ព័ត៌មានជាតិ

ដឹងប្រវត្តិរថយន្ត Rolls-Royce មុនចេញលក់បានមួយគ្រឿង បង្កប់ទស្សនៈស៊ីជម្រៅ

បានផុស

៣ years មុន

នៅ

ថ្ងៃពុធ ១៣ តុលា ២០២១

ដោយ

នរណាក៏ដឹងថារថយន្ត Rolls-Royce មិនមែនមនុស្សគ្រប់គ្នាសុទ្ធអាចជិះបាននោះទេ ដែលអាចនិយាយបានថារថយន្តនេះគឺសម្រាប់ត្រកូលអភិជនឬគហបតី ដែលជាអ្នកមុខអ្នកមាត់តំណាងប្រទេស ទើបស័ក្កសមកំពូលរថយន្តប្រណិតនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្ពុជាថ្មីនាំយកគំនិតទស្សនៈនិងរឿងរ៉ាវផ្សេងៗជុំវិញការអភិវឌ្ឍរថយន្ត Rolls-Royce៖

សំដីមួយម៉ាត់របស់ Sir Henry Royce ធ្វើឲ្យ Rolls-Royce រក្សាឈ្មោះល្បីសុសសាយ

Rolls-Royce បានក្លាយជារថយន្តដ៏លេចធ្លោនិងជាទីចាប់អារម្មណ៍ពីមនុស្សម្នាគ្រប់ទិសទី ដោយសារភាពប្រណិតលេចធ្លោដាច់គេ។ ការរចនាច្នៃប្រឌិតបង្កើតបានរថយន្ត Rolls-Royce គឺស្ថិតនៅក្រោមគោលគំនិតនិងទស្សនៈអភិវឌ្ឍយូរអង្វែងរបស់ស្ថាបនិករថយន្តនេះ។

លោក Sir Henry Royce ជាស្ថាបនិកក្រុមហ៊ុនរថយន្ត Rolls-Royce បានលើកទស្សនៈលើការអភិវឌ្ឍន៍រថយន្ត Rolls-Royce ថា “Take the best that exists and make it better” ដែលមានន័យថា “យករបស់ល្អបំផុតដែលមានមកធ្វើជាគំរូ ហើយធ្វើឲ្យបានល្អជាង បើមិនមានចូររចនាបង្កើតថ្មី”។

ទ្រឹស្ដីរបស់លោក Sir Henry Royce បានក្លាយជាអត្តសញ្ញាណរបស់ Rolls-Royce ដើម្បីយកមកអភិវឌ្ឍរថយន្ត Rolls-Royce ឲ្យមានភាពលេចធ្លោដាច់គេ។

Rolls-Royce រថយន្តសម្រាប់ត្រកូលអភិជន ឯតៃកុងបើកបរក៏មិនធម្មតាដែរ

ជារថយន្តសម្រាប់ត្រកូលអភិជន ការជ្រើសរើសតៃកុងបើកបររថយន្តដ៏អស្ចារ្យនេះ ត្រូវសម្រិតសម្រាំងជាមួយអ្នកដែលមានបុគ្គលិកលក្ខណៈដ៏ល្អឥតខ្ចោះ។

ម្ចាស់ដែលធ្វើដំណើរជាមួយរថយន្ត Rolls-Royce ប្រៀបបីដូចកំពុងជិះនៅលើកម្រាលព្រំទិព្វអីចឹង ដូច្នេះតៃកុង ត្រូវមានការទទួលខុសត្រូវខ្ពស់ទាំងសុជីវធម៌ និងបច្ចេកទេសក្នុងការបើកបរដោយមិនមែនផ្តោតតែលើការធ្វើដំណើរទៅ ដល់គោលដៅតែមួយមុខនោះទេ។

តើការផលិតរថយន្ត Rolls-Royce មួយគ្រឿងៗត្រូវចំណាយពេលយូរប៉ុណ្ណាដែរ?

ដូចដឹងស្រាប់ហើយ រថយន្ត Rolls-Royce មួយៗគឺខុសគ្នា ពីព្រោះរថយន្ត Rolls-Royce ត្រូវបានច្នៃទៅតាមការកុម្ម៉ង់របស់អតិថិជន។ អាចនិយាយបានថា តិចបំផុតក៏ត្រូវប្រើពេល ៣៦០ ម៉ោងដែរដើម្បីផលិតរថយន្តបានមួយគ្រឿង ប៉ុន្តែពេលវេលាអាចប្រែប្រួលផ្អែកលើធាតុផ្សំបន្ថែមដែលអតិថិជនចង់បាន។ ជាធម្មតាគឺវាចំណាយពេលយូរជាងនេះ ដោយសារតែការច្នៃកុម្ម៉ង់បន្ថែម។

និយាយពីរថយន្ត Rolls-Royce តើការរចនារថយន្ត Rolls-Royce ផ្ដោតលើចំណុចសំខាន់អ្វីខ្លះ?

Rolls-Royce គ្មានគូប្រកួតប្រជែងទេនៅលើលោក។ ការរចនាគ្រប់ម៉ូដែលរថយន្ត Rolls-Royce ឈរលើគោលគំនិតមួយថាតើរថយន្តនោះជារថយន្តដូចម្ដេច ហើយបន្ទាប់មកត្រូវផ្ដោតលើភាពឥតខ្ចោះលើគ្រប់ផ្នែកទាំងអស់មិនថាខាងមុខ ខាងក្រោយ ឬពីចំហៀង។

តើផ្នែកណាខ្លះដែលធ្វើឲ្យរថយន្ត Rolls-Royce ខុសប្លែកពីរថយន្តផ្សេងទៀត?

គ្រប់ផ្នែកនៃការឌីហ្សាញនៃរថយន្ត Rolls-Royce សុទ្ធតែបង្កប់គោលគំនិតដ៏ស៊ីជម្រៅ។ ជាក់ស្តែងទេវរូប Spirit of Ecstasy ជានិមិត្តរូបនៃរថយន្ត Rolls-Royce ដែលមានរឿងព្រេងដំណាលមានទំនាក់ទំនងជាមួយសហស្ថាបនិករបស់រថយន្ត Rolls-Royce។

ប៉ុន្តែវាគ្រាន់តែជារឿងតំណាល ឬជារឿងព្រេងប៉ុណ្ណោះ ហើយក៏មិនអាចបញ្ជាក់ថាវាជារឿងពិត ឬជារឿងប្រឌិតនោះដែរ ។ ដោយឡែករឿងមួយទៀតគឺការដាក់ឈ្មោះរថយន្តម៉ូដែល Ghost (ប្រែថាខ្មោច) ហេតុអ្វីបានជា Rolls-Royce ដាក់ឈ្មោះរថយន្តរបស់ខ្លួនថា Ghost ដូច្នេះ? ក៏មិនអាចមានការបញ្ជាក់ពីមូលហេតុថាយ៉ាងម៉េចនោះដែរ ប៉ុន្តែតាមរឿងដំណាល ការហៅឈ្មោះរថយន្តថា Ghost នោះ ក៏ព្រោះថារថយន្តនោះមានសំឡេងស្ងាត់មែនទែន ដែលធ្វើឲ្យមនុស្សទូទៅគិតថា វាជាខ្មោច ដែលទាំងអស់នេះសុទ្ធតែជាផ្នែកមួយនៃប្រវត្តិរបស់រថយន្ត Rolls-Royce៕

អត្ថបទ៖ ប៊ុណ្ណារ៉ា

–