អ្នកនាំពាក្យ ៖ មានតែបើកទទួលភ្ញៀវទេសចរអន្តរជាតិទេ ទើបអាចជួយស្រោចស្រង់វិស័យ​ទេសចរណ៍​​បាន

លោក តុប សុភ័ក អ្នកនាំពាក្យក្រសួងទេសចរណ៍ បានអះអាងថា បើទោះបីជាភ្ញៀវក្នុងស្រុក ចាប់ផ្តើមដើរកម្សាន្តឡើងវិញក៏ពិតមែន។ ប៉ុន្តែគ្រាន់តែអាចស្រោចស្រង់ អាជីវកម្មទេសចរណ៍បានតិចតួចប៉ុណ្ណោះ។ ដូចនេះមានតែការបើកប្រទេស ទទួលភ្ញៀវទេសចរអន្តរជាតិឡើងវិញទេ ទើបអាចជួយស្រោចស្រង់ វិស័យទេសចរណ៍ឲ្យដំណើរការល្អប្រសើរ ឡើងវិញបាន។

លោកបានបន្តទៀតថា មូលដ្ឋានអាជីវកម្មទេសចរណ៍ប្រមាណ ៣០ភាគរយ ដែលបានបិទទ្វារផ្អាកអាជីវកម្មកាលពីដើមឆ្នាំ នៅមិនទាន់បានបើកនោះទេ ខណៈអាជីវកម្មទេសចរណ៍មួយចំនួន បានចាប់ផ្តើមបើកដំណើរការឡើងវិញបណ្តើរៗ ក្រោយចរន្តទេសចរណ៍ផ្ទៃក្នុងចេញដើរកម្សាន្ត នាពេលកន្លងមក។ 

លោកមានប្រសាសន៍ឲ្យដឹងទៀតថា «ទោះបីជាស្ថានភាព នៃការរីករាលដាលនៃជំងឺកូវីដ-១៩ រាងធូរស្រាលជាងមុនបន្តិចក្តី និងការចេញដើរកម្សាន្តរបស់ទេសចរណ៍ផ្ទៃក្នុង ចាប់ផ្តើមងើបឡើងវិញ ជាពិសេសក្នុងអំឡុងពេលបុណ្យភ្ជុំបិណ្ឌក៏ដោយ។ ប៉ុន្តែមូលដ្ឋានអាជីវកម្មទេសចរណ៍ប្រមាណ៣០ភាគរយ ដែលបានបិទទ្វារផ្អាកអាជីវកម្មកាលពីដើមឆ្នាំ នៅមិនទាន់បានបើកទាំងអស់នោះទេ ដោយសារមិនទាន់មានបុគ្គលិកចាក់វ៉ាក់សាំងបង្ការជំងឺកូវីដ-១៩ គ្រប់ចំនួនតាមការកំណត់ ដែលក្រសួងអនុញ្ញាតឲ្យបើកដំណើរការវិញ»។

លោកបានបន្ថែមទៀតថា មូលដ្ឋានអាជីវកម្មទេសចរណ៍ ដែលបានចាប់ផ្តើមដំណើរការអាជីវកម្មរបស់ខ្លួនឡើងវិញបណ្តើរៗនោះ គឺមាននៅប៉ែកតំបន់ឆ្នេរ និងភូមិភាគឦសាន ខណៈខេត្តសៀមរាប មូលដ្ឋានអាជីវកម្មប្រមាណ ៩០ភាគរយ នៅតែបន្តបិទទ្វារនៅឡើយ។

លោកបានបញ្ជាក់ថា «បើទោះបីជាភ្ញៀវក្នុងស្រុក ចាប់ផ្តើមដើរកម្សាន្តឡើងវិញក៏ពិតមែន ប៉ុន្តែអាចស្រោចស្រង់អាជីវកម្មទេសចរណ៍បានតិចតួចប៉ុណ្ណោះ។ ដូចនេះមានតែការបើកប្រទេសទទួលភ្ញៀវអន្តរជាតិ ទើបអាចជួយស្រោចស្រង់វិស័យទេសចរណ៍ ឲ្យដំណើរការល្អប្រសើរឡើងបាន»។

លោកបានបន្ថែមទៀតថា ចំពោះផែនការបើកទទួលភ្ញៀវទេសចរបរទេស ដែលចាក់វ៉ាក់សាំងរួចនៅចុងឆ្នាំនេះ ក្រសួងបានត្រៀមរួចហើយ។ ប៉ុន្តែត្រូវរង់ចាំការប្រកាស ពីប្រមុខរាជរដ្ឋាភិបាល និងរង់ចាំមើលការវិវត្តន៍ នៃស្ថានភាពជំងឺកូវីដ -១៩ ប្រសិនបើមិនមានស្ថានភាពធ្ងន់ធ្ងរទេនោះ ផែនការបើកទទួលភ្ញៀវទេសចរបរទេស នឹងអាចអនុវត្តបានឆាប់ៗ ខាងមុខនេះ។

គួរបញ្ជាក់ថា ចាប់ពីខែតុលានេះតទៅ ក្រសួងទេសចរណ៍ តម្រូវឲ្យរាល់ការស្នើសុំអាជ្ញាបណ្ណមគ្គុទ្ទេសក៍ទេសចរណ៍ គ្រប់កម្រិតទាំងថ្មី និងបន្តត្រូវភ្ជាប់បណ្ណចាក់វ៉ាក់សាំង បង្ការជំងឺកូវីដ-១៩ ជាឯកសារថតចម្លង បន្ថែមលើលក្ខខណ្ឌបានកំណត់ក្នុងប្រកាស ស្តីពី ការផ្តល់អាជ្ញាបណ្ណទេសចរណ៍ដល់មគ្គុទ្ទេសក៍ទេសចរណ៍ ខណៈរាជរដ្ឋាភិបាលត្រៀមទទួលភ្ញៀវទេសចរអន្តរជាតិ ដែលវ៉ាក់សាំងរួចរាល់ ឲ្យចូលមកទស្សនាកម្ពុជា ដោយតម្រូវឲ្យធ្វើចតាឡីស័កត្រឹមតែ ៧ថ្ងៃប៉ុណ្ណោះ៕

អត្ថបទ៖ សំអឿន