ទណ្ឌិតខេត្តកណ្ដាល ទទួលបានវ៉ាក់សាំង២ប្រភេទនេះ ទើបមិនទាន់ចាក់ដូសទី៣

កន្លងមក ទណ្ឌិតខេត្តកណ្ដាល បានទទួលវ៉ាក់សាំងប្រឆាំងជំងឺកូវីដ-១៩ ២ប្រភេទ ចំនួន៣ដងមកហើយ ដែលវ៉ាក់សាំងខាងលើ វ៉ាក់សាំងខ្លះតម្រូវចាក់តែម្ដង និងវ៉ាក់សាំងខ្លះតម្រូវចាក់ចំនួន២ដង ទើបប្រធានពន្ធនាគារមិនទាន់ទទួលដំណឹងអំពីការចាក់វ៉ាក់សាំងដូសទី៣។

លោក ចាត ស៊ីនាង ប្រធានពន្ធនាគារខេត្តកណ្ដាល មានប្រសាសន៍ប្រាប់ “កម្ពុជាថ្មី” ថាទាក់ទងនឹងការចាក់វ៉ាក់សាំងបង្កាកូវីដ-១៩ សម្រាប់ទណ្ឌិតនៅពន្ធនាគារខេត្តកណ្ដាល គឺបានដំណើរការចាក់វ៉ាក់សាំង អាស្ត្រាហ្សេនីកា (astrazeneca) បានចំនួន ២លើក និងក្រោយមកបានចាក់វ៉ាក់សាំង ចនសុន អែន ចនសុន (Johnson & Johnson) ចំនួន ១លើកទៀត។​

លោក ចាត ស៊ីនាង មានប្រសាសន៍បញ្ជាក់បន្ថែមថា៖ “អ៊ីចឹងបានន័យថា ការចាក់វ៉ាក់សាំងនៅពន្ធនាគារ អាស្ត្រាសេនីកា បាន២លើក និងវ៉ាក់សាំង ចនសុន អែន ចនសុន ជាលើកចុងក្រោយ ចាក់វ៉ាក់សាំងលើកទី៣ អត់ទាន់ចាក់នៅឡើយទេ”។

ប្រធានពន្ធនាគារខេត្តកណ្ដាលខាងលើមិនបង្ហាញចំនួនទណ្ឌិតដែលកំពុងជាប់ឃុំទេ ប៉ុន្តែលោកបានបញ្ជាក់ថា កន្លងមកពន្ធនាគារខេត្តកណ្ដាល មិនមានអ្នកជំងឺកូវីដ-១៩ ប្រភេទ ដែលតា ទេ។

គួរបញ្ជាក់ថា កាលពីថ្ងៃទី១១ ខែតុលានេះ​ ក្រសួង​សុខាភិបាល ​និងក្រសួង​ការពារជាតិ​បានបើក​យុទ្ធនាការ​ចាក់វ៉ាក់សាំង​បង្ការ​ជំងឺ​កូវីដ-១៩ ដូស​ទី៣ ​ឬដូសជំរុញ​ដល់ប្រជាពលរដ្ឋ​ទូទៅ។​ យុទ្ធនាការ​នេះ គឺផ្តើមចេញ​ដំបូង​ពីរាជធានី​ភ្នំពេញ​មុនទៅកាន់​បណ្តាខេត្ត​នានានៅក្នុង​ប្រទេស​កម្ពុជា​។ ក្រសួង​សុខាភិបាល ​និងក្រសួង​ការពារជាតិ​សុទ្ធតែលើក​ឡើងពីសារៈ​សំខាន់​នៃការចាក់វ៉ាក់សាំង​ដូសទី៣នេះ ​ទាំងសម្រាប់​សុខភាព​សាធារណៈ​របស់កម្ពុជា​ប្រឆាំង​ការឆ្លងរាលដាល​នៃជំងឺ​កូវីដ-១៩​ និងសម្រាប់​ជាការឆ្ពោះទៅ​រកការបើកឱ្យ​ដំណើរការ​ផ្សេងៗឡើងវិញ​នៅក្នុងប្រទេស​នាពេលខាងមុខ​៕

អត្ថបទ៖ ច័ន្ទ វីរៈ