ព័ត៌មានជាតិ

ក្រសួងកសិកម្មធ្វើប្រតិភូកម្មសេវារដ្ឋបាល និងផ្ទេរមុខងារមួយចំនួន ទៅរដ្ឋបាលថ្នាក់ក្រោមជាតិ

បានផុស

៣ years មុន

នៅ

ថ្ងៃចន្ទ ១៨ តុលា ២០២១

ដោយ

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានបើកសិក្ខាសាលា (តាមប្រព័ន្ធ Zoom) នៅព្រឹកថ្ងៃទី១៨ ខែតុលានេះ ក្នុងគោលបំណងធ្វើការផ្សព្វផ្សាយ និងដាក់ឱ្យប្រើប្រាស់កម្មវិធីកំណែទម្រង់វិមជ្ឈការនិងវិសហមជ្ឈការរបស់រាជរដ្ឋាភិបាល ដើម្បីផ្តល់ការណែនាំអំពីគោលការណ៍សំខាន់ៗក្នុងការផ្តល់សេវារដ្ឋបាលសម្រាប់វិស័យកសិកម្ម រុក្ខាប្រមាញ់ និងនេសាទ តាមរយៈការធ្វើប្រតិភូកម្ម ស្របតាមគោលការណ៍បែបបទ នីតិវិធី និងលក្ខខណ្ឌភ្ជាប់នានាដូចបានកំណត់ក្នុងបទដ្ឋានគតិយុត្តជាធរមាន ឆ្លើយតបទៅនឹងកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដំណាក់កាលទី២ ឆ្នាំ២០២១-២០៣០ ក្នុងក្របខណ្ឌកំណែទម្រង់ស៊ីជម្រៅ របស់រាជរដ្ឋាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក វេង សាខុន រដ្ឋមន្ត្រីបានលើកឡើងថា ឆ្លើយតបទៅនឹងគោលនយោបាយវិមជ្ឈការ និងវិសហមជ្ឈការ ក្រសួងកសិកម្ម រុក្ខាប្រមាញ់ និងនេសាទ បានធ្វើកំណែទម្រង់វិមជ្ឈការ និងវិសហមជ្ឈការតាមបែបប្រតិភូកម្មសេវារដ្ឋបាលមួយចំនួនទៅឱ្យរដ្ឋបាលរាជធានី-ខេត្តរួមមាន៖ ការចេញលិខិតអនុញ្ញាតធ្វើវារីវប្បកម្ម ការចេញលិខិតអនុញ្ញាត និងវិញ្ញា បនបត្រអនាម័យសត្វ និងផលិតផលសត្វ (បសុព្យាបាល) សេវាកម្មត្រួតពិនិត្យអនាម័យសត្វ និងផលិតផលសត្វ និងការប្រមូលកម្រៃសេវាត្រួតពិនិត្យអនាម័យសត្វសាច់ និងផលិតផលសត្វនៅសត្តឃាតដ្ឋាន “ប្រភេទ ខ” សេវាលើការចេញលិខិតអនុញ្ញាតលក់ដុំលក់រាយថ្នាំកសិកម្ម ឬជីកសិកម្ម ឬចម្រុះនូវថ្នាំកសិកម្ម និងជីកសិកម្ម សេវាលើដំណើរការឆ្លងវគ្គអប់រំសមត្ថភាពវិជ្ជាជីវៈសម្រាប់អ្នកផ្គត់ផ្គង់ចែកចាយអ្នកលក់ដុំលក់រាយ និងជាពិសេសដើម្បីធានាការផ្តល់សេវារដ្ឋបាលនៅអង្គភាពច្រកចេញចូលតែមួយនៃរដ្ឋបាលរាជធានី-ខេត្តឱ្យមានប្រសិទ្ធភាព និងទាន់ពេលវេលាក្រសួងកសិកម្មនិងក្រសួងមហាផ្ទៃបានឯកភាពដាក់ចេញនូវសេចក្តីណែនាំអន្តរក្រសួងលេខ ៣២៧ សណន. កសក ចុះថ្ងៃទី១៤ ខែកញ្ញា ឆ្នាំ២០២១ ស្តីពី “បែបបទនីតិវិធី និងលក្ខខណ្ឌភ្ជាប់នៃការផ្តល់សេវារដ្ឋបាលក្នុងវិស័យកសិកម្ម រុក្ខាប្រមាញ់ និងនេសាទនៅរដ្ឋបាលរាជធានី-ខេត្ត”។

