សាលាបឋមសិក្សាឫស្សីកែវ រងការជន់លិច​ ត្រឹម​ម៉ោង​​នេះទឹកដក់ពេញទីធ្លាសាលា

ភ្នំពេញ ៖ នៅក្នុងបរិវេណសាលាបឋមសិក្សាឫស្សីកែវ ដែលមានទីតាំងស្ថិតនៅភូមិមិត្តភាព សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ តែងតែទឹកលិចជារឿយៗអោយតែមានភ្លៀងធ្លាក់មកម្តងៗ។

លោកគ្រូអ្នកគ្រូនៃសាលាបឋមសិក្សាឫស្សីកែវ​រៀបរាប់អោយដឹងថា កាលពីដើមឡើយមិន​ដែលមានទឹកលិចខ្លាំងនោះទេ បើទោះបីភ្លៀងខ្លាំងប៉ុន្មានក៏ដោយ ទើបតែរយះពេលជិតមួយឆ្នាំនេះ ស្រាប់តែមានទឹកលិចរៀងរាល់ពេលមេឃភ្លៀងធ្លាក់មកម្តងៗ។

បើ​តាម​ប្រភពពីលោកគ្រូអ្នក​គ្រូ ការជន់លិចនេះអាចមកពីប្រជាពលរដ្ឋដែលមានលំនៅឋានក្បែរសាលា ចាក់ដីលុបមុខទឹកហើយមើលទៅ ទើបបណ្តាលអោយទឹកលិចសាលារៀនបែបនេះ។ ការលិចបរិវេណសាលាបឋមសិក្សា ឫស្សីកែវ នេះ មានពេលខ្លះយូរនិងពេលចខ្លះឆាប់ក៏មានដែរ តាមរយះភ្លៀងធ្លាក់តិច ឬក៏ខ្លាំង។ មួយរយះពេលនេះសំណាងហើយដែលមិនទាន់បើកសាលារៀន ប្រសិនបើចូលរៀនវិញ អាចប្រឈមនឹងការផ្អាកមិនអោយសិស្សសិក្សាមួយរយះពេលហើយ។

ដោយសារបញ្ហានេះ លោកគ្រូអ្នកគ្រូក៏ដូចជាសិស្សានុសិស្ស និង អាណាព្យាបាលសិស្ស ស្នើ​ដល់ក្រសួងមន្ទីរស្ថាប័នពាក់ព័ន្ធ ជួយដោះស្រាយអំពីបញ្ហាទឹកលិចនៅក្នុងបរិវេណសាលាបឋមសិក្សាឫស្សីកែវ ដែលមានទីតាំងស្ថិតនៅភូមិមិត្តភាព សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ អោយបានល្អប្រសើរ ដែលជាថ្នាល​សម្រាប់បណ្តុះបណ្តាលចំណេះដឹង វិជ្ជាជីវៈ ទៅសិស្សានុសិស្សទូទៅ ៕

អត្ថបទ៖ រ៉ាវុទ្ធ