អភិបាលរងខណ្ឌ២រូប ចុះសួរសុខទុក្ខ និងនាំយកអំណោយផ្តល់ជូនមន្ត្រីមានជំងឺ

ដើម្បីចូលរួមរំលែកទុក្ខជាមួយក្រុមគ្រួសាររបស់មន្ត្រីសាលាខណ្ឌច្បារអំពៅ ដែលមានជំងឺ និងជួបគ្រោះថ្នាក់ជាយថាហេតុ លោក ចេង មុនីរ៉ា អភិបាលនៃគណៈអភិបាលខណ្ឌ បានចាត់ឱ្យអភិបាលរងខណ្ឌ២រូប ចុះសួរសុខទុក្ខ ព្រមទាំងនាំយកអំណោយ និងថវិកានៅប្រគល់ជូនក្រុមគ្រួសារពួកគាត់ផងដែរ។ 

សកម្មភាពមនុស្សធម៌នេះបានធ្វើឡើងនៅព្រឹកថ្ងៃទី១៦  ខែតុលា ឆ្នាំ២០២១ ដែលទីតាំងទី១ដឹកនាំដោយលោក រស់ សុភក្តិ អភិបាលរងខណ្ឌ បាននាំយកសម្ភារៈ និងថវិកាទៅផ្តល់ជូនលោក ស៊ំ ប៊ុនធឿន មន្ត្រីសាលាខណ្ឌ ដែលកំពុងសម្រាកព្យាបាលជំងឺនៅផ្ទះស្ថិតក្នុងភូមិកោះនរា សង្កាត់និរោធ និងទីតាំងទី២ដឹកនាំដោយលោក ហ៊ត គឹមនី អភិបាលរងខណ្ឌ បាននាំយកសម្ភារៈ និងថវិកាទៅផ្តល់ជូនលោក ជេត យ៉ម ជាប្រធានមន្ទីរគណបក្សខណ្ឌ ដែលកំពុងសម្រាកព្យាបាលជំងឺនៅផ្ទះ ស្ថិតក្នុងភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ។

លោកអភិបាលរងទាំង២ បានពាំនាំនូវការផ្តាំផ្ញើសាកសួរសុខទុក្ខពីសំណាក់ អភិបាលខណ្ឌច្បារអំពៅ និងលោក ឃួង ស្រេង អភិបាលរាជធានីភ្នំពេញ ដែលជានិច្ចកាល លោកតែងតែគិតគូរយកចិត្តដល់មន្ត្រីថ្នាក់ក្រោមជាប្រចាំទាំងជីវភាពរស់នៅ គ្រោះថ្នាក់ជាយថាហេតុ និងបញ្ហាប្រឈមផ្សេងៗ។

បន្ទាប់ពីទទួលបានអំណោយ និងថវិកា លោក ជេត យ៉ម ក៏ដូចជាលោក ស៊ំ ប៊ុនធឿង បានសំដែងនូវទឹកចិត្តរីករាយ និងថ្លែងអំណរគុណដល់លោកអភិបាលខណ្ឌច្បារអំពៅ ដែលតែងតែគិតគូយកចិត្តទុកដាក់ដល់មន្ត្រីនៅក្រោមឱវាទ ដោយទឹកចិត្តប្រកបដោយមនុស្សធម៌៕

អត្ថបទ៖ នរា