ប្រធាន UNDP៖ ប្រទេស​អភិវឌ្ឍ​មាន​លុយ​ខ្លះ ចាក់​វ៉ាក់សាំង​យឺត​ជាង​កម្ពុជា

ប្រធាន​ UNDP ថា ​កម្ពុជា​ចាក់វ៉ាកសាំងបង្កការជំងឺកូវីដ១៩​​បានល្អជាងប្រទេស​អភិវឌ្ឍន៍មួយ​ចំនួន​​​ដែ​ល​មាន​លុយ​ច្រើន​ទៅទៀត​។ ការបញ្ជាក់បែបនេះ បានធ្វើឡើងក្នុងខណៈជួប​លោកឧបនាយករដ្ឋមន្រ្តី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ កាលពីថ្ងៃ ១២ ខែតុលា ឆ្នាំ២០២១នេះ។

លោកស្រីកត់សំគាល់​ឃើញ​ថា ប្រទេស​កម្ពុជា​មាន​ការអភិវឌ្ឍន៏រីកចំរើនយ៉ាងឆាប់រហ័ស ជាពិសេសក្នុងការកាត់បន្ថយភាពក្រីក្រ។ ជាងនេះទៀត រាជរដ្ឋាភិបាលកម្ពុជាសំរេចបាននូវការចាក់វ៉ាក់សាំងការពារជំងឺកូវីដ១៩ ជូនប្រជាពលរដ្ឋបានចំនួនជិត១០០ភាគរយ ក្នុងក្របខណ្ឌទូទាំងប្រទេស និងបានកោតសរសើរដល់រាជរដ្ឋាភិបាលកម្ពុជា ដែលបានចាក់វ៉ាកសាំងបង្កការជំងឺកូវីដ១៩ ជូនប្រជាពលរដ្ឋបានល្អជាងប្រទេសមួយចំនួន ជាពិសេសប្រទេសអភិវឌ្ឍន៍ខ្លះ ដែលមានលុយច្រើន ប៉ុន្តែការចាក់វ៉ាក់សាំងដល់ប្រជាពលរដ្ឋរបស់គេមានចំនួនតិច។

នៅក្នុងឱកាសនោះលោកឧបនាយករដ្ឋមន្ត្រី ប្រាក់ សុខុន ស្វាគមន៍ចំពោះលោកស្រី Alissar Chaker ដែលបានមកបំពេញបេសកកម្មនៅកម្ពុជា។ លោកឧបនាយករដ្ឋមន្ត្រីបានថ្លែងអំណរគុណដល់អង្គការ UNDP ចំពោះការផ្តល់ជំនួយទាំងឡាយដល់កម្ពុជា រយៈពេលជាង៥០ឆ្នាំកន្លងមកនេះ។

ថ្មីៗនេះ អង្គការ UNDP បានផ្តល់ជំនួយរថយន្តសង្គ្រោះបន្ទាន់ចំនួន ៦០គ្រឿង និងសម្ភារពេទ្យមួយចំនួនដល់ក្រសួងសុខាភិបាល ដើម្បីប្រយុទ្ធប្រឆាំងជំងឺកូវីដ១៩ ។

បើ​តាម​លោកឧបនាយ្រដ្ឋមន្ត្រី នៅខែក្រោយនេះ​ក៏​នឹងមានទស្សនកិច្ចរបស់អគ្គលេខាធិការរងអង្គការសហប្រជាជាតិទទួលបន្ទុកកងទ័ពថែរក្សាសន្តិភាព (មួកខៀវ) ផ្លូវការមកកាន់កម្ពុជា។ លោកថា កម្ពុជា គឺជាប្រទេសគំរូក្នុងការបញ្ជូនកងទ័ពមួកខៀវទៅចូលរួមថែរក្សាសន្តិភាពនៅតាមបណ្តាប្រទេសមួយចំនួនក្រោមឆ័ត្រអង្គការសហប្រជាជាតិ។ រួមទាំងប្រទេសលីបង់ ដែលជាប្រទេសកំណើតរបស់លោក ស្រី អាលីសារ ចាកគឺរផងដែរ។

ជាការឆ្លើយតប លោក ស្រី អាលីសារ ចាកគឺរ ក៏បានអរគុណចំពោះរាជរដ្ឋាភិបាលកម្ពុជា ជាពិសេសក្រសួងការបរទេស ដែលបានផ្តលកិច្ចសហការល្អជាមួយអង្គការ UNDP នាពេលកន្លងមក។  ក្នុងនាមជាតំណាងអង្គការ UNDP ប្រចាំកម្ពុជា លោកស្រីបានប្តេជ្ញាចិត្ត ធ្វើការងារជាមួយរាជរដ្ឋាភិបាលកម្ពុជា ក៏ដូចជាសហការជាមួយបណ្តាស្ថាប័ននានារបស់កម្ពុជា ដើម្បីសំរេចឲ្យបាននូវគោលដៅអភិវឌ្ឍន៍ប្រកបដោយចីរភាព៕ 

អត្ថបទ៖ កោះកែវ