ជាមួយគ្នានេះក្រសួងក៏បានផ្ទេរមុខងារតាមបែបប្រតិភូកម្មប្រគល់ទៅឱ្យរដ្ឋបាល ក្រុង ស្រុក ខណ្ឌ រួមមាន៖ ការងារកសិកម្ម ការងារសុខភាពសត្វ និងផលិតកម្មសត្វ ការងារព្រៃឈើ ការងារជលផល និង ការផ្តល់សេវារដ្ឋបាលផ្នែកកសិកម្ម (ជី និងថ្នាំកសិកម្ម) ផ្នែកផលិតកម្ម និងបសុព្យាបាល (វិញ្ញាបនបត្រអនាម័យសត្វ ផលិតផលសត្វ និងបសុ ព្យាបាល) និង ផ្នែកវារីវប្បកម្ម។ ក្នុងការធ្វើកំណែទម្រង់វិមជ្ឈការ និងវិសហមជ្ឈការពាក់ព័ន្ធនឹងវិស័យកសិកម្ម រុក្ខាប្រមាញ់ និងនេសាទ រាជរដ្ឋាភិបាលបានបង្កើតរចនាសម្ព័ន្ធគ្រប់គ្រងថ្មីដោយធ្វើសមាហរណកម្មការិយាល័យកសិកម្មក្រុងស្រុក ខណ្ឌទៅក្នុងរចនាសម្ព័ន្ធថ្មីរបស់រដ្ឋបាលក្រុង ស្រុក ខណ្ឌ ដែលមានការិយាល័យកសិកម្ម ធនធានធម្មជាតិ និងបរិស្ថាន នៃរដ្ឋបាលស្រុក និងការិយាល័យសេដ្ឋកិច្ច និងអភិវឌ្ឍសហគមន៍នៃរដ្ឋបាលក្រុងខណ្ឌ។ ដោយឡែក សេចក្តីព្រាងសេចក្តីណែនាំអន្តរក្រសួងស្តីពីគោលការណ៍ នីតិវិធី និងស្តង់ដារសេវាសម្រាប់គ្រប់គ្រង ចាត់ចែង និងអនុវត្តមុខងារវិស័យកសិកម្ម រុក្ខាប្រមាញ់ និងនេសាទ នៅរដ្ឋបាលក្រុង ស្រុក ខណ្ឌ បាន និងកំពុងដំណើរការពិនិត្យ និងពិភាក្សា។

ដើម្បីធានាដល់ដំណើរការនៃការអនុវត្តប្រកបដោយប្រសិទ្ធភាពខ្ពស់នៃដំណើរការកំណែទម្រង់វិមជ្ឈការ និងវិសហមជ្ឈការឱ្យកាន់តែមានភាពច្បាស់លាស់ សុក្រឹត្យ និងទាន់ពេលវេលា លោក វេង សាខុន បានផ្តល់ជូនអនុសាសន៍សំខាន់ៗមួយចំនួនជូនទៅលេខាធិការដ្ឋានក្រសួងថ្នាក់ដឹកនាំ និងមន្ត្រីគ្រប់លំដាប់ថ្នាក់ទុកជាធាតុចូលសម្រាប់ជាមូលដ្ឋានគ្រឹះ យកទៅអនុវត្តបន្ត ឆ្លើយតបតាមសេចក្តីត្រូវការជាក់ស្តែងរបស់ប្រជាពលរដ្ឋនៅមូលដ្ឋានផ្ទាល់៕

អត្ថបទ៖ ណារី