ព្រះមហាក្សត្រ ត្រាស់បង្គាប់ធ្វើវិសោធនកម្មមាត្រាមួយចំនួននៃរដ្ឋធម្មនុញ ដើម្បីកំណត់សញ្ជាតិខ្មែរតែមួយ

ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានត្រាស់បង្គាប់ឱ្យចាត់ការតាមនីតិវិធីទៅលើការធ្វើវិសោធនកម្មមាត្រាមួយចំនួននៃរដ្ឋធម្មនុញដើម្បី កំណត់សញ្ជាតិខ្មែរតែមួយសម្រាប់ថ្នាក់ដឹកនាំកំពូលរបស់ជាតិ។

តាមរយៈព្រះរាជសារប្រទានសម្តេចតេជោ ហ៊ុន សែន នាយករដ្ឋមន្ត្រីកម្ពុជា ពីម្សិលមិញ ព្រះករុណាបានជម្រាបជូនថាព្រះអង្គបានទទួលនូវលិខិតលេខ ០៦៣/០១/ ២០២១ ចុះថ្ងៃទី១១ ខែតុលា ឆ្នាំ ២០២១ របស់ ឯកឧត្តមកិត្តិនីតិកោសលបណ្ឌិត អ៊ឹម ឈុនលឹម ប្រធានក្រុមប្រឹក្សាធម្មនុញ្ញរួចហើយ ស្តីពីមតិរបស់ក្រុមប្រឹក្សាធម្មនុញ្ញ អំពីការផ្តួចផ្តើមគំនិតធ្វើវិសោធនកម្មមាត្រា១៩ថ្មី មាត្រា៨២ថ្មី មាត្រា១០៦ថ្មី (មួយ) មាត្រា១១៩ថ្មី និងមាត្រា១៣៧ថ្មី នៃរដ្ឋធម្មនុញ្ញនៃព្រះរាជាណាចក្រកម្ពុជា និងមាត្រា៣ និង មាត្រា៤ នៃច្បាប់ធម្មនុញ្ញ បន្ថែមសំដៅធានានូវដំណើរការជាប្រក្រតីនៃស្ថាប័នជាតិ ដើម្បីកំណត់ឱ្យ ប្រធានរដ្ឋសភា ប្រធានព្រឹទ្ធសភា នាយករដ្ឋមន្ត្រី និងប្រធានក្រុមប្រឹក្សាធម្មនុញ្ញ ត្រូវតែជា ឥស្សរជនដែលមានសញ្ជាតិខ្មែរតែមួយគត់។

ជាមួយគ្នានេះដែរ ព្រះករុណាក៏បានប្រគល់លិខិតស្តីពី មតិរបស់ក្រុមប្រឹក្សាធម្មនុញ្ញ ខាងលើនេះ ជូនសម្តេចតេជោ ហ៊ុន សែន ដើម្បីបន្តចាត់ការទៅតាមនីតិវិធី។

គួរបញ្ជាក់ថា គណៈរដ្ឋមន្ត្រីបានបញ្ជូន សំណើធ្វើវិសោធនកម្មមាត្រាមួយចំនួននៃរដ្ឋធម្មនុញ្ញ នៃព្រះរាជាណាចក្រកម្ពុជា មាត្រា៣ និងមាត្រា៤ នៃច្បាប់ធម្មនុញ្ញបន្ថែម បានទៅដល់រដ្ឋសភាហើយ កាលពីល្ងាចថ្ងៃទី១១ ខែតុលា ម្សិលមិញ។

បើតាមអ្នកនាំពាក្យរដ្ឋសភា លោក ឡេង ប៉េងឡុង បានឱ្យដឹងថា រដ្ឋសភានឹងបើកកិច្ចប្រជុំគណៈកម្មាធិការអចិន្ត្រៃយ៍នាថ្ងៃទី១៤ ខែតុលា ខាងមុខ ដើម្បីពិនិត្យ និងបញ្ជូនសេចក្តីព្រាងច្បាប់នេះទៅគណៈកម្មការជំនាញដើម្បីសិក្សា បន្ទាប់ពីសិក្សារួចធ្វើរបាយការណ៍សុំដាក់ប្រជុំពេញអង្គរដ្ឋសភាតែម្តង៕

អត្ថបទ៖ សំអឿន