ស្អែកនេះ ក្រសួងវប្បធម៌ រៀបចំ កិច្ចប្រជុំឧត្ដមមន្ត្រីអាស៊ានវប្បធម៌ និងសិល្បៈ លើកទី១៧

ក្រសួងវប្បធម៌ និងចិត្រសិល្បៈ ស្ថិតក្រោមសសរស្ដម្ភសហគមន៍សង្គម-​វប្បធម៌អាស៊ាន នឹងរៀបចំ កិច្ចប្រជុំឧត្ដមមន្ត្រីអាស៊ានទទួលបន្ទុកវប្បធម៌ និងសិល្បៈលើកទី១៧ និងកិច្ចប្រជុំពាក់ព័ន្ធជាមួយដៃគូសន្ទនា តាមរយៈប្រព័ន្ធវីដេអូ នៅថ្ងៃស្អែក ទី២០ ខែតុលានេះ។

លោកស្រីបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ នឹងជាប្រធានរដ្ឋមន្ត្រីអាស៊ានទទួលបន្ទុកវប្បធម៌ និងសិល្បៈ នឹងថ្លែងសុន្ទរកថាបើកកិច្ចប្រជុំ។

កិច្ចប្រជុំនេះផ្ដោតលើការលើកកម្ពស់វឌ្ឍនភាពវប្បធម៌ និងសិល្បៈអាស៊ាន ដែលជាគ្រឹះមួយនៃសក្ដានុពលសហគមន៍អាស៊ាន ការកសាងភាពសុខដុមរមនាក្នុងចំណោមប្រជាជាតិ អាស៊ាន ការលើកស្ទួយស្មារតីភាពជាម្ចាស់ក្នុងការអភិរក្ស និងអភិវឌ្ឍន៍បេតិកភណ្ឌវប្បធម៌អាស៊ាន ការពង្រីកការយល់ដឹងផ្នែកវប្បធម៌គ្នាទៅវិញទៅមក និងការផ្លាស់ប្ដូររវាងប្រជាជន និងប្រជាជន ការជំរុញវិសាលភាពនៃការផ្សព្វផ្សាយអំពីវប្បធម៌ ការច្នៃប្រឌិត នវានុវត្តន៍ ការបង្កើនជីវភាពរស់នៅក្នុងការកសាងសហគមន៍អាស៊ានឆ្ពោះទៅរកការអភិវឌ្ឍរួមប្រកបដោយចីរភាព។

គួរបញ្ជាក់ថា កិច្ចប្រជុំឧត្ដមមន្ត្រីអាស៊ានទទួលបន្ទុកវប្បធម៌ និងសិល្បៈលើកទី១៧ និងកិច្ចប្រជុំពាក់ព័ន្ធជាមួយដៃគូសន្ទនា នេះ នឹងមានការចូលរួមពីសំណាក់ ឧត្ដមមន្ត្រីអាស៊ានទទួលបន្ទុកវប្បធម៌ និងសិល្បៈ និងដៃគូសន្ទនាអាស៊ាន រួមមាន សាធារណរដ្ឋប្រជាមានិតចិន ជប៉ុន និងសាធារណរដ្ឋកូរ៉េ៕

អត្ថបទ៖ ​ច័ន្ទ វីរៈ