បានកូនម្តងចំនួន៧ក្បាល ហើយអាចបញ្ចេញលក់ដោយ​កូន​តូចមួយក្បាល​លក់​ចេញ​បាន​តម្លៃ ៤ម៉ឺនរៀល។

ចំពោះ​ទន្សាយធំ តម្លៃ​ចាប់ពី ៦ម៉ឺនទៅ១០ម៉ឺនរៀល។ ក្នុងនោះបើ​តាមម្ចាស់​ចិញ្ចឹម​សត្វទន្សាយ​រូប​នេះ ទន្សាយ​មិន​ពិបាក​ទៅលក់នៅតាមទីផ្សារនោះទេពោល គឺមានអតិថិជនមកទិញរហូតដល់ផ្ទះតែម្តង។

អាជីវកម្មលើការចិញ្ចឹមទន្សាយនេះជាបទពិសោធន៍ដំបូងបើ​តាម​ស្រ្តី​រូប​នេះ។ ការចិញ្ចឹមទន្សាយនេះពុំមានហានិភ័យអ្វីឡើយ ដោយទទួលបានផលចំណេញទាំងថវិកានិងពេលវេលាឆាប់រហ័សតែក្នុងរយៈពេលតែ៣ខែ។ ដោយឡែកអតិថិជនដែលនិយមចូលចិត្តចិញ្ចឹមទន្សាយ ភាគច្រើនមកជាវយកទៅចិញ្ចឹមមានតាមបណ្តាខេត្តមួយចំនួននិងមកពីរាជធានីភ្នំពេញ។ បច្ចុប្បន្ននេះអ្នកដែលនិយមចូលចិត្តចិញ្ចឹមទន្សាយគឺគ្រាន់តែទុកលម្អគេហដ្ឋានតែប៉ុណ្ណោះ៕

អត្ថបទ៖ កញ្ញា វ៉ាត