ស្នងការខេត្តកំពត ប្រកាសរៀបចំវេទិកានៅគ្រប់ឃុំ-សង្កាត់ទាំង ៩៣ ដើម្បីដោះស្រាយបញ្ហាជូនពលរដ្ឋ

លោកឧត្ដមសេនីយ៍ទោ ម៉ៅ ច័ន្ទមធុរិទ្ធ ស្នងការ​ នៃស្នងការដ្ឋាននគរបាលខេត្តកំពត បានប្រកាសថា ស្នងការដ្ឋាននគរបាលខេត្តកំពត នឹងរៀបចំកម្មវិធីចុះជួបប្រជាពលរដ្ឋ តាមបណ្តាឃុំ-សង្កាត់ទាំង ៩៣នៅទូទាំងខេត្ត ដើម្បីស្ដាប់បញ្ហានានា របស់ប្រជាពលរដ្ឋ និងដោះស្រាយបញ្ហាទាំងនោះ ជូនពួកគាត់។

ទំព័រហ្វេសប៊ុកផ្លូវការ របស់ស្នងការដ្ឋាននគរបាលខេត្តកំពត បានសរសេរនៅព្រឹកថ្ងៃទី១៤ ខែតុលានេះថា ស្នងការដ្ឋាននគរបាលខេត្តកំពត នឹងរៀបចំបង្កើតនូវកម្មវិធី ដើម្បីចុះជួបបងប្អូនប្រជាពលរដ្ឋ តាមបណ្តាឃុំសង្កាត់ទាំង ៩៣ ដើម្បីស្វែងរកបញ្ហាផ្សេងៗ និងដំណោះស្រាយជូនបងប្អូនប្រជាពលរដ្ឋ ដើម្បីធ្វើឲ្យគោលនយោបាយភូមិ-ឃុំ មានសុវត្ថិភាព កាន់តែមានប្រសិទ្ធភាពខ្ពស់។

ស្នងការដ្ឋាននគរបាលខេត្តកំពត បានសរសេរបន្តថា លោកមេប៉ុស្ដិ៍ទាំងអស់ នឹងត្រូវមានវត្តមានចូលរួមក្នុងវេទិការនេះ ព្រោះលោកឧត្ដមសេនីយ៍ទោ ម៉ៅ ច័ន្ទមធុរិទ្ធ ស្នងការខេត្ត នឹងចុះធ្វើវេទិការនេះដោយផ្ទាល់ រួមនិងមន្ត្រីជំនាញ​ពាក់ពន្ធ័ផ្សេងៗ ទៀត។ ប្រភពដដែល បានបញ្ជាក់ថា «ក្នុងករណីលោកមេប៉ុស្ដិ៍ មិនអាចយកបេះដូងពីប្រជាពលរដ្ឋ ក្នុងមូលដ្ឋានរបស់អស់លោកបាននោះទេ ស្មើនឹងគ្មានការគាំទ្រពីប្រជាពលរដ្ឋ អញ្ចឹងដំណោះស្រាយ ត្រូវយកអ្នកផ្សេងមកជំនួស»៕