រាជធានី ភ្នំពេញ មានកន្លែង​សម្រាប់​ធ្វើ​ចត្តាឡីស័ក ជាង​២០ទំតាំង

អ្នកនាំពាក្យ​រដ្ឋបាល​រាជធានី​ភ្នំពេញ លោក ម៉េត មាសភក្តី បានបញ្ជាក់ឱ្យដឹងនៅព្រឹកថ្ងៃទី​២ ខែវិច្ឆិកា​នេះ​ថា សម្រាប់រាជធានីភ្នំពេញ​ មានកន្លែងសម្រាប់ធ្វើចត្តាឡីស័ក​ ចំពោះ​ប្រជាពលរដ្ឋ​ខ្មែរ និង​ជន​បរទេសជា​ច្រើនកន្លែង ដែលកន្លែងទាំងអស់រៀបចំឡើងដោយរដ្ឋបាលរាជធានីភ្នំពេញ និងក្រសួងសុខាភិបាល។

​លោកបន្តថា មណ្ឌលចត្តាឡីស័កទាំងអស់ មានដូចជានៅមណ្ឌលចត្តាឡី​ស័ក ក្នុងមូលដ្ឋានទ័ពអាកាស​ពោធិ៍ចិនតុង​ សាលាហ៊ុន សែន ពោធិចិនតុង ក្នុងខណ្ឌពោធិ៍សែនជ័យ វិទ្យាល័យ ហ៊ុន សែន ១០០ខ្នង ក្នុង​ខណ្ឌសែន សុខ ។ មណ្ឌលចត្តាឡីស័ក ទាំង៣កន្លែងនេះ គឺទុកសម្រាប់​ប្រជាពលរដ្ឋស្នាក់​នៅធ្វើ​ចត្តាឡី​ស័ក ចំនួន១៤ថ្ងៃ ដោយមិនគិតប្រាក់ តែក៏មានសណ្ឋាគារ មួយចំនួនធំទៀតប្រ​មាណ​ជា២០ទី​តាំងទៀត​ដែរ សម្រាប់ធ្វើចត្តាឡីស័ក ចំពោះជនបរទេស ដោយត្រូវចំណាយថវិកា ។

បន្ថែមពីលើនេះទៀត រដ្ឋបាលរាជធានីភ្នំពេញ ក៏បាននិងកំពុងសាងសង់អាគារសំរាប់ធ្វើចត្តាឡីស័ក​មួយ​កន្លែង​ទៀត​ដែរ នៅតាមផ្លូវឡុងឈិន ក្នុងខណ្ឌព្រែកព្នៅ ដែលមានអាគារចំនួន៦ ក្នុងនោះមាន​ទាំង​អាគារ​សម្រាប់​គ្រូពេទ្យ និងអាគារសំរាប់ក្រុមសន្តិសុខផងដែរ។

​លោកបញ្ជាក់បន្ថែមថា ជាគម្រោងរបស់រដ្ឋបាលរាជធានីភ្នំពេញ យើងនឹងធ្វើការសាងសង់អាគារ​សម្រាប់​ធ្វើ​ចត្តាឡីស័កបន្ថែមទៀត​ តែលោកមិនបានបញ្ជាក់ថា នៅទីតាំងណានោះទេ។

​គួរបញ្ជាក់ថា យោងតាមអនុសាសន៍ដ៏ខ្ពង់ខ្ពស់របស់ សម្តេចអគ្គមហា សេនាបតីតេជោ ហ៊ុន សែន នាយក​រដ្ឋ​មន្ត្រីនៃព្រះរាជាណាចក្រកម្ពុជា កាលពីថ្ងៃទី ៣០ ខែវិច្ឆិកា ឆ្នាំ២០២០ ក្នុងពិធីបើក ការដ្ឋានសាងសង់ និង ​កែលំអ​ផ្លូវ​៣៨ខ្សែ ក្នុងក្រុងសៀមរាប ខេត្តសៀមរាប រដ្ឋបាលរាជធានីភ្នំពេញ នឹង​ឧបត្ថម្ភ​ថវិកា​របស់​រាជរដ្ឋាភិបាល ជូន​ប្រជាពលរដ្ឋក្រីក្រ ដែលធ្វើចត្តាឡីស័កទាំងអស់​នៅរាជធានីភ្នំពេញ ដោយក្នុង​១ គ្រួសារ​ទទួលបានថវិកាចំនួន ៣០ម៉ឺនរៀល សំរាប់រយៈពេល១៥ថ្ងៃ មានន័យថា ក្នុង០១ថ្ងៃ២ម៉ឺនរៀល ៕

អត្ថបទ ៖ ស្រីរ័ត្ន