សម្ដេច ស ខេង ៖ អាជ្ញាធរមិនត្រូវចង្អៀតចង្អល់ ហើយរឹតត្បិតព័ត៌មាន ដែលបង្ហាញពីការពិតនោះទេ

សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មានប្រសាសន៍ថា ក្នុងនាមជាអាជ្ញាធរ ដែល​ជាអ្នកមានអំណាច ត្រូវតែហ៊ានបើកចំហ និងធ្វើចិត្តឲ្យទូលាយផ្ដល់ឱកាសជូនប្រជាពលរដ្ឋ ដែលមាន​បញ្ហា​ត្រូវការអាជ្ញាធរ​ជួយដោះ​ស្រាយ។ ក្នុងពិធីប្រកាសចូលកាន់តំណែង អភិបាលខេត្តកំពង់ធំថ្មី នៅរសៀលថ្ងៃទី១១ ខែតុលានេះ សម្ដេច​ក្រឡាហោម ស ខេង បានលើកឡើងថា ក្នុងនាមអាជ្ញាធរមិនត្រូវចង្អៀតចង្អល់ ហើយរឹតត្បិត​ព័ត៌មាន ដែលបង្ហាញ​ពីការពិតនោះ​ទេ​។

សម្ដេចបានលើកឡើងបន្តថា «កាលណាយើងធ្វើដូច្នេះ! យើងពិតជានឹងជួបបញ្ហា លទ្ធផលចុងក្រោយ វានឹងទៅ​យ៉ាងម៉េច បានន័យថា ប្រជាពលរដ្ឋដែលមានបញ្ហា មិនត្រូវដោះស្រាយ ឬមួយ​ក៏ត្រូវបានដោះស្រាយ ក៏ប៉ុន្តែមិន​យុត្តិធម៌ៗ យើងដឹងទាំងអស់គ្នាហើយ គឺថាអំណាចចេញពីប្រជាពលរដ្ឋ ក្នុងក្របខណ្ឌនៃប្រទេសមួយ ដែលប្រកាន់​របបប្រជាធិបតេយ្យ សេរី ពហុបក្ស ប្រជាពលរដ្ឋតែងតែប្រើប្រាស់ នូវសិទ្ធិអំណាចរបស់គាត់ តាមរយៈការបោះ​ឆ្នោ​ត ផ្ដល់សេចក្ដីទុកចិត្ត ឬមិនផ្ដល់សេចក្ដីទុកចិត្ត នោះហើយជាការប្រើប្រាស់សិទ្ធិអំណាច របស់ពួកគាត់»។

សម្ដេច ស ខេង មានប្រសាសន៍បន្តថា អាជ្ញាធរគប្បីយល់អំពីបញ្ហានេះ​ ហើយត្រូវបើកចំហ ធ្វើចិត្តឲ្យទូលាយ ដើម្បីទទួលយកនូវបញ្ហាលំបាកៗទាំងឡាយ មកដោះស្រាយ។ ម្យ៉ាងទៀត អាជ្ញាធរត្រូវចៀសវាងរុញរាបញ្ហា​ដែលលំបាកៗ ហើយយកចិត្តទុកដាក់ដោះស្រាយតែបញ្ហាងាយស្រួល ដែលបើអាជ្ញាធរអនុវត្តយ៉ាងដូច្នេះ នឹង​មិនទទួល​បាន​បទពិសោធន៍ មិនអាចយល់បញ្ហាអស់នោះទ ហើយក៏មិនអាចដោះស្រាយបញ្ហា ដែលប្រជា​ពលរដ្ឋ​ជួប​ប្រទះនោះដែរ។

សម្ដេចរដ្ឋមន្ត្រីក្រសួងមហាផ្ទៃ បានស្នើដោយទទូចថា អាជ្ញាធរត្រូវតែបើកចំហ ដើម្បីបម្រើប្រជាពលរដ្ឋ ហើយរាល់​ព័ត៌​មានទាំងអស់ ត្រូវយកមកវិភាគ ពិចារណា ថាតើពិត ឬមិនពិត ហើយថាតើប៉ះពាល់ដល់ផលប្រយោជន៍យ៉ាង​ដូច​ម្ដេច​ខ្លះចំពោះរាជរដ្ឋាភិបាល និងប្រជាពលរដ្ឋ ក៏ដូចជាសហគមន៍មូលដ្ឋានផងដែរ៕

អត្ថបទ៖ ឃួន សុភ័ក្រ