ក្រោយឈប់សម្រាកបុណ្យភ្ជុំបិណ្ឌ៣ថ្ងៃ ខេត្តត្បូងឃ្មុំរកឃើញមន្ត្រី៨នាក់ឆ្លងជំងឺកូវីដ

លោក​ ជាម ច័ន្ទសោភ័ណ អភិបាល​នៃ​គណៈ​អភិបាលខេត្ត​ត្បូងឃ្មុំ បានឱ្យដឹងថា ក្រោយពី​បាន​ឈប់​សម្រាក់​រយៈ​៣​ថ្ងៃ ក្នុងឱកាស​ពិធីបុណ្យ​ភ្ជុំបិណ្ឌ​រួចមក រដ្ឋបាលខេត្ត​ត្បូងឃ្មុំ បាន​បើក​យុទ្ធ​ការធ្វើ​តេស្ត​រហ័ស​ជូន​ដល់​មន្ត្រីរាជការតាម​មន្ទីរ​/​អង្គភាព​ជុំវិញ​ខេត្ត មន្ត្រីរាជការ ក្រុង ស្រុក ឃុំ សង្កាត់ បុគ្គលិក​សិក្សា លោក​គ្រូ​-​អ្នកគ្រូ និង​សិស្សានុសិស្ស​ចំពោះ​គ្រឹះស្ថានសិក្សា​ដែល​បើក​ដំណើការ​ឡើងវិញ ដើម្បី​បង្ការ​ទប់ស្កាត់​ការឆ្លង​រីក​រាលដាល​នៃ​ជំងឺ​កូ​វិដ​១៩ ក្នុង​មូលដ្ឋាន​ខេត្ត​ត្បូងឃ្មុំ​។​

ជាមួយគ្នានេះ លោក​អភិបាលខេត្ត​បានធ្វើការ​អំពាវនាវ​ដ​ល់​ថ្នាក់ដឹកនាំ មន្ត្រីរាជការ និង​ប្រជាពលរដ្ឋ​ទាំង​អស់ ត្រូវ​រួមគ្នា​ការពារ​ការឆ្លង​មេរោគ​នេះ តាម​វិធាន«៣​កុំ ៣​ការពារ​» ដោយ​បន្ត​ពាក់​ម៉ាស រក្សា​គម្លាត​សង្គម រក្សា​អនាម័យ​ជាប់​ជានិច្ច លាងដៃ​ជាមួយ​អាកុល​ ឬ​សាប៊ូ ពោលគឺ​ត្រូវ​ចង់ចាំ​ថា «​ការពារ​ប្រសើរ​ជាង​ព្យាបាល​»​។​

លោក​បណ្ឌិត ជាម ច័ន្ទ​សោភ័ណ បាន​ណែនាំ​ដល់​មន្ត្រីរាជការ​នៅតាម​មន្ទីរ​/​អង្គភាព​ជុំវិញ​ខេត្ត សូម​នាំគ្នា​ទៅយក​ណាក​ធ្វើតេស្ត​រហ័ស​អោយបាន​គ្រប់ៗ​គ្នា ដើម្បី​បង្ការ​ទប់ស្កាត់​ការឆ្លង​រីក​រាលដាល​នៃ​ជំងឺ​កូ​វិដ​១៩នៅពេលដែល​ចូល​បម្រើ​ការងារ​ក្នុង​ជំនាញ​រៀងៗ​ខ្លួន​។​

បើតាម​លោក​អភិបាលខេត្ត គិត​ត្រឹម​សៀ​ល​ថ្ងៃទី​១១ ខែតុលា ឆ្នាំ​២០២១​ម្សិលមិញ​នេះ រដ្ឋបាលខេត្ត​ត្បូងឃ្មុំ​បានរៀបចំ​ការយក​សំណាក​ធ្វើតេស្ត​រហ័ស​នៅ​បរិវេណ​រដ្ឋបាលខេត្ត​ត្បូ​ឃ្មុំ ជូន​ដល់​មន្ត្រីរាជការ​ចំណុះ​រដ្ឋបាលខេត្ត និង​មន្ទីរ​/​អង្គភាព​ជុំវិញ​ខេត្ត ចំនួន​៤៥៤​នាក់ ស្រី​១៧៨​នាក់ ក្នុងនោះ​ជា​លទ្ធផល​រកឃើញ​បុគ្គល​វិជ្ជមាន​កូ​វីដ​១៩ចំនួន​៨​នាក់​៕​

អត្ថបទ៖ សំអឿន​