សិប្បករច្នៃប្រឌិត«ជាលសម្បុកមាន់»ធ្វើពីឫស្សី មានការចាប់អារម្មណ៍ច្រើនពីអ្នកទិញ

ក្រៅពី​សិប្បកម្ម​ផលិត​ឈ្នាង អង្រុត ទ្រូ ធ្វើពី​ដើម​ឫស្សី​ខ្មែរ​យើង​ពី​ដើម​ចេះ​ច្នៃប្រឌិត​ដោយ​យក​វត្ថុធាតុដើម​ពី​ដើម​ឫស្សី​ភាគច្រើន​បានល្អ​ឥតខ្ចោះ​ ដែល​ធ្វើឱ្យ​សិប្បករ​ខ្មែរ​យើង​ដែល​ត្បាញ​ពី​ឫស្សី​មានការ​គាំទ្រ​ច្រើន​ដូចជា​ថ្មីៗ​នេះ កសិករ​យើង​បាន​បង្កើត​ស្នាដៃ​ត្បាញ​ជាល​សម្បុកមាន់​សម្រាប់​ដា​ក់​សត្វ​គ្រប់​ប្រភេទ​។​

សិប្បករ​ដែល​រកឃើញ​ការ​ត្បាញ​ជាល​សម្បុកមាន់​ពី​វត្ថុធាតុដើម​ឫស្សី​នេះ​ឈ្មោះ ថា ធារ៉ា រស់នៅ​ភូមិ​ព្រៃ​ចាស់ ក្នុង​ខេត្តសៀមរាប បានឱ្យដឹងថា ​បាន​បង្កើត​ស្នាដៃ​ត្បាញ​ជាល​នេះ​ទើបតែ​បាន​មិន​ដល់​២​ខែ​ផង​នោះទេ​។​

ក្នុងនោះ​សហគមន៍​ភូមិ​ព្រៃ​ចាស់ ​ភាគច្រើន​លើសលប់​ច្រើនតែ​ត្បាញ​ឈ្នាង និង​អង្រុត ផលិត​ចេញទៅ​ក្រៅ​ខេត្ត​ប៉ុណ្ណោះ ​ក៏ប៉ុន្តែ​មួយរយៈ​ចុងក្រោយ​នេះ​បងស្រី ធារ៉ា បាន​ផ្តួចផ្តើម​បង្កើតឡើង​ស្នាដៃ​ត្បាញ​ជា​ប្រភេទ​ជាល​សម្បុកមាន់​ធ្វើឱ្យ​អ្នកប្រើប្រាស់​ភ្ញាក់ផ្អើល​ក​ម្ម៉ង់​ទិញ​ច្រើន​។

បងស្រី ធារ៉ា បន្តថា​ ជាល​សម្បុកមាន់​នេះ​ លក់​ចេញ​មួយ​ថ្លៃ​២៣០០០​រៀល​ ទៅ​៣០០០០​រៀល​អាស្រ័យ​ទៅនឹង​អតិថិជន​ដែល​ជាវ​តិច​ឬ​ច្រើន​អាច​ចុះថ្លៃ​ទៅតាម​បរិមាណ​ដែល​ទិញ​ ទោះបីជា​តម្លៃ​លក់​ចេញ​ជាល​នេះ​ដែល​អតិថិជន​ខ្លះ​ថា​ ថ្លៃ​ក៏ពិតមែន​ តែ​ក៏មាន​អតិថិជន​ខ្លះទៀត​លាន់មាត់​សរសើរ​ថា មិន​ថ្លៃ​ទេ ​ដោយ​សារ​តែ​វត្ថុ​ជាល​នេះ​ជា​ស្នាដៃ​ត្បាញ​ដោយ​ដៃ​។​

គូសបញ្ជាក់ថា ជាល​សម្បុកមាន់​ដែល​ផលិត​ថ្មី​នេះ​ អាចដាក់​ប្រើប្រាស់​ធ្វើជា​សម្បុកមាន់​ដាក់​កូន​ឆ្កែកូន​ទន្សាយ​ដោយ​ក្នុង​មួយថ្ងៃ​សមាជិក​ក្នុង​សហគមន៍​ភូមិ​ព្រៃ​ចាស់ ​អាច​ត្បាញ​ជាល​បាន​តែមួយ​ប៉ុណ្ណោះ​ ហើយ​ចំពោះ​វត្ថុធាតុដើម​ពី​ដើម​ឫស្សី គឺ​ត្រូវការ​ជ្រើសរើស​ដើម​ណា​ដែល​ត្រង់​ទើប​អាច​ផលិត​បានល្អ​ប្រសើរ​។ បច្ចុប្បន្ន​អតិថិជន​ដែល​ក​ម្ម៉​ង់​ទិញ ​ច្រើន​មកពី​ខេត្តកំពង់ចាម កំពង់ឆ្នាំង ភ្នំពេញ​ និង​មាន​រហូតដល់​ខេត្ត​ស្ទឹងត្រែង​ក៏មានដែរ​៕

អត្ថបទ៖ កញ្ញា វ៉ាត​